ފުލުހުންނާ ފިލަން ކަނޑަށް ފުންމާލި މީހާ ހޯދައިފި
10 ޖޫން 2019 | ހޯމަ 05:27ފެނިފައިވަނީ މާވާރަލު ވަލުތެރޭގައި ފިލާ އޮއްވާ
ފުންމާލީ މާވާރަލު ކައިރިއަށް
ފުލުހުންނަށް ފިލަންވެގެން އާދިއްތަ ދުވަހުގެ ރޭ ކަނޑަށް ފުންމާލި މީހާ ހޯދައިފިއެވެ.
ކަނޑަށް ފުންމާލި މީހާއަކީ ގދ. ތިނަދޫ އިން ފުރައިގެން ގއ. ކަނޑުހުޅުދޫ އަށް ދިޔަ ފެރީއަކުން މަސްތުވާތަކެތި ހިފައިގެން އައި ކަމަށް ޝައްކު ކުރެވޭ މީހެއް ކަމަށް ފުލުހުން މައުލޫމާތު ދީފައި ވެއެވެ.
އެ މީހާ ފެނިފައި ވަނީ މާވާރަލު ވަލުތެރޭގައި ފިލާ އޮއްވާ ހޯމަ ދުވަހު ހެނދުނު ކަމަށް ފުލުހުން ބުނެފައި ވެއެވެ. އަދި އޭނާގެ އަތުން އެއްވެސް އެއްޗެއް ފެނިފައި ނުވާ ކަމަށް ވެސް ފުލުހުން ބުނެފައި ވެއެވެ.
ކަނޑުހުޅުދޫ އަށް ދިޔަ ފެރީއަކުން މަސްތުވާތަކެތި ހިފައިގެން މީހަކު އަންނަ ކަމުގެ މައުލޫމާތު ފުލުހުންނަށް ލިބުމާ ގުޅިގެން އެ ރަށުގައި ފުލުހުން ހަރަކާތްތެރިވާކަން އެނގިގެން އެރަށު ކައިރީގައި އޮންނަ މާވާރަލު ކައިރިއަށް މޫދަށް އޭނާ ވަނީ ފުންމާލާފައެވެ. އަދި އޭނާ ހޯދަން ބޮއްކޮރައެއްގައި ނުކުމެ އުޅެނިކޮށް އެ ބޮއްކުރާ ބަންޑުން ޖަހާލައިގެން ތިން މީހަކު ވަނީ ކަނޑުވެފައެވެ. ނަމަވެސް އޭގެ ތެރެއިން އެކަކު ފަތާފައި މާވަރުލު އަށް އެރި އިރު އަނެއް ދެ މީހުން ވަނީ ދޯންޏަކުން ނަގާފައެވެ. މި ތިން މީހުންނަކީ ވެސް ފުންމައިލި މީހާއާ ގުޅުން އޮންނަ މީހުން ކަމަށް އެ ރަށުން މައުލޫމާތު ދެއެވެ.
ކަނޑަށް ފުންމާލި މީހާއަކީ 30 އަހަރާއި 35 ދެމެދު އުމުރުގެ މަސްތުވާތަކެތީގެ ރިކޯޑް އޮންނަ މީހެއް ކަމަށް އެ ރަށު ކައުންސިލްގެ ރައީސް އަހްމަދު ޝަހީމް ވިދާޅުވެފައިވެއެވެ.
