މާލޭގައި ނުރައްކާތެރި ދެ އެކްސިޑެންޓެއް ހިނގައިފި
8 ޖޫން 2019 | ހޮނިހިރު 05:43ހިލާލީ މަގުން ނިކުތް މީހާގެ ނިތްކުރި ވަނީ ފަޅައިގެން ގޮސްފަ
އެކްސިޑެންޓްގައި ގެއްލުން ލިބުނު ކާރު
މާލޭގައި ނުރައްކާތެރި ދެ އެކްސިޑެންޓެއް ހިނގައިފިއެވެ.
މި ދެ އެކްސިޑެންޓުތައް ހިނގާފައިވަނީ، ހުކުރު ދުވަހުގެ ރޭ 00:38 ހާއިރު އާއި 02:30 ހާއިރުއެވެ.
މި އެކްސިޑެންޓްތަކުގެ ތެރެއިން ފުރަތަމަ އެކްސިޑެންޓަކީ ދެ ސައިކަލެއް ޖެހިގެން ހިނގި އެކްސިޑެންޓެކެވެ. އެ އެކްސިޑެންޓް ހިނގަފައިވަނީ، ބޮޑުތަކުރުފާނު މަގު ހުޅަނގުން އިރަށް ބާރު ސްޕީޑްގައި ދުއްވާފައި އައި ސައިކަލަކާއި ހިލާލީ މަގުން ނިކުތް ސައިކަލެއް ޖެހިގެން ކަމަށް ފުލުހުން ބުނެފައި ވެއެވެ. އެ ދެ މީހުން އަތުގައި ވެސް ލައިސަންސް އޮތް ކަމަށް ފުލުހުން ބުންޏެވެ.
މީޑިއާ އޮފިޝަލް އިތުރަށް ވިދާޅުވީ، އެކްސިޑެންޓްވި ދެ މީހުންގެ ތެރެއިން ހިލާލީ މަގުން ނިކުތް މީހާގެ ނިތްކުރި ފަޅައިގެން ގޮސްފައިވާ ކަމަށާއި އޭނާއަށް އައިޖީއެމްއެޗްގައި ފަރުވާ ދެމުންދާ ކަމަށެވެ.
ފުލުހުން ބުނީ ދެވަނަ އެކްސިޑެންޓް ހިނގާފައިވަނީ ސިނަމާލެ ބްރިޖުން ހުޅުމާލެ އަށް ދާން އޮންނަ ހައިވޭގައި ދަތުރުކޮށްފައި ދިޔަ ކާރެއްގެ ޓަޔަރު ފަޅައިގެން ދިއުމުގެ ސަބަބުން، އެ ކާރު ކަހާލައިގެން ގޮސް ހައިވޭގައި ހުރި ފެންސްގައި ޖެހި ކަމަށެވެ.
ފުލުހުން ބުނީ އެކްސިޑެންޓްވި ކާރު ދުއްވަން އިން މީހާގެ އަތުގައި ލައިސެންސް އޮތް ކަމަށެވެ. މި އެކްސިޑެންޓްގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށް ފުލުހުން ބުންޏެވެ.
