ލަންކާގެ ރައީސް ސިރިސޭނާއާ ރައީސް ނަޝީދު ބައްދަލުކުރައްވައިފި
އެމަނިކުފާނު ކުރައްވާ މަސައްކަތަށް ލަންކާ ސަރުކާރުގެ އެއްބާރުލުންދޭކަން ވަނީ ހާމަކުރައްވާފަ
ލަންކާގެ ރައީސް ސިރިސޭނާއާއި ރައީސް ނަޝީދު ބައްދަލުކުރައްވަނީ
ލަންކާ ރައީސް މައިތިރިޕާލާ ސިރިސޭނާ އާއި ރައީސް މުހައްމަދު ނަޝީދު ބައްދަލުކުރައްވައިފިއެެވެ.
އެދެބޭފުޅުން ބައްދަލުކުރައްވާފައިވާކަން ހާމަކުރެއްވީ، ރައީސް މުހައްމަދު ނަޝީދު ހޮނިހިރު ދުވަހު ކުރައްވާފައިވާ ޓްވީޓެއްގައެވެ.
ތޭރަ އަހަރަށް ޖަލަށް ހުކުމް ކޮށްފައިވާ ރައީސް ނަޝީދު ބޭސްފަރުވާއަށް އިނގިރޭސި ވިލާތަށް ވަޑައިގެން ހުންނަވާ، ލަންކާއަށް ދަތުރުފުޅެއް ފެއްޓެވީ، ފާއިތުވި ޖެނުއަރީ މަހުގެ 29 ވަނަ ދުވަހުއެވެ.
އެމަނިކުފާނު މީގެ ކުރިންވެސް ލަންކާއަށް ދަތުރުފުޅެއް ކުރައްވާފައިވާއިރު، ލަންކާގައި ހުންނަވާ އިސްލާހަށާއި ޑިމޮކްރެސީއަށް ކުރައްވާ މަސައްކަތްތަކަށް ލަންކާ ސަރުކާރުން ވަނީ މަރުހަބާ ކިޔާ ތާއީދު ކުރާކަން ހާމަކޮށްފައެވެ.
ނަޝީދު ސިރިސޭނާއާއި ދެބޭފުޅުން ބައްދަލު ކުރެއްވި ކުރެއްވުމާއި، މަޝްވަރާކުރެވުނު ކަންކަމާއި ގުޅޭގޮތުން މީޑިއާއަށް އަދި ވަކިއެއްޗެއް ހާމަކޮށްފައެއްނުވެއެވެ.
އެހެންނަމަވެސް ދިވެހި ރާއްޖެ އިސްލާހުކުރުމަށާއި ޑިމޮކްރަސީ ހަރުދަނާކުރުމުގައި އެމަނިކުފާނު ކުރައްވާ މަސައްކަތަށް ލަންކާ ސަރުކާރުގެ އެއްބާރުލުންދޭކަން ވަނީ ހާމަކުރައްވާފައެވެ.
ރައީސް ނަޝީދުގެ މި ދަތުރުފުޅުގައި ލަންކާގައި ތިއްބެވި ބޭރު ގައުމުތަކުގެ މަތީފަންތީގެ ބޭފުޅުންނާއި، އަދި ބައެއް ގައުމުތަކުގެ ސަފީރުންނާއި ވަނީ ބައްދަލުކުރައްވާފައެވެ.
މި ދަތުރުފުޅަށްފަހު އަންނަ ހޯމަދުވަހު އެމަނިކުފާނު އެނބުރި އިނގިރޭސި ވިލާތަށް ވަޑައިގަންނަވާނެއެވެ.
