މިނިވަން މުއައްސަސާތަކަކީ ސަރުކަރު ހިންގަން ހުންނަވާ ވެރިއަކަށް ބަލައިގެން މަސައްކަތް ކުރަން ޖެހޭ މުއައްސަސާތަކެއްނޫން: މެމްބަރު ޖީހާން
21 ޖޫން 2019 | ހުކުރު 04:26މިނިވަން މުއައްސަސާތަކަކީ ބޮޑެތި ބާރުތަކެއް ލިބިފައިވާ މުއައްސަސާތަކެއް
ހިންނަވަރު ދާއިރާގެ މެމްބަރު ޖީހާން މަހްމޫދު
މިނިވަން މުއައްސަސާތަކަކީ ސަރުކަރު ހިންގަން އެއިރެއްގައި ހުންނަވާ ވެރިއަކަށް ބަލައިގެން މަސައްކަތް ކުރަން ޖެހޭ ތަންތަން ނޫން ކަމަށް ހިންނަވަރު ދާއިރާގެ މެމްބަރު ޖީހާން މަހްމޫދު ވިދާޅުވެއްޖެއެވެ.
ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަ ދައްކަވަމުން ޖީހާން ވިދާޅުވީ, މިނިވަން މުއައްސަސާތަކަކީ ވަރަށްބޮޑެތި ބާރުތަކަކާއި ގެރެންޓީތަކެއް ދީފައިވާ މުއްސަސާތަކެއް ކަމަށާއި, ނަމަވެސް ވޭތިވެ ދިޔަ ދުވަސްތަކުގައި މިނިވަން މުއްސަސާތަކުގެ ގާނޫނީ ޒިންމާ އޭގެ އެންމެ އެދެވޭގޮތުގައި އަދާކޮށްފައި ނުވާ ކަމަށެވެ. އަދި މިކަން ކަމަކީ އޭގެ ސަބަބުން ރައްޔިތުންގެ ވަރަށް ބޮޑެތި ކަންބޮޑުވުން ތަކަކާއި ޝަކުވާތަކެއް އެ މުއްސަސާ ތަކާއި ކުރިމަތި ކުރުވި ކަންކަން ކަމަށް ޖީހާން ވިދާޅުވިއެވެ.
19 ވަނަ ރައްޔިތުންގެ މަޖިލީހުގެ އިންސާނީ ހައްގުތަކާއި ބެހޭ ކޮމެޓީގެ މުގައްރިރު ކަންވެސް ކުރަށްވާ ޖީހާން ވިދާޅުވީ، ކުރިއަށް އޮތް ހަފްތާގެ ތެރޭގައި ހިއުމަން ރައިޓްސް ކޮމިޝަން މަޖިލީހަށް ހާޒިރުކޮށް ފާއިތުވެ ދިޔަ ދުވަސްތަކުގައި ކަންކަން ހިގާފައިވާ ގޮތާއި ގުޅޭގޮތުން ސުވާލު ކުރެވޭނެ ކަމަށް އުއްމީދު ކުރައްވާ ކަމަށެވެ.
ރާއްޖޭގެ ޖުޑިޝަރީ މިހާރު އޮތް ހާލަތަށް އަލިއަޅުވާލައްވާ ޕްރޮގްރާމްގައި ވާހަކަ ދައްކަވަމުން ޖީހާން ވިދާޅުވީ، އިންސާފް ވެރި ފަނޑިޔާރުގެއެއްގެ އެންމެ މުހިންމު ސިފަޔަކީ ވަކި ފަރާތަތަކަށް ނުޖެހި މިނިވަން ކަމާއި އެކު މަސައްކަތް ކުރާ ތަނަކަށް ވުން ކަމަށާއި ދެވަނަ ކަމަކީ އެމަސައްކަތް ތައް ކުރުމަށް އެތަނަކީ ގާބިލު ތަނަކަށް ވުން ކަމަށެވެ.
މީގެއިތުރުން ޖުޑިޝަރީ ކޮމެޓީގެ މެމްބަރުކަންވެސް ކުރަށްވާ ޖީހާން ވިދާޅުވީ، ވޭތިވެ ދިޔަ ދުވަސްތަކުގައި ޖޭއެސްސީ ކޮމެޓީއަށް ހާޒިރުކޮށް މައުލޫމާތު ހޯދުމުގެ ތެރޭގައި ސާފްވެގެން ދިޔަ އެއްކަމަކީ ސީދާ ގޮތުން ސްޕްރީމް ކޯޓްގެ ނުފޫޒް ޖޭއެސްސީއަށް އޮތް މިންވަރުކަމަށެވެ.
އިތުރަށް ޖީހާން ވިދާޅުވީ، ރާއްޖޭގެ ކޯޓްތަކުން އިންސާފް ނުލިބޭ ވާހަކަ މީގެ ކުރިން އިވެނީ މީހުންގެ ތުންތުން މަތިން ކަމަށާއި، ނަމަވެސް މިއަދު ޖޭއެސްސީން މިނިވަން ކަމާއި އެކު މަސައްކަތް ކޮށް އަދި ރައްޔިތުންގެ މަޖިލީހުން އެކަންކަމާއި ދެކޮޅަށް ތެދުވެ މަސައްކަތްތައް ކުރަން ފެށީމަ ކޯޓްތަކުންނާއި އެކޯޓްތަކުގެ ފަނޑިޔާރުން ކުރަށްވާފައިވާ މުޑުދާރު އަމަލްތައް ލޯމަތިން ފެނި ހާމަ ވެއްޖެ ކަމަށެވެ.
