ޗެލްސީއަށް ކުޅެމުން އައި ބެލްޖިއަމްގެ ކެޕްޓަން 100 މިލިއަން ޔޫރޯގެ އަގަކަށް ރެއާލް މެޑްރިޑަށް ބަދަލުވެއްޖެއެވެ.
ހަޒާޑް ޗެލްސީ ދޫކޮށްލިކަން އޭނާ ވެސް ކަށަވަރުކޮށްދީފައިވާއިރު، ރެއާލް އާއި ޗެލްސީން ވެސް ވަނީ މިކަން ކަށަވަރުކޮށްދީފައެވެ. އޭނާ ރެއާލްއަށް ބަދަލުވީ 2024 ވަނަ އަހަރުގެ ނިޔަލަށެވެ.
ރެއާލްގެ ކުޅުންތެރިއެއްގެ ގޮތުގައި މި މަހުގެ 13 ވަނަ ދުވަހު ހަޒާޑް ދައްކާލުމަށް ހަމަޖެހިފައިވާ ކަމަށް އެ ކްލަބުން ބުނެއެވެ.
ހަޒާޑް ޗެލްސީއަށް ކޮށްދިން ހިދުމަތްތަކަށް ޝުކުރުއަދާކުރަމުން އެ ކްލަބުގެ ބޯޑް އޮފް ޑައިރެކްޓަރ މަރީނާ ގްރަނޮވްސްކައިއާ ވިދާޅުވީ، ރެއާލްއަށް ކުޅުމަކީ ހަޒާޑް އެންމެ ކުޑައިރުއްސުރެ ދެކެމުން އައި ހުވަފެނެއް ކަމަށައި، އޭނާގެ ނިންމުމަށް އިހުތިރާމްކުރާ ކަމަށެވެ.
ފްރާންސްގެ ލިއްލޭ އިން ކެރިޔަރު ފެށި ހަޒާޑް ވަނީ އެ ޓީމަށް ކުޅުނު 194 މެޗުގައި 50 ލަނޑު ކާމިޔާބު ކޮށްފައެވެ. އޭނާ ޗެލްސީއަށް ބަދަލުވީ 2012 ވަނަ އަހަރު އެވެ. އޭނާ ވަނީ ޗެލްސީއަށް މިހާތަނަށް ކުޅުނު 352 މެޗުގައި 110 ލަނޑު ކާމިޔާބު ކޮށްފައެވެ.
ޗެލްސީއާ އެކު ޔޫރޮޕާ ލީގު ދެ ފަހަރު ކާމިޔާބު ކޮށްފައިވާ ހަޒާޑް ވަނީ އެ ޓީމާ އެކު ޕްރިމިއާ ލީގު ދެ ފަހަރު އަދި ފުޓްބޯލް ލީގު ކަޕް ވެސް ކާމިޔާބު ކޮށްފައެވެ. އޭނާ ވަނީ ބެލްޖިއަމް ގައުމީ ޓީމަށް ކުޅުނު 100 މެޗުގައި 30 ލަނޑު ކާމިޔާބު ކޮށްފައެވެ.
