ޖޭއެސްސީއަށް ހިސާން އައްޔަން ކުރައްވައިފި
3 ޖޫން 2019 | ހޯމަ 08:08މަޖިލީހުގެ ރައީސްގެ ހައިސިއްޔަތުން ރައީސް ނަޝީދު ވެސް ޖޭއެސްސީގައި އިންނަވާނެ
ހިސާން ހުސައިން އައްޔަން ކުރެއްވުމަށް ފަހު ރައީސް ސޯލިހު ލިޔުން ދެއްވަނީ
ޖުޑީޝަލް ސަރވިސް ކަމިޝަން (ޖޭއެސްސީ) އަށް މަޖިލީހުން ކަނޑައަޅާ މެންބަރަކަށް ތުޅާދޫ ދާއިރާގެ މެމްބަރު ހިސާން ހުސައިން، ރައީސް އިބްރާހިމް މުހައްމަދު ސޯލިހު އައްޔަން ކުރައްވައިފިއެވެ.
ރައީސް އޮފީހުން ބުނީ ހިސާން އެމަގާމަށް އައްޔަން ކުރެއްވުމުގެ ކުރިން، ޖޭއެސްސީގެ މެންބަރުކަމުގެ ހުވައި، ކުރެއްވީ ރައީސް ސޯލިހުގެ ކުރިފުޅުމަތީގައި ކަމަށެވެ. ހިސާންއަށް ހުވައިލައިދެއްވީ، ސުޕްރީމް ކޯޓުގެ ފަނޑިޔާރު ޢަބްދުﷲ ޢަރީފެވެ.
އިނގިރޭސިވިލާތުގައި ގާނޫނީ ދާއިރާއިން އިން 2005ގައި މާސްޓާސް ފުރިހަމަ ކުރެއްވުމަށް ފަހު ފުރަތަމަ ވަޒީފާ އަދާކުރެއްވީ އެޓަރނީ ޖެނެރަލްގެ އޮފީހުގައެވެ. އެ އޮފީހުން 2007 ވަނަ އަހަރު ވަކިވެވަޑައިގަތުމަށް ފަހު އަމިއްލަ ލޯ ފާމެއްގައި އުފައްދަވައި މަސައްކަތް ކުރައްވަން ފެއްޓެވި އެވެ. ރައީސް މުހައްމަދު ނަޝީދުގެ ވެރިކަމުގައި ރައީސް އޮފީހުގެ ލީގަލް އެފެއާޒް ސެކްރެޓަރީކަން ހިސާން އަދާކުރެއްވެވި އެވެ.
ރައީސް ނަޝީދު ހައްޔަރުކުރުމުން، އެމަނިކުފާނު މިނިވަންވުމާ ހަމައަށް ގާނޫނީ ވަކީލުންގެ ޓީމުގައި އިސްކޮށް ހުންނަވައިގެން ހިސާން މަސައްކަތް ކުރެއްވެވި އެވެ. އަދި ކުރީގެ ރައީސް ޔާމީން ވެރިކަމުގައި ހައްޔަރުކުރި ސިޔާސީ ލީޑަރުންގެ ދިފާއުގައި ވެސް ހިސާން ވަކީލެއްގެ ގޮތުގައި މަސައްކަތް ކުރެއްވެވިއެވެ.
ނަވާރަވަނަ ރައްޔިތުންގެ މަޖިލިސް ހުވާ ކުރެއްވުމަށް ފަހު މަޖިލީހުގެ ރައީސް ކަމަށް ރައީސް މުހައްމަދު ނަޝީދު ވަނީ 67 މެމްބަރުންގެ ވޯޓާއެކު އައްޔަން ކުރައްވާފައެވެ. އަދި ރައީސް ނަޝީދު ވަނީ ޖޭއެސްސީގެ މެމްބަރުކަމުގެ ހުވާ ކުރައްވާފައެވެ.
ޖޭއެސްސީގައި ތިއްބަވާނީ މަޖިލީހުގެ ރައީސާއި، މަޖިލީހުން ކަނޑައަޅާ މެންބަރަކާއި، ސުޕްރީމް ކޯޓުގެ ފަނޑިޔާރުންގެ ތެރެއިން ބޭފުޅަކާއި، ބަންޑާރަ ނައިބާއި ދަށު ކޯޓުތަކުން ފަނޑިޔާރަކާއި، ހައި ކޯޓުގެ ފަނޑިޔާރަކާއި، ރައީސުލް ޖުމްހޫރިއްޔާ ކަނޑައަޅުއްވާ މެންބަރަކާއި ސިވިލް ސާވިސް ކޮމިޝަންގެ ރައީސް އާއި، އާންމުންގެ ތެރެއިން މެންބަރެއްގެ ގޮތުގައި މަޖިލީހުން ކަނޑައަޅުއްވާ ބޭފުޅަކާއި، ގާނޫނީ ވަކީލުންގެ ތެރެއިން އިންތިޚާބުކުރާ ވަކީލެކެވެ.
