ޝަރުޢީ ދާއިރާ އިޞްލާޙު ކުރުމަށް ކޮންސަލްޓަންޓެއްގެ ގޮތުގައި އައްޔަންކުރެއްވި ދެކުނު އެފްރިކާގެ ރިޓަޔަރޑް ޖަސްޓިސް ޔޮހާން ކްރީގްލާއާ އެކަނި ބައްދަލު ކުރެއްވުމަށް ފަނޑިޔާރުން އެދިވަޑއިގެން ކަމަށް ވިދާޅުވެ ބަންޑާރަނައިބު އިބްރާހިމް ރިއްފަތު ހެއްދެވީ އިތުރުފުޅެއް ކަަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނެފިއެވެ.
ޑީޖޭއޭ އިން ބޭއްވި ނޫސްވެރިންގެ ބައްދަލުމެއްގައި އެ ޑިޕާޓްމަންޓްގެ ޖުޑިޝަލް އެކަޑަމީގެ ޗާންސެލަރު އަހުމަދުމާޖިދުވިދާޅުވީ ކްރީގްލާއާ އެކަނި ބައްދަލުކުރައްވަން ފަނޑިޔާރުން އެދިވަޑައިގެންނެވި ކަމަށް ދެކެވޭ ވާހަކައަކީ ހަގީގަތާ ޚިލާފު ވާހަކައެއް ކަމަށެވެ. ކްރީގްލާއާ އެކީގައި ފަނޑިޔާރުންގެ ބައްދަލުވުމަށް އޭޖީގެ ބޭފުޅަކު ވަޑައިގެންނެވުމަށް ހަމަޖެހުނު ކަމަށާއި އެހެން ނަމަވެސް އެ ބައްދަލުވުމަށް ވަޑައިނުގެންނެވީ ކީއްވެ ކަމެއް އެނގިވަޑައިގެންފައިނުވާ ކަމަށް ވިދާޅުވިއެވެ.
ކޮންމެ ވެސް އެއް ނޫހެއްގައި އެބަ އޮތް ބަންޑާރަނައިބު ވިދާޅުވި ކަމަށް ޖަސްޓިސް ކްރީގްލާއާ އެކަނި ބައްދަލުކުރުމަށް ފަނޑިޔާރުން ބޭނުންވެލެއްވި ކަމަށް. އަދި އެހެން ބޭފުޅަކު އެހެން ބޭފުޅަކު އެބައްދަލުކުރެއްވުމުގައި ބައިވެރިވެވަޑައިނުގެންނެވުމަށް އެދިލެއްވިކަމަށް .އެއީ ހަގީގަތާއި ޚިލާފު ވާހަކައެއް. ބަންޑާރަނައިބު އެގޮތަށް މައުލޫމާތު ލިބިވަޑައިގެންފައިވާކަމަށް ވިދާޅުވުން އަޅުގަނޑު ދަންނަވާނީ އެއީ ރަނގަޅު މައުލޫމާތެއް ނޫން ކަމަށް.އަހުމަދު މާޖިދު
ޝަރުޢީ ދާއިރާ އިޞްލާޙު ކުރުމަށް ކޮންސަލްޓަންޓެއްގެ ގޮތުގައި އައްޔަންކުރެއްވި ކްރީގްލަރއާ ގުޅޭ ގޮތުން ސުޕްރީމް ކޯޓުން ވަނީ ބޮޑެތިތުހުމަތުތަކެއްކޮށްފައެވެ. ސުޕްރީމް ކޯޓުން ނެރުނު ނޫސް ބަޔާނެއްގައި ބުނީ، ޤާނޫނުއަސާސީ ބަދަލު ކޮށްގެން ވިޔަސް ފަނޑިޔާރުގެ އަލުން އެކުލަވައިލާނެ ކަމަށް ކްރީގްލަރ ވިދާޅުވި ކަމަށެވެ. އަދި ސިޔާސީ ބާރުތަކާއި ފަނޑިޔާރުގެއާ ދެމެދުގައި މިހާރު އޮތީ ކުރިމަތިލުމެއް ކަމަށާއި އެ ކުރިމަތިލުމުން ފަނޑިޔާރުގެއަށް ލިބޭނީ ބޮޑު ނާކާމިޔާބީއެއް ކަމަށް ތަކުރާރުކޮށް ވިދާޅުވެ، އަދި އޭނާ ތައްޔާރުކުރައްވައި ހުށަހަޅުއްވާ ރިޕޯޓުގައި ރާއްޖޭގެ ފަނޑިޔާރުން މަޤާމުން ވަކިކުރުމަށް ރެކޮމެންޑް ކުރައްވާނެ ކަމަށް ވެސް ވިދާޅުވި ކަމަށް ސުޕްރީމް ކޯޓުން ބުންޏެވެ. އަދި އެއީ ދިވެހި ދައުލަތުގެ ސިޔާދަތީ ބާރުތަކުގެ ތެރެއިން އެއް ބާރުކަމުގައިވާ ޢަދުލު އިންޞާފު ޤާއިމްކުރުމުގެ ބާރަށް ވަރަށް ޞަރީޙަ އިބާރާތުން ބިރު ދައްކަވައި އިންޒާރުދިނުން ކަމަށް ސުޕްރީމް ކޯޓުން ސިފަކުރައްވާފައި ވެއެވެ.
އެ ބަޔާނާއި ގުޅިގެން ބަންޑާރަ ނައިބު ރިފްއަތު ވިދާޅުވީ ބޭރުގެ ތަޖުރިބާކާރަށް ހުތުރުވާ ގޮތަށް ސުޕްރީމް ކޯޓުން ބަޔާނެއް ނެރުމުން ހިތާމަކުރައްވާ ކަމަށެވެ. އަދި ރާއްޖޭގެ ޖުޑީޝަރީގައި ގިނަ މައްސަލަތަކެއް ހުރި ކަމާއި، ޖުޑީޝަރީ އިސްލާހްކުރުމަކީ މިހާރުން މިހާރަށް ކުރަންޖެހިފައިވާ ކަމެއް ކަމަށް، އދ. ހިމެނޭ ގޮތަށް، ޖަމިއްޔާ ޖަމާއަތްތަކުން ބުނަމުންގެންދާކަން ރިފްއަތު ފާހަގަކުރެއްވި އެވެ.
ރިފްއަތު ވިދާޅުވެފައި ވަނީ ޖުޑީޝަރީއާ މެދު ހުރިހާ ފަރާތެއްގެ އިތުބާރު ގެއްލިފައިވާ ދަނޑިވަޅެއްގައި އެފަދައިން ބަޔާނެއް ނެރުމުން ގެއްލިފައިވާ އިތުބާރު އިޔާދަނުވާނެ ކަމަށެވެ.
ކްރީގްލަރއަކީ ޔޫއެންޑީޕީގެ އެހީއާ އެކު ރާއްޖޭގެ ޝަރޫއީ ދާއިރާގެ ހާލަތު ދިރާސާކުރުމަށް ވަޑައިގެންނެވި ބޭފުޅެކެވެ. އެ ބޭފުޅާ މިހާތަނަށް ގިނަ ބޭފުޅުންތަކަކާއި ބައްދަލުކޮށްފައިވާއިރު، ސުޕްރީމް ކޯޓުގެ ފަނޑިޔާރުންނާ ބައްދަލުކުރައްވާފައި ވަނީ ބުދަ ދުވަހުގެ ރެއެވެ.
