ހައްޤު ނޫން އެއްވެސް ފައިސާއެއް އަމިއްލަފުޅު އެކައުންޓުގައިވެސް އަދި ގުޅުންހުރި އެކައުންޓެއްގައިވެސް ނުހުންނާނެ ކަމަށް ސުޕްރީމް ކޯޓުގެ ފަނޑިޔާރު އަބްދުﷲ ދީދީ ވިދާޅުވެއްޖެއެވެ.

ރައީސް ނަޝީދަށް 13 އަހަރުގެ ހުކުމް ކުރެއްވުމަށް ފަނޑިޔާރު އަބްދުﷲ ދީދީ އެއް މިލިއަން ޑޮލަރު ނެންގެވިކަމުގެ ތުހުމަތުތަކެއް ކުރެވިފައިވަނިކޮށް ހޯމަ ދުވަހު އަބްދުﷲ ދީދީ ނެރުއްވި ބަޔާނެއްގައި ބުނީ، އެ ތުހުމަތުތަކާ ގުޅޭގޮތުން ނޫސްތަކުގައި ލިއެފައިވާ ލިއުމަކީ ކަމުގެ ދެކޮޅު ބެލުމެއްނެތި ލިއެފައިވާ ލިއުމެއް ކަމަށާއި، އެއީ ވަރަށް ޢައިރު ޒިންމާދާރު އަމަލެއް ކަމަށެވެ.

އަބްދުﷲ ދީދީ ނެރުއްވި ބަޔާނުގައި ބުނީ، ބޭންކުގައި ފައިސާ ޖަމާކުރުން ފަދަ މުއާމަލާތްތަކުގެ މައުލޫމާތު ބޭންކުތަކުން ރަނގަޅަށް ބަލަހައްޓާނެ ކަމަށާއި، ދައުލަތުގެ ކަމާބެހޭ އިދާރާއަކުން އެ މައުލޫމާތުތައް ބޭނުންވެއްޖެ ހިނދެއްގައި ލިބެން ހުންނާނެ ކަމަށެވެ. އަދި ކުރެވޭ ތުހުމަތު ތަކުގައި ޖަވާބުދާރީ ވުމުގެ ފުރުސަތަކީ ވެސް ޤާނޫނުން ލިބިދޭ ހައްޤެއް ކަމަށާއި، އެފަދަ އެއްވެސް ފުރުސަތެއް ދިނުމެއް ނެތި ނޫސްތަކުން އެމަނިކުފާނުގެ އަބުރާއި ނަން ކިލަނބުކޮށްލާފައިވާ ކަަމަށް ވެސް ވަނީ ވިދާޅުވެފައެވެ.

ފަނޑިޔާރު އަބްދުﷲ ދީދީ އެހެން ވިދާޅުވެފައިވާއިރު، އެމަނިކުފާނުގެ ސުލޫކީ މައްސަލައެއް ބައްލަވައި އެޖެންޑާކޮށް ދިނުމަށް އެދި ރައީސް ނަޝީދު ވަނީ އާދީއްތަ ދުވަހު ޖުޑީޝަލް ސާރވިސް ކޮމިޝަނަށް ސިޓީއެއް ފޮނުއްވާފައެވެ.