ރައްޔިތުންގެ މަޖިލީހުގެ ރައީސް މުހައްމަދު ނަޝީދު, ލަންކާގެ ގާނޫނު ހަދާ މަޖިލީހުގެ ރައީސް ކަރަ ޖަޔަސޫރިޔާ އާއި ބައްދަލުކުރައްވައިފިއެވެ. މި ބައްދަލުކުރެއްވުން އޮތީ ކަރޫ ޖަޔަސޫރިޔާގެ ރަސްމީ ގެކޮޅުގައެވެ.
ޖަޔަސޫރިޔާ ވަނީ ލަންކާ ގާނޫނު ހަދާ މަޖިލީހުގައި އެ މަނިކުފާނު ކުރައްވަމުން ގެންދަވާ ތަޖުރިބާ ރައީސް ނަޝީދާއި، އެމްޑީޕީގެ ޕާލަމެންްޓްރީ ގްރޫޕް މެމްބަރުންނާއި ހިއްސާ ކުރައްވާފައެވެ. ރައީސް ނަޝީދާއި އެކުގައި މި ބައްދަލުކުރެއްވުމުގައި ރައްޔިތުންގެ މަޖިލީހުގެ ނައިބް ރައީސް އީވާ އަބްދުﷲ އާއި, އެމްޑީޕީ ޕާލަމެންޓްރީ ގްރޫޕްގެ މެމްބަރުން ބައިވެރިވެ ވަޑައިގެންނެވިއެވެ.
ރައީސް ނަޝީދާއި، އެމްޑީޕީ ޕާލަމެންޓްރީ ގްރޫޕް މެމްބަރުންނާއި, ގައުމީ މަޖިލިސްގެ މެމްބަރުން ސްރީލަންކާ އަށް 3 ދުވަހުގެ ދަތުރުފުޅެއް ކުރައްވަނީ، އެޕްރީލް މަހުގެ 21 ވަނަ ދުވަހު ލަންކާއަށް ދިން ޓެރަރިސްޓް ހަމަލާއަށްފަހު، އެ ގައުމަކީ އަމާންތަނެއްކަން މުޅި ދުނިޔެއަށް ހާމަކޮށް ދެއްވުމުގެ ގޮތުންނެވެ. ރައީސް ނަޝީދާއި އެކުގައި ލަންކާއަށް ވަޑައިގެންނެވި ވަފްދުގެ ޝަރަފުގައި ލަންކާގެ ބޮޑު ވަޒީރު ރަނިލް ވިކްރަމަސިންހަ ވަނީ ރޭގަނޑުގެ ފަރިއްކޮޅެއް ދެއްވާފައެވެ.
ބޮޑު ވަޒީރު ވިދާޅުވީ ލަންކާ އަކީ އަމާންތަނެއްކަން ދުނިޔެއަށް ހާމަކޮށް ދެއްވުމުގެ ގޮތުން ރާއްޖެއިން ޓީމެއް ވަޑައިގެންވުމުން، އިތުރު ހިތްވަރެއް ލިބިގެން ހިނގައްޖެ ކަމަށެވެ. ރާއްޖެ އާއި ލަންކާއަކީ އަބަދުވެސް ވަރަށް ގާތްގުޅުމެއް އޮންނަ ގައުމެއްކަން ބޮޑު ވަޒީރު ވަނީ ފާހަގަކުރައްވާފައެވެ.
ރައީސް ނަޝީދާއި އެ މަނިކުފާނުގެ ޓީމް ލަންކާއަށް ކުރައްވާ މި ދަތުރުފުޅު ނިންމަވާލެއްވުމަށްފަހު، އެބުރި ރާއްޖެ ވަޑައިގަންނަވާނީ އާދީއްތަ ދުވަހުގެ ރޭގަނޑުގެ ވަގުތެއްގައެވެ.
