މަޖިލީހުގެ ރިޔާސަތު ބަލަހައްޓާނެ 5 މެމްބަރުން ކަނޑައަޅައިފި
އެންމެ ގިނަ ދުވަސްވީ ތިން މެމްބަރުންނަށް ވާހަކަފުޅު ދެއްކެވުމުގެ ފުރުސަތު ވަނީ ދެއްވާފައި
މަޖިލިސް ޗެމްބަރުގައި މެމްބަރުން
ރައްޔިތުންގެ މަޖިލީހުގެ ރިޔާސަތު ބަލަހައްޓަވާނެ ފަސް މެމްބަރުން ކަނޑައަޅައިފިއެވެ.
މަޖިލިސްގެ ރިޔާސަތު ބަލަހައްޓަވާނެ ފަސް މެމްބަރުންނަކީ ވިލިފުށީ ދާއިރާގެ މެމްބަރު ހަސަން އަފީފް، މަރަދޫ ދާއިރާގެ މެމްބަރު އިބްރާހިމް ޝަރީފް، މީދޫ ދާއިރާގެ މެމްބަރު އަހްމަދު ސިޔާމް މުހައްމަދު، މާމިގިލި ދާއިރާގެ މެމްބަރު ގާސިމް އިބްރާހިމް، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމްއެވެ.
ރައްޔިތުންގެ މަޖިލީހުގެ ރައީސް އަދި ނައިބް ރައީސް ނެތް ހާލަތެއްގައި މަޖިލީހުގެ ރިޔާސަތު ބަލަހައްޓަވާނެ މެމްބަރުންގެ ގޮތުގައި ކަނޑައަޅާ މެމްބަރުންނަކީ، މަޖިލީހުގައި އެންމެ ގިނަ ދުވަސްވީ މެމްބަރުންނެވެ.
މަޖިލީހުގެ ރިޔާސަތު ބެލެހެއްޓުމުގެ ފުރުސަތު ލިބިވަޑައިގެންނެވި ފަސް މެމްބަރުންގެ ތެރޭގައި ހިމެނިވަޑައިގަންނަވާ ވިލިފުށީ ދާއިރާގެ މެމްބަރު ހަސަން އަފީފް ވަނީ 19 އަހަރުވަންދެން މަޖިލީހުގައި މަސައްކަތް ކުރައްވާފައިވާ ކަމަށް ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު ވަނީ ވިދާޅުވެފައެވެ. އަފީފް މަޖިލިސްގެ މަސައްކަތް އެންމެ ފުރަތަމަ ފެއްޓެވީ 1990 ވަނަ އަހަރުއެވެ.
ރިޔާސަތު ބަލަހައްޓަވަން ފުރުސަތު ލިބިވަޑައިގެންނެވި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް އަކީ 2005 ވަނަ އަހަރުން ފެށިގެން ،މެދުކެނޑުމެއްނެތި މަޖިލީހުގައި މަސައްކަތް ކުރައްވަމުން އަންނަ މެމްބަރެއް ކަމަށް މަޖިލީހުގެ ރައީސް ވަނީ ވިދާޅުވެފައެވެ.
މަޖިލީހުގައި ގިނަ ދުވަސްވީ މެމްބަރުންގެ ތެރެއިން ރިޔާސަތު ބެލެހެއްޓުމުގެ ފުރުސަތު ލިބިވަޑައިގެންނެވި މާމިގިލީ ދާއިރާގެ މެމްބަރު ގާސިމް މަޖިލީހަށް ފުރަތަމަ އިންތިޚާބުވެ ވަޑައިގެންފައިވަނީ 1990 ވަނަ އަހަރުއެވެ.
އެންމެ ގިނަ ދުވަސްވީ ތިން މެމްބަރުންނަށް ވާހަކަފުޅު ދެއްކެވުމުގެ ފުރުސަތު މަޖިލީހުގެ ރިޔާސަތުން ވަނީ ދެއްވާފައެވެ.
ރިޔާސަތުން ދެއްވި ފުރުސަތުގައި ވާހަކަފުޅު ދައްކަވަމުން ވިލިފުށީ ދާއިރާގެ މެމްބަރު ހަސަން އަފީފް ވިދާޅުވީ މެމްބަރުންގެ އިހްސާސްތައް ދަނެގެން ރިޔާސަތު ބަލަހައްޓަވާނެ ކަމަށެވެ.
މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވީ ހަވާލުކުރެވުނު ޒިންމާ ރަނގަޅަށް އަދާކުރެވޭތޯ މަސައްކަތް ކުރައްވާނެ ކަމަށެވެ.
19 ވަނަ މަޖިލިސް ހުވާކުރުމުގެ ޖަލްސާގައި ރިޔާސަތު ބެލެހެއްޓެވި ސިޔާމް ވިދާޅުވީ، ހަވާލުކުރެވުނު ޒިންމާ ވީހާވެސް ރަނގަޅަށް އަދާކުރެވޭތޯ މަސައްކަތް ކުރައްވާނެ ކަމަށެވެ.
