ޖަލުގައި ހިނގި ހާދިސާގެ މައުލޫމާތު އޮޅުންފިލުވާ ހާލަތު ދެނެގަތުމަށް މިނިސްޓަރ މާފުށީ ޖަލަށް
ހާދިސާއަށް ފަހު ކަންކަން ހިނގާދިޔަގޮތް މިނިސްޓަރ ބައްލަވާލައްވާނެ އަދި ޖަލުގެ އިސް އޮފިޝަލުންނާ ބައްދަލުކުރައްވާނެ
ހޯމް މިނިސްޓަރ މާފުށީ ޖަލަށް ޒިޔާރަތް ކުރެއްވުން
މާފުށީ ޖަލުގައި ޖޫން 20 ވަނަ ދުވަހު ހިނގާދިޔަ ހާދިސާއާ ގުޅިގެން މައުލޫމާތު އޮޅުންފިލުއްވާ ހާލަތު ދެނެގަތުމަށް މިނިސްޓަރ ޢިމްރާން ޢަބްދުﷲ ހޮނިހިރުދުވަހު މާފުށީ ޖަލަށް ޒިޔާރަތް ކުރައްވައިފިއެވެ.
ހޯމް މިނިސްޓްރީން ކުރި ޓްވީޓެއްގައި ބުނެފައި ވަނީ މި ޒިޔާރަތުގައި ހާދިސާއަށް ފަހު ކަންކަން ހިނގާދިޔަ ގޮތް މިނިސްޓަރ ބައްލަވާލައްވާނެ ކަމަށާއި ޖަލުގެ އިސް އޮފިޝަލުންނާ ބައްދަލުކުރައްވާނެ ކަމަށެވެ.
މާފުށި ޖަލުގައި ބުރާސްފަތި ދުވަހު ހިނގި ހާދިސާގައި ކަރެކްޝަނަލް ސަރވިސްގައި މަސައްކަތް ކުރާ ގައިދީއަކު ހަމަލާދިން ކަމަށް ބުނެ، ދެ ގޮޅިއަކުން ޖުމްލަ ފަސް މީހުން ނެރުމަށް ފަހު އެ މީހުން ފަހަތަށް ބިޑި އަޅުވައި ބިން މައްޗަށް ވައްޓާލުމަ ށްފަހު މުގުރުން ގައިގައި ތަޅާ، ކުރިމަތި ފަރާތަށާއި ފުރަގަސް ފަރާތަށް ޕެޕަރ ސްޕްރޭ ޖަހައި ބޯ ބާލުވާފައިވާ ކަމަށް އެކި މީޑިއާތަކުން ރިޕޯޓްކޮށްފައި ވެއެވެ. މޯލްޑިވްސް ކަރެކްޝަނަލް ސަރވިސްގެ ފަރާތުން ވަނީ އެ ވާހަކަތައް ދޮގުކޮށްފައެވެ.
މިއަދު މިނިސްޓްރީން ނެރުނު ނޫސްބަޔާނެއްގައި ބުނެފައިވަނީ ހާލަތާ ނުބައްދަލު މިންވަރަށް ބާރުގެ ބޭނުންކޮށްފައިވާ މައްސަލަ އާއި، ބަންދު މީހުންނަށް އަނިޔާވި މައްސަލައަކީ ސަރުކާރުން ބަލައިގަންނަ ކަމެއް ނޫން ކަމަށާއި އެކަންކަން ކުށްވެރިކުރާ ކަމަށެވެ.
އަދި މައްސަލަ އިތުރަށް ތަހުގީގު ކުރުމަށް ފަހު އިހުމާލުވާ ފަރާތްތަކާ މެދު ފިޔަވަޅު އަޅާނެ ކަމަށާއި މިފަދަ އަމަލުތަށް އިތުރަށް ތަކުރާރުވިޔަ ނުދިނުމަށްޓަކައި ޖަލުގެ އިންތިޒާމުތަކަށް ބަދަލުގެންނާނެކަމުގެ ޔަގީންކަން ދިވެހި ރައްޔިތުންނަށް އަރުވާ ކަމަށް ވެސް ބަޔާނުގައި ވެއެވެ.
