ޖަލުތަކުގެ އަދަދު މަދުކޮށް، މައި އެއް ޖަލު ބެހެއްޓުމަށް ސަލީމް ގޮވާލައްވައިފި
ޖަލުތަކުގެ ރިޕޯޓަށް ތިން ހުށަހެޅުމެއް ސަލީމް ވަނީ ހުށަހަޅުއްވާފައި
ހޯރަފުށީ ދާއިރާގެ މެމްބަރު އަހްމަދު ސަލީމް
ރާއްޖޭގައި ހުރި ޖަލުތަކުގެ އަދަދު މަދުކޮށް މައި އެއް ޖަލު ބެހެއްޓުމަށް ފަހު، ދެން ހުރި ޖަލުތައް އުވާލަން ހޯރަފުށީ ދާއިރާގެ މެމްބަރު އަހްމަދު ސަލީމް (ސައްލެ) ގޮވާލައްވައިފިއެވެ.
ޖަލުތަކުގެ އޮޑިޓް ރިޕޯޓަށް ވާހަކަ ދައްކަވަމުން ސަލީމް ވަނީ ތިން ހުށަހެޅުމެއް ހުށަހަޅުއްވާފައެވެ.
ސަލީމް ވަނީ މައާފްދިނުމާއި އަދަބު ލުއިކުރުމުގެ ގާނޫނަށް ގެންނަންޖެހޭ އިސްލާހުތައް ގެނެސްގެން ނަމަވެސް ކޮންމެހެން ޖަލުގައި ބަންދުކުރަންޖެހޭ މީހުން ނޫން އިތުރު މީހުން ނުބައިތިއްބައި ޖަލުތަކަށް ލުޔެއް ހޯދައިދިނުމަށް ހުށަހަޅުއްވާފައެވެ.
ޖަލުތަކުގެ ހިދުމަތަކީ ލާމަރުކަޒު ކުރެވިދާނެ ހިދުމަތެއް ކަން ފާހަގަކުރައްވައި ސަލީމް ވަނީ ފުލުހުންގެ ހިދުމަތްދޭ ކޮންމެ ރަށެއްގައި ކޮންމެހެން އެކަހެރިކޮށް ބައިތިއްބަންޖެހޭ މީހުން ބޭތިއްބޭނެ އިންތިޒާމް ހަމަޖައްސަން ހުށަހަޅުއްވާފައެވެ.
ރާއްޖެއިން ބޭރުގެ ޖަލުތަކުގައި ތިބި ދިވެހިން އަވަސް މުސްތަގްބަލެއްގައި ރާއްޖެ ގެނައުމަށް ވެސް ސަލީމް ވަނީ ގޮވާލައްވާފައެވެ.
ސަލީމް ވިދާޅުވީ ޖަލުތަކުގެ އޮޑިޓް ރިޕޯޓުން ގިނަ ކަންތައްތަކެއް ހާމަވެގެން ގޮސްފައިވާ ކަމަށެވެ. އެގޮތުން ޖަލުތަކުގައި ކާންބޯން ދިނުމުގެ އިތުރުން، ބޭސްފަރުވާ ދިނުމުގައި ވެސް އިހްމާލްވެފައިވާ ކަން ރިޕޯޓްގައި ފާހަގަކޮށްފައިވާ ކަމަށް ސަލީމް ވިދާޅުވިއެވެ.
ބޭސްފަރުވާގެ ހިދުމަތް ދިނުމުގައި އިހްމާލްވެފައިވާއިރު، ނިދާ ފެންވަރާއި އަސާސީ ހިދުމަތް ދިނުމުގައި އިހްމާލްވެފައިވާކަން ޖަލުތަކުގެ އޮޑިޓް ރިޕޯޓުން ފާހަގަވެފައިވާ ކަމަށް ސަލީމް ވިދާޅުވިއެވެ. ޖަލުތަކުގައި ބަންދުކޮށްފައި ތިބި ފަރާތްތަކުގެ މެދުގައި ތަފާތު ކުރުންތައް ގެންގުޅެފައިވާކަން ސަލީމް ވަނީ ފާހަގަކުރައްވާފައެވެ.
ޖަލުތަކުގެ މުޅި އޮޑިޓް ރިޕޯޓް ސިއްރުނުކޮށް ރައްޔިތުންނަށް ހާމަކޮށްދެއްވުމަށް ސަލީމް ވަނީ ގޮވާލައްވާފައެވެ. ސަލީމް ވިދާޅުވީ ކަންތައް އިސްލާހު ކުރަން ބޭނުން ނަމަ، އެކަންތައްތައް ރައްޔިތުންނަށް ހާމަކޮށްދޭންޖެހޭ ކަމަށެވެ.
