މަޖިލީހުގައި 17 ކޮމެޓީ ބާއްވަން ހޯމަ ދުވަހު ބޭއްވި ރައްޔިތުންގެ މަޖިލީހުން ފާސްކޮށްފިއެވެ.

މަޖިލީހުގައި 17 ކޮމެޓީ ބާއްވަން ފާސްކޮށްފައި ވަނީ 71 މެމްބަރުންގެ އަޣުލަބިއްޔަތުންނެވެ. މަޖިލީހުގައި ކުރިން އޮންނަނީ 13 ކޮމިޓީއެކެވެ.

މަޖިލީހުގެ ދާއިމީ ހަތަރު ކޮމެޓީގެ ތެރެއިން އިމްތިޔާޒު ކޮމެޓީ އާއި ސުލޫކީ ކޮމެޓީ ވަނީ އެއް ކޮމެޓީއަކަށް ހަދާފައެވެ. އެހެންކަމުން އެ ދެ ކޮމެޓީ އެއްކޮށްލުމަށް ފަހު ކޮމެޓީގެ ނަން ވަނީ އިމްތިޔާޒު އަދި ސުލޫކީ ކޮމެޓީއަށް ބަދަލުކޮށްފައެވެ.

ދައުލަތުގެ އިދާރާތަކާ ގުޅޭ ކޮމިޓީތަކުގެ ތެރޭގައި ހިމެނެނީ ކުރިން ހިމެނުނު ގަވައިދު ކޮމިޓީ އާއި މާލިއްޔަތު ކޮމިޓީ، އިގްތިސާދީ ކޮމިޓީ، އިޖްތިމާއީ ކޮމިޓީ، ސަލާމަތީ ޚިދުމަތްތަކާ ބެހޭ ކޮމިޓީ، މިނިވަން މުއައްސަސާތަކުގެ ކޮމިޓީ، ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީ އަދި ގައުމީ ސަލާމަތުގެ ކޮމިޓީއެވެ.

އިތުރު ކުރި ކޮމެޓީތަކަށް ބަލާއިރު ގައުމީ ތަރައްގީގެ ކޮމިޓީ އާއި ތަރިކައިގެ ކޮމިޓީއަކީ ކުރިން ގައުމީ ތަރައްގީގެ ކޮމިޓީއެވެ. އެހެން ނަމަވެސް ތަރިކައިގެ ކޮމިޓީ ހިމެނުމަށް މަޑުއްވަރީ ދާއިރާގެ މެމްބަރު އާދަމް ޝަރީފު ހުށައެޅުއްވުމާ ގުޅިގެން ގައުމީ ކޮމިޓީ އާއި ތަރިކައިގެ ކޮމިޓީގެ ނަން އެއްކޮށްލުމަށް ފަހު "ގައުމީ ތަރައްގީގެ ކޮމިޓީ އާއި ތަރިކައިގެ ކޮމިޓީ" ގެ ނަމަށް ހާޒިރުވެވަޑައިގެންތިއްބެވި މެމްބަރުންގެ އިއްތިފާގުން ވަނީ ފާސްކޮށްފައެވެ. އިތުރުކުރި ކޮމެޓީތަކުގެ ތެރޭގައި ދެން ހިމެނެނީ ލާމަރުކަޒީ ކޮމިޓީ އާއި ޖުޑީޝިއަރީ ކޮމިޓީ އާއި އެންވަޔަރަމެންޓް އެންޑް ކްލައިމެޓް ޗޭންޖް ކޮމިޓީ އާއި ހިއުމަން ރައިޓްސް އެންޑް ޖެންޑަރ ކޮމިޓީ އާއި ފޮރިން ރިލޭޝަންސް ކޮމިޓީއެވެ.

ހޯމަ ދުވަހު ދެން ފާސްކޮށްފައި ވަނީ މަޖިލިސް މައްސަލަތަކާއި ބިލްތަކުގައި ބަހުސްގެ ވަގުތު ހަތަރު ގަޑިއިރަށް ދިގު ކުރުމަށެވެ. އެހެން ކަމުން ކޮންމެ މެމްބަރަކަށް ދެ މިނެޓު ހަތް ސިކުންތު ލިބޭ ގޮތަށް ވަނީ މަޖިލީހުގެ ގަވައިދު ބަދަލު ކޮށްފައެވެ.