ރާއްޖޭގެ ރައްޔިތުންނަށް ރައީސް ފިތުރު އީދުގެ ތަހުނިޔާ ފޮނުއްވައިފި
އީދު ދުވަހަކީ ސާފު ހިތަކައިގެން އެކަކު އަނެކަކާ ބައްދަލު ކުރަންވީ ދުވަސް
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް
ފިޠުރު ޢީދުގެ ދުވަހުގެ މުނާސަބަތުގައި، ދިވެހިރާއްޖޭގެ ރައްޔިތުންނަށް ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހް ތަހުނިޔާ ފޮނުއްވައިފިއެވެ.
އަންގާރަ ދުވަހު ރައިސް ފޮނުއްވި ތަހުނިޔާގެ ޚިތާބުގައި ވިދާޅުވީ އުފާވެރި ފިޠުރު ޢީދު ދުވަހުގެ މުނާސަބަތުގައި، ރާއްޖޭގެ ލޮބުވެތި ރައްޔިތުންނަށް، ހިތުގެ ލޯތްބާއި އިޚްލާޞްތެރިކަމާ އެކު، ތަހުނިޔާ އާއި ހެޔޮ އެދުންތައް ފޮނުވާ ކަމަށާއި މި ދުވަހުގެ އުފާވެރިކަން އެތައް ގުނައަކަށް އިތުރުވެގެންދަނީ، ބަރަކާތްތެރި ރަމަޟާން މަހުގެ ރޯދަ ހިފުމާއި ރޭއަޅުކަން ކުރުމުގެ ހެޔޮ ނަސީބު މާތް ﷲ މިންވަރު ކުރެއް ވީތީ ކަމަށެވެ.
މީގެ އިތުރުން އެ މަނިކުފަނުންގެ ޚިޠާބުގައި ވިދާޅުވެފައި ވަނީ ޢީދު ދުވަހަކީ ސާފު ހިތަކައިގެން އެކަކު އަނެކަކާ ސަލާންގަލާންކޮށް، އެކުވެރިކަމާއި ރަޙްމަތްތެރިކަން އާލާކުރަންވީ ދުވަހެއް ކަމަށާއި ލޯތްބާ އެކު އެއްބަނޑު އެއްބަފާކަމުގެ ގުޅުންތައް އަލުން ދިރުވައި ދަމަހައްޓަންވީ ދުވަހެއް ކަމަށެވެ. އެކަކު އަނެކަކަށް މަޢާފްކޮށް، ހިތްހެޔޮކަމާއި، އޯގާތެރިކަމާއި، ކުލުނާއެކު އިޖްތިމާޢީ ގުޅުންތައް ބަދަހިކުރަންވީ ދުވަހެއް ކަމަށް ވެސް ޚިތާބުގައި އެމަނިކުފާނު ވިދާޅުވެފައި ވެއެވެ.
އެމަނިކުފާނު ވިދާޅުވީ އެންމެ ބޮޑު ސަމާލުކަމެއް ދޭންޖެހޭނީ، ޢީދުގެ އުފާ ފާޅުކުރުމުގައި މުޖްތަމަޢުގެ އެންމެން ޝާމިލު ކުރުމަށް ކަމަށާއި ދިވެހީންގެ އެއްބައިވަންތަކަމުގެ ނަމޫނާ ސިފަތަކާއި، އެއްބައެއްވަންތަކަމުގެ ރީތި އަދަބުތަކާއި، އިޖްތިމާޢީ ސުލޫކާއި ހަމަތައް ނަގަހައްޓައި ހަރުދަނާ ކުރުމަށް، މިފަދަ އުފާވެރި މުނާސަބާތަކަކީ ރަނުގެ ފުރުޞަތެއް ކަމަށެވެ.
ރައީސް ވިދާޅުވީ ޢީދުގެ އުފާވެރިކަން ހަނދާނަށް ގެނެސްދޭ އެންމެ މުހިންމު ކަމަކީ، މުޖްތަމަޢުގައި ތިބި ތަފާތު ފަންތިތަކުގެ މީހުންގެ ޙާލަތާއި، ފަޤީރުންނާއި، ނިކަމެތީންނާއި، މިސްކީނުންގެ ޙާލަތު ހަނދާން ކޮށްދިނުން ކަމަށެވެ. އަދި އީދު ދުވަހަކީ އެފަދަ ފަރާތްތަކަށް އެހީތެރިކަން ފޯރުވައި، އެ މީހުންގެ ދަތިތައް ފިލުވައިދިނުމަށް އަވަސްވެގަންނަންވީ ދުވަހެއް ކަމަށެވެ. އިޖްތިމާޢީ ޢަދާލަތުގެ ވެސް އެންމެ މުހިންމު މަޤްޞަދަކީ، މުޖްތަމަޢުގެ ފަރުދުން، އެއް ހަމަކޮށްދިނުމާއި، ތަފާތުކުރުމާއި ހަވާސާކުރުން ނެތިކޮށްލުން ކަމަށް ވެސް ވިދާޅުވެފައި ވެއެވެ.
ޢީދު ފާހަގަކުރުމަކީ ހަމައެކަނި ދީނީ މުނާސަބަތެއް ނޫން ކަމަށާއި އިޖްތިމާޢީ ގުޅުންތަކާއި ޤައުމިއްޔަތުގެ އަގުތައް، އޭގެ ފުރިހަމަގޮތުގައި ދެމެހެއްޓުމަކީވެސް، ޢީދުގެ އުފާވެރިކަމުގެ ތެރެއިން ކުރެވޭނެ ވަރަށް މުހިންމު ކަމެއް ކަމަށް ވެސް ޚިތާބުގައި އިތުރަށް ވިދާޅުވެފައި ވެއެވެ
