ކޯޓުން ދެ މީހުން ދޫކޮށްލުމުގައި ފުލުހުންގެ ގޯހެއް އުޅޭނަމަ އެކަމެއް ރަނގަޅުކުރާނަން: ސީޕީ
މަސްތުވާތަކެތީގެ ވިޔަފާރި ކުރާ ފަރާތްތަކާ ގާނޫނު އަރާ ހަަމަ ކުރުމަށް ފުލުހުން ކުރަން ޖެހޭ ހުރިހާ މަސައްކަތެއް ކުރާނެ
ކޮމިޝަނަރ އޮފް ޕޮލިސް ހަމީދު
3 ކިލޯގެ މަސްތުވާތަކެއްޗާއެކު ހައްޔަރުކުރި ދެ މީހުން ބަންދުގެ މުއްދަތަށް ހާޒިރުކުރުމުން ކޯޓުން އެ މީހުން ދޫކޮށްލާ މައްސަލާގައި ފުލުހުންގެ ގޯހެއް އުޅޭނަމަ އެކަމެއް ރަނގަޅުކުރާނެކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެ އެވެ.
ފުލުހުންގެ އިންޓަލިޖެންސަށް ލިބުނު މައުލޫމާތަކައި ގުޅިގެން ހުޅުމާލެ ކޯޓުން ނެރުނު ކޯޓު އަމުރެއްގެ ދަށުން ގެޔެއް ބަލާ ފާސްކޮށް، 3 ކިލޯގެ މަސްތުވާތަކެއްޗާއެކު ދެ މީހުން ހައްޔަރުކުރީ މި މަހުގެ 3 ވަނަ ދުވަހުގެރެގެ ދަންވަރުގެ ވަގުތެއްގަ އެވެ. ޖެހިިގެން އައި ދުވަހު އެ މީހުންގެ މުއްދަތު ޖެހުމަށް ކޯޓަށް ގެންދިއުމުން ހުޅުމާލެ ކޯޓުން ފުލުހުންނަށް ދިން އަމުރު ފުރިހަމަނުވާކަމަށް ބުނެ ކްރިމިނަލް ކޯޓުން ވަނީ އެ މީހުންގެ މުއްދަތުޖަހައި ނުދީ ދޫކޮށްލާފަ އެވެ.
އޭގެފަހުން ދެވަނަ ފަހަރަށް އެ މީީހުން ހައްޔަރުކޮށް ބަންދުގެ މުއްދަތުޖެހުމަށް ހުޅުމާލެ ކޯޓަށްވެސް ހާޒިރުކުރި އެވެ. ނަމަވެސް ތަހުޤީޤާއި ހަވާލުވެ ހުރި ފުލުސް މީހާ ހާޒިރުނުވާކަމަށް ބުނެ ކޯޓުން ވަނީ އެ މީހުން ދޫކޮށްލާފަ އެވެ.
ބުރާސްފަތި ދުުވަހު ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓުވީޓެއްގައި ވިދާޅުވީ އެ މައްސަލަ ރިވިއުކުރާނެކަމަށާއި، ރިވިއުކުރާއިރު ފުލުހުންގެ ފަރާތުން ކަމެއް ރަނގަޅު ކުރަން ޖެހޭ ނަމަ އެކަމެއް ކުރައްވާނެ ކަމަށެވެ. އަދި މަސްތުވާތަކެތީގެ ވިޔަފާރި ކުރާ ފަރާތްތަކާ ގާނޫނު އަރާ ހަަމަ ކުރުމަށް ފުލުހުން ކުރަން ޖެހޭ ހުރިހާ މަސައްކަތެއް ކުރާނެ ކަމަށާއި، އެކަމުގެ ޔަޤީންކަން ރައްޔިތުންނަށް އަރުވާކަމަށް ހަމީދު ވިދާޅުވި އެވެ.
ފުލުހުން ހިންގި އެ އޮޕަރޭޝަންގައި ހައްޔަރުކޮށްފައިވަނީ 25 އަހަރުގެ ފިރިހެނަކާއި، 52 އަހަރުގެ އަންހެނެކެވެ.
މި މައްސަލާގައި ކޯޓުތަކުން އަމަލުކުރަމުން އަންނަގޮތާއިމެދު ގިނަ ބައެއްގެ ފާޑުކިޔުންތައް އަންނަނީ ކޯޓުތަކަށް އަމާޒުވަމުންނެވެ.
