ފަހު ވަގުތު އިރާނަށް ހަމަލާނުދޭން ނިންމީ 150 މީހުން މަރުވާނެކަމަށް ބުނުމުން: ޓްރަމްޕް
22 ޖޫން 2019 | ހޮނިހިރު 05:55އެއީ ޑްރޯން ވައްޓާލުމުގެ ރައްދެއްގެ ގޮތުން ނުބައްދަލު ކަމެއް: ޓްރަމްޕް
ޑޮނަލްޑް ޓްރަމްޕް ރަސްމިއްޔާތެއްގައި ވާހަކަފުޅު ދައްކަވަނީ
އެމެރިކާގެ ޑްރޯން ވައްޓާލި މައްސަލައިގައި ރައްދުގައި ހަމަލާ ދޭން ނިންމުމަށް ފަހު، އެ ނިންމުން ފަހު ވަގުތު ބަދަލުކުރީ 150 މީހުން މަރުވާނެކަމަށް ބުނުމުން ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ހުކުރު ދުވަހު ކުރެއްވި ޓްވީޓެއްގައި ޓްރަމްޕް ވިދާޅުވީ، ހަމަލާތައް ހުއްޓުވީ ހަމަލާދޭން ނިންމާފައިވާ ތަންތަނަށް ހަމަލާދޭން ދިހަ މިނިޓަށް ވެފައި ވަނިކޮށް ކަމަށެވެ. ޓްރަމްޕް ބުނީ ބަޔަކު މަރާލާ ގޮތަށް ހަމަލާދިނުމަކީ، މީހަކު ނެތް ޑްރޯނެއް ވައްޓާލުމާ ނުބައްދަލު ރައްދެއް ކަމަށެވެ.
ބުރާސްފަތި ދުވަހު ގެ ވަގުތެއްގައި، އީރާނުން އެމެރިކާގެ ޑްރޯން ވައްޓާލީ އެ ގައުމުގެ ވައިގެ ސަރަހައްދަށް ވަން ކަމަށް ބުނެއެވެ. ނަމަވެސް އެމެރިކާއިން ވަނީ މި ވާހަކަތައް ދޮގުކޮށްފައެވެ. އެމެރިކާއިން ބުނީ ޑްރޯން ދަތުރުކުރަމުން ދިޔައީ ހޮރުމޫޒް ކަނޑުއޮޅިއާ ދިމާލުން ބައިނަލްއަގްވާމީ ވައިގެ ސަރަހައްދުގައި ކަމަށެވެ.
ހަމަލާނުދިން ކަމުގައިވީ ނަމަވެސް، ޓްރަމްޕް ވަނީ މިހާރު އަޅާފައިވާ އިގްތިސާދީ ދަތިކުރުމުގެ ފިޔަވަޅުތައް އިތުރުކުރާނެ ކަމަށް ވިދާޅުވެފައެވެ. އަދި ޓްރަމްޕް ވިދާޅުވީ، އީރާނަށް ދުވަހަކުވެސް ނިއުކްލިއަރ ހަތިޔާރު ނުގެންގުޅެވޭޏެ ކަމަށެވެ.
އިރާނު މައްސަލައާއި ގުޅިގެން އދ.ގެ ސަލާމަތީ މަޖިލީހުގެ ކުއްލި ބައްދަލުވުމެއް ހޯމަ ދުވަހު ބޭއްވުމަށް އެމެރިކާއިން އެދިފައިވާ ކަމަށް ރޮއިޓާރޒް އިން ރިޕޯޓްކޮށްފައިވެއެވެ.
ދެ ގައުމުގެ ގުޅުން ގޯސްވެގެން ގޮސްފައި ވަނީ ރައީސް ބަރަކް އޮބާމާގެ ދައުރުގައި ދުނިޔޭގެ ބާރުތަކާއި އިރާނާ ދެމެދު ވެވުނު އެއްބަސްވުން، ރައީސް ޓްރަމްޕް އުވާލަން ނިންމުމާއި ގުޅިގެންނެވެ. އެގޮތުން މިދިޔަ އަހަރު އެ ނިއުކްލިއަރ އެއްބަސްވުމުން އެމެރިކާ ވަކިވުމާއި އެކު ދެ ގައުމުގެ ގުޅުން ވަނީ ވަރަށް ބޮޑަށް ހީނަރުވެގެން ގޮސްފައެވެ.
