ސްރީލަންކާގައި އެއްވެސް ނުރައްކަލެއް ނެތް ކަމަށާއި، ހުރިހާ ފަރާތްތަކުންވެސް ސްރީލަންކާއަށް ޒިޔާރަތް ކުރެއްވުމަށް ރައީސް ނަޝީދު ގޮވާލައްވައިފިއެވެ.
ރައްޔިތުންގެ މަޖިލީހުގެ ރައީސް ކަމަށް އިންތިޚާބުވެ ވަޑައިގެންނެވި ފަހުން، ފުރަތަމަ ފަހަރަށް ލަންކާއަށް ވަޑައިގަތުމަށްފަހު ބަންޑާރަނައިކް އިންޓަރނޭޝަނަލް އެއަރޕޯޓްގައި ހުންނަވާ ލަންކާގެ މީޑިޔާތަކައް ދެއްވި އިންޓަރވިއުއެއްގައި ރައީސް ނަޝީދު ވިދާޅުވީ ސްރީލަންކާގައި އެއްވެސް ނުރައްކަލެއް ނެތް ކަމަށާއި، ހުރިހާ އެންމެންވެސް ލަންކާއަށް ޒިޔާރަތް ކުރައްވަންވީ ކަމަށެވެ.
ރައީސް ނަޝީދު ވިދާޅުވީ، އެ މަނިކުފާނުގެ މި ދަތުރުފުޅަކީ ލަންކާގެ ރައްޔިތުންނާއިއެކު ދިވެހިންވާކަން ހާމަކޮށްދެއްވުމުގެ ގޮތުން ކުރައްވާ ދަތުރުފުޅެއް ކަމަށެވެ.
ސްރީލަންކާއަކީ އެމްޑީޕީގެ އިތުރުން ރާއްޖޭގެ އެހެން ސިޔާސީ ޕާޓީތަކައް އެތަކެއް ގޮތުން އެހީވެދީފައިވާ ގައުމެއްކަން ރައީސް ނަޝީދު ވަނީ ފާހަގަކޮށްފައެވެ. ރައީސް ނަޝީދު ވިދާޅުވީ ރައީސް ޔާމީންގެ ސަރުކާރުގައި އެމަނިކުފާނު ގައުމުން ބޭރުގައި އަރުވާލެވިގެން ހުންނެވި ދުވަސްވަރު ލަންކާއިން އެމަނިކުފާނަށާއި، އެމްޕީޑީގެ އިސް ފަރާތްތަކައް ހިމާޔަތާއި ރައްކާތެރިކަން ދީފައިވާ ކަމަށެވެ.
ރައީސް ނަޝީދު ވިދާޅުވީ ރާއްޖޭގެ ޑިމޮކްރަސީ ހަރުދަނާ ކުރުމަށާއި، ސިޔާސީ ހަމަޖެހުން ގެނައުމަށް ސްރީލަންކާއިން އަބަދު ވެސް އެހީތެރިކަން ފޯރުކޮށްދެމުން އަންނަ ކަމަށެވެ.
ލަންކާއަށް ދިމާވާ ކޮންމެ ހިތާމަވެރި ހާލަތެއްގައި ދިވެހިރާއްޖެއާއި އެމްޑީޕީ އަބަދުވެސް އޮންނާނީ ލަންކާއާ އެކުގައި ކަމަށާއި، މިދިޔަ އޭޕްރީލް މަހުގެ 21 ވަނަ ދުވަހު ލަންކާއަށް ދިން ބޮމުގެ ހަމަލާތަކާ ގުޅިގެން، ގައުމުގެ ސަލާމަތީ ކަންކަން ކަމާބެހޭ މުއައްސަސާތަކުން، އެ މުއައްސަސާތަކުގެ ރޯލު ވަރަށް ރަނގަޅަށް އަދާކޮށްފައިވާ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ލަންކާއަށް ކުރައްވާ 3 ދުވަހުގެ ދަތުރުފުޅުގައި އެ މަނިކުފާނާއި އެކު މަޖިލީހުގެ ނައިބް ރައީސް އީވާ އަބްދުﷲ އާއި، އެމްޑީޕީގެ ޕާލަމެންޓްރީ ގްރޫޕް މެމްބަރުންނާއި، ގައުމީ މަޖިލިސް މެމްބަރުންނާއި ކެބިނެޓް ވަޒީރުން ބައިވެރިވެވަޑައިގަންނަވައެވެ.
ރައީސް ނަޝީދުގެ މި ދަތުރުފުޅުގައި އެމްޑީޕީގެ ޕާލަމެންޓްރީ ގްރޫޕް މެމްބަރުންނާއި، ކެބިނެޓް ވަޒީރުންނާއެކު އެ މަނިކުފާނު ދެއްވާ ޕްރެސް ކޮންފަރެންސެއް ސިނަމަން ގްރޭންޑް ހޮޓެލްގައި ހޮނިހިރު ދުވަހު އޮންނާނެއެވެ.
ރައީސް ނަޝީދާއި، އެމްޑީޕީގެ ޓީމަށް ސްރީލަންކާގެ ބޮޑު ވަޒީރު ރަނިލް ވިކްރަމަސިންހަ ރޭގަނޑުގެ ފަރިއްކޮޅެއް ދެއްވުމަށް ވަނީ ހަމަޖެހިފައެވެ. މި ފަރިއްކޮޅު އޮތީ ހޮނިހިރު ދުވަހުގެ ރޭ ޓެމްޕަލް ޓްރީ ހައުސްގައެވެ.
ރައީސް ނަޝީދާއި އެމްޑީޕީގެ ޓީމް ލަންކާއަށް ކުރައްވާ ދަތުރުފުޅުގައި އެ ގައުމުގެ ޕާލަމެންޓްގެ ރައީސް ޖަޔަސޫރިޔާ އާއި ބައްދަލުކުރެއްވުމަށް ވަނީ ހަމަޖެހިފައެވެ. މި ބައްދަލުކުރެއްވުން އޮތީ އާދީއްތަ ދުވަހު ޖަޔަސޫރިޔާގެ ރަސްމީ ގެކޮޅުގައެވެ.
