އެހެން މެމްބަރުންގެ އޮފީސްތައް ވެސް ވަރަށް އަވަހަށް ހުޅުވޭނެ
ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވާހަކަފުޅު ދައްކަވަނީ
ރައްޔިތުން މަޖިލީހުގެ ޤަވާއިދުގައި މެމްބަރުންގެ އޮފީސްތައް ހިންގުމުގެ އިންތިޒާމްތައް ހަމަޖެހިގެންދާނެ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒްގެ އޮފީސް ހުޅުވުމަށް ހުޅުމާލޭގައި އޮތް ރަސްމިއްޔާތުގައި ވާހަކަ ދައްކަވަމުން ނަޝީދު ވިދާޅުވީ އެހެން މެމްބަރުންގެ އޮފީސްތައް ވަރަށް އަވަހަށް ހުޅުވޭނެ ކަމަށާއި މަޖިލީހުގެ ޤަވާއިދު އިސްލާހު ކުރުމަށް މަސައްކަތް ކުރަމުންދާ މި ދަނޑިވަޅުގައި އެ އޮފީސްތައް ހިންގުމުގެ އިތުރު އިންތިޒާމުތަކުގެ ވާހަކަ ހިމެނިގެންދާނެ ކަމަށެވެ.
ފަސޭހައިން މެމްބަރުންނާއި ދާއިރާގެ ރައްޔިތުންނާ ބައްދަލު ކުރެވޭ ގޮތަށް މަޖިލީހުގެ ހިންގާ ޤަވާއިދުގައި ހިމެނިގެންދާނެ ކަމަށް އުންމީދު ކުރައްވާ ކަމަށް ވެސް ނަޝީދު ވިދާޅުވިއެވެ.
މެމްބަރުންގެ ނަޒާހަތްތެރިކަމާއި ވައުދު ފުއްދުމާއި ދޭތެރޭގައި ވެސް އާންމުން މީގެ ކުރިން ސުވާލު އުފައްދަމުން ދިޔަ ކަމަށާއި ނަމަވެސް 19 ވަނަ ރައްޔިތުންގެ މަޖިލީސް ތަފާތުވާނެކަން އެ މަނިކުފާނު ފާހަގަކުރެއްވިއެވެ.
ރައީސް ނަޝީދު ވިދާޅުވީ ހަމަހަމަކަމާއި އިންސާފުވެރިކަމާ އެކު ރައްޔިތުންގެ މަޖިލިސް ބާރަށް ހިނގަމުން ކުރިއަށްދާނެ ކަމަށާއި 19 ވަނަ ރައްޔިތުންގެ މަޖިލީހުގައި ރައްޔިތުންގެ އަޑު އައްސަވާނެ ކަމަށެވެ.
މި ރަސްމިއްޔާތުގައި ވާހަކަ ދައްކަވަމުން މެމްބަރު ނިޔާޒް ވިދާޅުވީ މި އޮފީސް ހުޅުވުމުގެ މަޤްސަދަކީ ރައްޔިތުންނާއި ގާތުން ހިދުމަތް ދިނުން ކަމަށާއި މި އޮފީސް މެދުވެރިކޮށް އެ މަޤްސަދު ހާސިލްވާނެ ކަމަށެވެ. މިއީ މަޖިލިސް މެންބަރަކު ދާއިރާގެ ރައްޔިތުންނަށް ހާއްސަކޮށްގެން އޮފީހެއް ހުޅުވި ފުރަތަމަ ފަހަރެވެ.
