ދާއިމީ ކޮމިޓީތަކުގެ މެންޑޭޓުތައް ވަގުތީ ކޮމިޓީ އިން ނިންމި ގޮތަށް ފާސްކޮށްފި
ވަޒީރުން ކަނޑައެޅުމުގެ ކުރިން ތަސައްވުރާ ބެހޭ ގޮތުން ސުވާލު ކުރާނެ
ރައްޔިތުންގެ މަޖިލިސް
ދާއިމީ ކޮމިޓީތަކުގެ މެންޑޭޓްތައް ވަގުތީ ކޮމިޓީ އިން ނިންމި ގޮތަށް ރައްޔިތުންގެ މަޖިލީހުން ފާސްކޮށްފިއެވެ.
އެ ހުށަހެޅުން ފާސްކުރުމަށް އަންގާރަ ދުވަހު ނެގި ވޯޓުގައި، އެ ހުށަހެޅުން ފާސްވީ، ވޯޓުގައި ބައިވެރިވެވަޑައިގަތް 80 މެންބަރުންގެ އިއްތިފާގުންނެއެވެ.
މަޖިލީހުގައި ހިމެނޭ ދާއިމީ 16 ކޮމިޓީތައް:
މާލިއްޔަތު ކޮމިޓީ
އިގްތިސާދީ ކޮމިޓީ
މިނިވަން މުއައްސަސާތަކުގެ ކޮމިޓީ
ގައުމީ ސަލާމަތާއި ޚާރިޖީ ގުޅުންތަކުގެ ކޮމިޓީ
ސްޓޭޓް އޯންޑް އެންޓަޕްރައިޒަސް ކޮމިޓީ
ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީ
ޖުޑިޝަރީ ކޮމިޓީ
އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީ
ހިއުމަން ރައިޓްސް އެންޑް ޖެންޑަ ކޮމިޓީ
އިމްތިޔާޒް އަދި ސުލޫކު ކޮމިޓީ
ގަވައިދު ކޮމިޓީ
ލާމަރުކަޒީ ކޮމިޓީ
އާންމު ކޮމިޓީ
އިޖުތިމާއީ ކޮމިޓީ
ގައުމީ ތަރައްގީއާ ތަރިކައިގެ ކޮމިޓީ
ޕެޓިޝަން ކޮމިޓީ
ދާއިމީ ކޮމިޓީތަކުގެ މެންޑޭޓުތައް ކަނޑައަޅައި ފާސްކުރި އިރު ކޮމިޓީތަކަށް ވަނީ ބޮޑެތި ބާރުތަކެއް ދީފައެވެ.
އެ ގޮތުން ކޯޓުތަކާއި ފަނޑިޔާރުންގެ މައްސަލަތައް ފިޔަވައި، ޝަރުއީ ދާއިރާއާ ގުޅުން ހުރި އެހެނިހެން ކަންކަން ބެލުމުގެ ބާރު ރައްޔިތުންގެ މަޖިލިހުގެ ޖުޑިޝަރީ ކޮމިޓީއަށް ވަނީ ދީފައެވެ. ޖުޑީޝަރީ ކޮމިޓީގެ މަސްއޫލިއްޔަތުތަކުގެ ތެރޭގައި ޖުޑިޝަލް ސާވިސް ކޮމިޝަން (ޖޭއެސްސީ) އާއި ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އާއި ޕްރޮސެކިއުޓާ ޖެނެރަލް (ޕީޖީ) އޮފީހާއި އެޓާނީ ޖެނެރަލް (އޭޖީ) އޮފީހާއި، ވަޒީފާއާ ބެހޭ ޓްރައިބިއުނަލް އާއި މޯލްޑިވްސް އާބިޓްރޭޝަން ސެންޓަރުގެ ކަންކަން ބެލުމާއި އެ ނޫން ވެސް ޝަރުއީ ދާއިރާއާ ގުޅޭ ކަންކަން އެކޮމިޓީގެ މަސްއޫލިއްޔަތުތަކުގެ ތެރޭގައި ވަނީ ހިމަނާފައެވެ.
ލާމަރުކަޒީ ކޮމިޓީއެއް އުފައްދައި އެ ކޮމިޓީގެ މަސްއޫލިއްޔަތުތަކުގެ ތެރޭގައި ހިމެނޭ މުއައްސަސާތަކަކީ ލޯކަލް ގަވަރމަންޓް އޮތޯރިޓީ އާއި ސިޓީ ކައުންސިލްތަކާއި އަތޮޅު ކައުންސިލްތަކާއި، ރަށު ކައުންސިލް ތައް ކަމަށް ވަނީ ކަނޑައަޅާފައެވެ. އެކޮމިޓީގެ މަސްއޫލިއްޔަތު ތަކުގެ ތެރޭގައި އެލްޖީއޭއަށް އައްޔަން ކުރެވޭ ފަރާތްތަކާއި އެކޮމިޓީއިން އިންޓަވިއު ކުރުމާއި ލާމަރުކަޒީ އުސޫލުން ކަންކަން ހިންގުމަށް އިންތިޚާބު ކުރެވޭ ކައުންސިލްތަކުގެ މަސްއޫލިއްޔަތައް ވަނީ ހިމަނާފައެވެ.
ވަޒީރުން ކަޑައެޅުމުގެ ކުރިން ސުވާލު ކުރަންޖެހޭ ގޮތަށް ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ވަނީ ބާރުތައް ދީފައެވެ.
އެގޮތުން އެކޮމިޓީގެ އުސޫލުގެ ތެރެއިން ވަޒީރުން ކަނޑައެޅުމުގެ ކުރިން މަޖިލީހުގެ ކޮމިޓީއަށް ހާޒިރު ކޮށް އޭނާއާއި ސުވާލުކުރެވޭނެ ގޮތެއް އޮންނަން ވާނެކަމަށް މަސްއޫލިއްޔަތު ތަކުގެ ތެރޭގައި ހިމެނެއެވެ. އޭނާ އެމަގާމަށް ގާބިލުތޯ އެ ކޮމިޓީއިން ނިންމުމަށް ފަހު ރުހުން ހޯދުމަށް މަޖިލީހުގެ ތަޅުމަށް ފޮނުވަން ޖެހޭ ގޮތަށް ވަނީ ބަދަލު ކޮށްފައެވެ. ވަޒީރުންނަށް ރުހުން ދޭންޖެހޭ މައްސަލަތަކުގައި އެ މަގާމަކަށް އެ މީހަކު ގާބިލުކަން ނުވަތަ ނޫންކަން، އެ މަގާމަކާ ގުޅޭ މައުލޫމާތު އެ މީހަކަށް ލިބިގެން ވާކަން ނުވަތަ ނޫންކަން، އެ ދާއިރާ އާއި ގުޅޭ ގޮތުން އެއްވެސް ތަޖުރިބާއެއް ހުރިކަން ނުވަތަ ނޫންކަން، އެ ދާއިރާއެއް ކުރި އެރުވުމަށްޓަކައި އޮތް އާންމު ތަސައްވުރާ ބެހޭ ގޮތުން ކޮމިޓީގެ މަރުހަލާގައި ސުވާލު ކުރަން ޖެހޭނެ ކަމަށް އެ ކޮމިޓީގެ މަސްއޫލިއްޔަތުތަކުގެ ތެރޭގައި ވަނީ ހިމަނާފައެވެ. އަދި އެއީ ރައްޔިތުންގެ މަޖިލީހުގެ ކޮމިޓީ އިން ކަނޑައަޅާ އުސޫލުތަކެއްގެ މަތިން ވަޒީރެއްގެ ޒާތީ މައުލޫމާތާއި ފަންނީ މައުލޫމާތު ހޯދުމަށް ކަމަށް ވެސް އެ ކޮމިޓީގެ މަސްއޫލިއްޔަތުތަކުގެ ތެރޭގައި ވަނީ ހިމަނާފައެވެ.
މަޖިލީހުން އަލަށް ހެދި ހިއުމަން ރައިޓްސް އެންޑް ޖެންޑަ ކޮމިޓީ އާއި އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީ އާއި ސްޓޭޓް އޯން އެންޓަޕްރައިސަސް ކޮމިޓީގެ އުސޫލު ހިމެނޭ ގޮތަށް 16 ކޮމިޓީގެ މަސްއޫލިއްޔަތުތައް ހިމަނައި އެކޮމިޓީތަކަށް ވަނީ ބާރު ދީފައެވެ.
