މުރުސީ އަވަހާރަކޮށްލީ މިސްރުގެ ސަރުކާރުން:ފިރެހެން ދަރިފުޅު

އަވަހާރަވެފައިވާ މިސްރުގެ ކުރީގެ ރައީސް މުހައްމަދު މުރުސީ، މިހާރުގެ ރައީސް އަބްދުލް ފައްތާހު އަލް ސީސީއާއި އިތުރު އޮފިޝަލުންތަކެއްވެގެން އަވަހަރަކޮށްލީ ކަމަށް މުރުސީގެ ދަރިކަލުން ތުހުމަތުކުރައްވައިފިއެވެ.

މިސްރުގެ ފުރަތަމަ ޑިމޮކްރެޓިކް ރައީސްގެ ގޮތުގައި 2012 ވަނަ އަހަރު ވެރިކަމަށް ވަޑައިގެންނެވި މުރުސީ އަވަހާރަވީ ޖޫން މަހުގެ 17 ވަނަ ދުވަހުއެވެ.

މުރުސީ އަވަހާރަވީ ކޯޓް ރޫމުގުގައި ހުންވަނިކޮށް ވެއްޓިވަޑައިގެންނެވިތާ ކުޑަ ވަގުތުކޮޅެއްގެ ތެރޭގައެވެ.

މުސްލިމް ބްރަދަހުޑް ގްރޫޕްގެ ލީޑަރަކަށް ހުންނަވަނިކޮށް މިސްރުގެ ފުރަތަމަ ޑެމޮކްރެޓިކް އިންތިޚާބު މުރުސީ ކާމިޔާބު ކުރައްވައި ވެރިކަމަށް ވަޑައިގަތީ 30 އަހަރުގެ ޚުދުމުޚުތާރު ވެރިޔާ މުހައްމަދު ހުސްނީ މުބާރަކްގެ ވެރިކަން އަރަބި ރަބީއުގައި 2011 ވަނަ އަހަރު ވައްޓާލިތާ އަހަރެއް ފަހުން 2012 ވަނަ އަހަރުއެވެ.

މުރުސީގެ ވެރިކަމާ ދެކޮޅަށް ބޮޑެތި މުޒާހަރާތަކެއް ކޮށް މިހާރުގެ ރައީސް އަދި އަސްކަރިއްޔާގެ އޭރުގެ ވެރިޔާ ޖެނެރަލް އަބްދުލް ފައްތާހު އަލްސީސީ އިސްވެ ހިންގެވި ބަޣާވާތާ އެކު މުރުސީގެ ވެރިކަން 2013 ވަނަ އަހަރުގެ ޖުލައިމަހު ވެއްޓުމާއެކު މުރުސީވަނީ ހައްޔަރުކޮށްފައެވެ. އޭގެ ފަހުން އަވަހާރަވުމާ ހަމައަށް ވެސް ހުންނެވި ޖަލު ބަންދުގައެވެ.

މުރުސީގެ ފިރެހެން ދަރިކަލުން އަބްދުﷲ ބުރާސްފަތި ދުވަހު ޓްވިޓަރގައި ކުރެއްވި ޕޯސްޓެއްގައި ވަނީ އޮފިޝަލުންތަކެއްގެ ނަން ލިޔުއްވައި އެއީ މުސރްސީ އަވަހާރަކޮށްލުމުގައި އަލް ސީސީގެ ބައިވެރިންކަށް ވިދާޅުވެފައެވެ.

ވަކިން ޚާއްސަކޮށް ކުރިއާއި މިހާރުގެ އިންޓީރިއަރ މިނިސްޓަރުން ކަމަށްވާ މަހްމޫދު ތައުފީޤްއާއި މަގްދީ އަބްދުލް ފައްތާހުގެ ނަން ފާހަގަކުރައްވާފައިވެއެވެ.

މީގެ އިތުރުން ފަނޑިޔާރު ޝީރީން ފަހުމީ، ޝަހުބާން އަލް-ޝަމީ އަދި އަހުމަދު ސަބްރީގެ އިތުރުން އެޓަރނި ޖެނެރަލް ނަބީލް ސާދިޤް އަދި އިންޓެލިޖެންސްގެ ވެރިޔާ އައްބާސް ކާމިލްގެ ނަން ފާހަގަކުރައްވާފައިވެއެވެ.

މިސްރުގެ ސަރުކާރުން މި ތުހުމަތުތަކަށް އަދި އެއްޗެއް ބުނެފައެއް ނުވެއެވެ.