ރެއާލް މެޑްރިޑަށް ކުޅެމުން އަންނަ ސްޕެއިންގެ މިޑްފިލްޑަރ އިސްކޯ ހޯދުމަށް ކްލަބްތަކުން ހުށަހަޅާ ހުށަހެޅުންތައް ބަލައިގަންނަން އެ ކްލަބުން ނިންމައިފި ކަމަށް ރިޕޯޓްތައް ބުނެފިއެވެ.

މާސާ އިން ބުނީ ކުރިޔަށް އޮތް ސީޒަނަށް އިސްކޯ ހޯދަން ބޭނުންވާ ކްލަބްތަކުން ހުށަހަޅާ ހުށަހެޅުންތައް ބަލައިގަންނަން ރެއާލުން ނިންމާފައިވާ ކަމަށެވެ.

ނަމަވެސް އެ ނޫހުން ބުނާ ގޮތުން ރެއާލް ދޫކޮށްލަން އިސްކޯ ބޭނުމެއް ނުވެއެވެ. އަދި އެ ކްލަބުގެ ކޯޗު ޒައިނުއްދީން ޒިދާން ވެސް އިސްކޯ ދޫކޮށްލަން ބޭނުންނުވާ ކަމަށް ރިޕޯޓްތައް ބުނެއެވެ.

އިސްކޯ ރެއާލްއާ އެކު ހަދާފައިވާ އެއްބަސްވުން 2017 ވަނަ އަހަރުގެ ސެޕްޓެމްބަރ މަހު ވަނީ އާކޮށްފައެވެ. އެ އެއްބަސްވުމުގެ ދަށުން އޭނާ 2022 ގެ ނިޔަލަށް ކްލަބުގައި މަޑުކުރަން ޖެހޭނެއެވެ.

އުމުރުން 27 އަހަރުގެ އިސްކޯ ހޯދުމަށް ނަން މަޝްހޫރު ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި ޔުވެންޓަސް އާއި މެންޗެސްޓާ ޔުނައިޓެޑު ވެސް ހިމެނެއެވެ.

ވެލެންސިއާ އިން ކެރިއަރު ފެށި އިސްކޯ ވަނީ މަލާގާ އަށް ވެސް ކުޅެފަ އެވެ. އެގޮތުން އޭނާ ވަނީ މަލާގާއާ އެކު ހޭދަކުރި ދެ ސީޒަނުގައި އެ ޓީމަށް ކުޅުނު 82 މެޗުގައި 17 ލަނޑު ކާމިޔާބުކޮށްފައެވެ. މަލާގާ ދޫކޮށްލުމަށް ފަހު އިސްކޯ ރެއާލްއާ ގުޅުނީ 2013 ވަނަ އަހަރެވެ.

އޭނާ ވަނީ އެ ކްލަބުގައި މިހާތަނަށް ހޭދަކުރި ހަތަރު ސީޒަނުގައި ކުޅުނު 277 މެޗުގައި 47 ލަނޑު ކާމިޔާބުކޮށް، ލަލީގާ، ސްޕެނިޝް ސުޕަރ ކަޕް، ޔުއެފާ ޗެމްޕިއަންސް ލީގު ހަތަރު ފަހަރު، ފީފާ ކްލަބް ވާރލްޑްކަޕް ތިން ފަހަރު، ޔުއެފާ ސުޕާ ލީގު ތިން ފަހަރު އަދި ކޮޕާޑެލްރޭ ކާމިޔާބުކޮށްފައެވެ.

ކްލަބް ލެވެލްގައި ގިނަ ކާމިޔާބީތައް ހޯދާފައިވާ އިސްކޯ ވަނީ ސްޕެއިންގެ 21 އަހަރުން ދަށުގެ ޓީމާއެކު ޔޫރޯ ކާމިޔާބުކޮށްފައެވެ. މީގެ އިތުރުން އޭނާ ވަނީ 17 އަހަރުން ދަށުގެ ފީފާ ވާރލްޑްކަޕްގެ ތިން ވަނަ ސްޕެއިންއާ އެކު ކާމިޔާބުކޮށްފައެވެ.