މަޖިލީހުގެ ނައިބު ރައީސް ކަމަށް އިންތިޚާބު ވެވަޑައިގެންނެވި ފަހުން ފުރަތަމަ ފަހަރަށް ގަލޮޅު އުތުރު ދާއިރާގެ މެމްބަރު އީވާ އަބްދުﷲ ރިޔާސަތު ބަލަހައްޓަވައިފިއެވެ.

މަޖިލީހުގެ ރައީސް ނެތް ހާލަތެއްގައި މަޖިލީހުގެ ރިޔާސަތު ބަލަހައްޓަވާނީ މަޖިލީހުގެ ނައިބު ރައީސްއެވެ.

އީވާ ރިޔާސަތު ބަލަހައްޓަވާފައި ވަނީ ގާނޫނީ ފަންނުވެރިންގެ ހިދުމަތުގެ ބިލްގެ ބަހުސް މަރްހަލާގައެވެ. އީވާ ވަނީ ގާތްގަނޑަކަށް ބައި ގަޑިއިރެއްހާއިރު ރިޔާސަތު ބަލަހައްޓަވާފައެވެ. މިއީ ފަހުގެ ތާރީހެއްގައި މަޖިލީހުގެ ރިޔާސަތު އަންހެން މެންބަރަކު ބެލެހެއްޓެވި ފުރަތަމަ ފަހަރެވެ.

ފެހި ގާނޫނު އަސާސީއަސް އަމަލުކުރަން ފެށިފަހުން މަޖިލީހުގެ ރިޔާސަތު ބެލެހެއްޓެވި ދެވަނަ އަންހެން ކަނބަލަކަށް އީވާ ވަނީ ވެގެން ގޮސްފައެވެ.

އީވާއަކީ 17 ވަނަ ރައްޔިތުންގެ މަޖިލީހުން ފެށިގެން ގަލޮޅު އުތުރު ދާއިރާގެ މެމްބަރުކަން ކުރައްވާ މެމްބަރެވެ. އީވާ ފާހަގަވެގެން ގޮސްފައި ވަނީ ހަމަހަމަ ކަމާއި އިންސާފު ހޯދުމުގައި މަޖިލީހުގައި ވަރަށް ބޮޑަށް ބަހުސްކުރައްވާ މެމްބަރެއްގެ ގޮތުގައެވެ.

އީވާގެ ކުރިން އަންހެން ކަނބަލެއްގެ ގޮތުގައި މަޖިލީހުގެ ރިޔާސަތު ބަލަހައްޓަވާފައިވާ އަންހެން މެންބަރަކީ 2008 ވަނަ އަހަރު އަމަލުކުރަން ފެށި އާ ގާނޫނު އަސާސީއާ އެކު އައި އިންތިގާލީ މަޖިލީހުގެ ނައިބު ރައީސްއަކަށް ސިއްރު ވޯޓަކުން ހޮވިވަޑައިގެންނެވި އަނީސާ އަހުމަދެވެ.