އައްޑޫ ސިޓީގައި މަތީތައުލީމު ދިނުމަށް އިންސްޓިޓިއުޓެއް ގާއިމުކުރުމަށް ބޭނުންވާ ފަރާތްތަކަށް ފުރުސަތު ހުޅުވާލައިފިއެވެ.

އައްޑޫ ކައުންސިލުން ބުނީ އައްޑޫގެ ތަރައްގީގެ ޕްލޭންގައިވާ ތައުލީމީ ސިޔާސަތު ހާސިލްކުރުމަށް މަސައްކަތް ކުރުމަށް، އޭޕްރީލް 29 ވަނަ ދުވަހު އޮތް ކައުންސިލްގެ 91 ވަނަ ބައްދަލުވުމުން ނިންމަވާފައިވާ ކަމަށެވެ.

މިސިޔާސަތު ތަންފީޒު ކުރުމުގެ ގޮތުން އައްޑޫގައި މަތީ ތައުލީމު ދިނުމަށް އިންސްޓިޓިއުޝަން ގާއިމުކުރުމަށް ޝައުގުވެރިވާ ފަރާތްތަކަށް އެކަމަށް ބޭނުންވާ ބިން ކައުންސިލުން ހަމަޖައްސައިދޭ ގޮތަށް ނިންމާފައިވާ ކަމަށް ކައުންސިލުން ބުންޏެވެ.

އައްޑޫ ކައުންސިލުން ބުނީ މިކަމަށް ޝައުގުވެރިވާ ފަރާތްތަކަށް ބިޑް ވިއްކުން އޮންނާނީ ޖޫން 17 އިން 23 އަށް ކޮންމެ ދުވަހެއްގެ ހެނދުނު 10:00ން ފެށިގެން މެންދުރު 12:00އާއި ހަމަޔަށް އައްޑޫ ސިޓީ ކައުންސިލްގެ އިދާރާގައި ކަމަށެވެ.

ބިޑް ޑޮކިއުމެންޓެއްގެ އަގަކީ 300.00ރ (ތިންސަތޭކަ ރުފިޔާ) އެވެ. ބިޑް ބަލައިގަތުން އޮންނާނީ ޖޫން 30 ވަނަ ދުވަހު މެންދުރު 11 ޖަހާއިރު ކައުންސިލްގެ އިދާރާގައެވެ.

މީގެ އިތުރުން ކައުންސިލުން ބުނީ ބިން ޙަވާލުކުރެވޭ އުސޫލާއި، އަދި ހުށަހެޅޭ ބިޑްތައް އިވެލުއޭޓްކޮށް މާރކްސް ދެވޭނެގޮތުގެ ތަފްސީލް ޑޮކިއުމަންޓުގައި ހިމެނިފައިވާ ކަމަށެވެ.

މި މަސައްކަތަށް ދޫކުރުމަށް ހަމަޖެހިފައި ވަނީ 5 ހާސް އަކަފުޓްގެ 2 ބިން (ޕްލޮޓް1)، 10 ހާސް އަކަފޫޓްގެ 1 ބިން (ޕްލޮޓް 2)، 25 ހާސް އަކަފޫޓްގެ 1 ބިން (ޕްލޮޓް 3) އެކެވެ.