އައްޑޫ ސިޓީގައި ރިހަބިލިޓޭޝަން ސެންޓަރެއް އެޅުމަށް އިންޑިއާއިން ހަ މިލިއަން ރުފިޔާ
3 ޖޫން 2019 | ހޯމަ 06:22ރަސްދޫގެ ގޮނޑުދޮށް ހިމާޔަތް ކުރުމަށް ވެސް އިންޑިއާއިން އެހީ ދިން
އައްޑޫ ސިޓީ
އައްޑޫ ސިޓީ ހުޅުދޫގައި ޑްރަގް ޑީޓޮކްސިފިކޭޝަން އެންޑް ކޮމިއުނިޓީ ރިހަބިލިޓޭޝަން ސެންޓަރެއް އެޅުމަށް އިންޑިއާ ސަރުކާރުން 6,014,971.00ރ.(ހަ މިލިއަން ސާދަ ހާސް ނުވަސަތޭކަ ހަތްދިހަ އެއް ރުފިޔާ)ދީފިއެވެ.
ފޮރިން މިނިސްޓްރީން ބުނީ އިންޑިއާއިން އައްޑޫ ސިޓީގައި ރިހަބިލިޓޭޝަން ސެންޓަރެއް ގާއިމް ކުރުމަށް ހަ މިލިއަން ރުފިޔާ ކަނޑައެޅީ އެގައުމުގެ ސަރުކާރުން ރާއްޖެއަށް ދީފައިވާ 106 މިލިއަން ރުފިޔާގެ ތެރެއިން ކަމަށެވެ.
މި މަޝްރޫޢުގެ ތެރެއިން އައްޑޫ ސިޓީ ހުޅުދޫގައި މަސްތުވާތަކެތީގެ ވަބާގައި ޖެހިފައިވާ ފަރާތްތަކަށް ފަރުވާދިނުމަށް ސެންޓަރެއް އަޅާނެ ކަމަށާއި އެސިޓީގައި ފަރުވާއަށް ބޭނުންވެފައިވާ ފަރާތްތަކަށް ޚިދުމަތް ދޭނެ ކަމަށެވެ. ފޮރިން މިނިސްޓްރީން ބުނީ ރިހަބިލިޓޭޝަން ސެންޓަރަށް ބޭނުންވާ އިމާރާތްތައް އެޅުމުގެ އިތުރުން ބައިނަލްއަޤްވާމީ މިންގަނޑުތަކާ އެއްގޮތަށް ސެންޓަރު ހިންގުމަށްޓަކައި އެ ތަނުގައި މަސައްކަތް ކުރާ ކައުންސެލަރުންނާއި ސޯޝަލް ވަރކަރުންނާޢި އެހެނިހެން މުވައްޒަފުންނަށް ތަމްރީނު ދިނުމުގެ މަގުފަހިކޮށްދޭނެ ކަމަށެވެ.
އިޖްތިމާއީ އަދި އިގްތިސާދީ ތަރައްގީއަށް ބޭނުންވާ ޕްރޮޖެކްޓުތައް ހިންގުމަށްޓަކައި އިންޑިއާ ސަރުކާރުން ހިލޭ އެހީ ރާއްޖެއަށް ދިނުމަށް އެއްބަސްވީ މި އަހަރުގެ މާރިޗް މަހު 17 އިން 18 އަށް އިންޑިއާގެ މިނިސްޓަރ އޮފް އެކްސްޓާރނަލް އެފެއާޒް ހަރ އެކްސަލަންސީ ސުޝްމާ ސްވަރާޖް ރާއްޖެއަށް ކުރެއްވި ރަސްމީ ދަތުރުފުޅުގައެވެ. މި އެހީގެ ދަށުން ހިންގާ ޕްރޮޖެކްޓުތައް ހިންގާނީ ރާއްޖޭގެ ކަމާބެހޭ މުއައްސަސާތައް ގުޅިގެންނެވެ.
އިންޑިއާއިން ދިން 106 މިލިއަން ރުފިޔާގެ އެހީގެ ތެރެއިން އއ. ރަސްދޫގެ ގޮނޑުދޮށުން ގިރާ ސަރަހައްދު ހިމާޔަތް ކުރުމަށް 8 މިލިއަން ދިވެހި ރުފިޔާ ކަނޑަައެޅިއެވެ. އަދި އެއަތޮޅު އުކުޅަހުގައި ބައިނަލްއަޤްވާމީ ފެންވަރުގެ ކޮންވެންޝަން ޝެންޓަރެއް އެޅުމަށް ހަތް މިލިޔަން ރުފިޔާގެ ހިލޭ އެހީއެއް އިންޑިއާ ސަރުކާރުން ވަނީ ދީފައެވެ.
