މަޖިލީހުގައި 17 ކޮމެޓީ ބާއްވަން ފާސްކޮށްފި
މަޖިލީހުގައި ކުރިން އޮންނަނީ 13 ކޮމިޓީއެއް
ވަގުތީ ކޮމެޓީގެ މުގައްރިރު މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ ޝަރީފު)
މަޖިލީހުގައި 17 ކޮމެޓީ ބާއްވަން ވަގުތީ ކޮމެޓީއިން ފާސްކޮށްފިއެވެ.
މަޖިލީހުގައި ކުރިން އޮންނަނީ 13 ކޮމިޓީއެކެވެ. ވަގުތީ ކޮމިޓީން އާދީއްތަ ދުވަހު ވަނީ އިތުރު ކޮމެޓީތައް އުފައްދަން އަޣުލަބިއްޔަތުން ފާސްކޮށްފައެވެ.
މަޖިލީހުގައި މީގެ ކުރިން ދާއިމީ ހަތަރު ކޮމެޓީ އޮވެއެވެ. ދާއިމީ ހަތަރު ކޮމެޓީ ވަނީ ދާއިމީ ތިން ކޮމެޓީއަށް ބަދަލުކޮށްފައެވެ.
މަޖިލީހުގެ ދާއިމީ ހަތަރު ކޮމެޓީތަކުގެ ތެރެއިން އިމްތިޔާޒު ކޮމެޓީއާއި ސުލޫކީ ކޮމެޓީ ވަނީ އެއްކޮމެޓީއަކަށް ހަދާފައެވެ. އެހެންކަމުން އެ ދެކޮމެޓީ އެއްކޮށްލުމަށް ފަހު ކޮމެޓީގެ ނަން ވަނީ އިމްތިޔާޒު އަދި ސުލޫކީ ކޮމެޓީއަށް ބަދަލުކޮށްފައެވެ.
އާދީއްތަ ދުވަހު ބޭއްވި ވަގުތީ ކޮމެޓީއަށް ވަނީ އިތުރު އާ ފަސް ކޮމެޓީ ހެދުމަށް ނިންމައި އިއްތިފާގުން ފާސްކޮށްފައެވެ.ދާއިމީ ކޮމެޓީތަކުގެ ގޮތުގައި ހިމެނެނީ އާންމު ކޮމިޓީއާއި ޕެޓިޝަން ކޮމިޓީއާއި އިމްތިޔާޒު އަދި ސުލޫކު ކޮމިޓީއެވެ.
ދައުލަތުގެ އިދާރާތަކާ ގުޅޭ ކޮމިޓީތަކުގެ ތެރޭގައި ހިމެނެނީ ކުރިން ހިމެނުނު ގަވައިދު ކޮމިޓީއާއި މާލިއްޔަތު ކޮމިޓީއާއި އިގްތިސާދީ ކޮމިޓީއާއި އިޖްތިމާއީ ކޮމިޓީއާއި ސަލާމަތީ ޚިދުމަތްތަކާއި ބެހޭ ކޮމިޓީއާއި މިނިވަން މުއައްސަސާތަކުގެ ކޮމިޓީއާއި ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއާއި ގައުމީ ސަލާމަތުގެ ކޮމިޓީއެވެ.
އިތުރު ކުރި ކޮމެޓީތަކަށް ބަލާއިރު ގައުމީ ތަރައްގީގެ ކޮމިޓީ އާއި ތަރިކައިގެ ކޮމިޓީ އަކީ ކުރިން ގައުމީ ތަރައްގީގެ ކޮމިޓީއެވެ. އެހެން ނަމަވެސް ތަރިކައިގެ ކޮމިޓީ ހިމެނުމަށް މަޑުއްވަރީ ދާއިރާގެ މެމްބަރު އާދަމް ޝަރީފު ހުށައެޅުއްވުމާއި ގުޅިގެން ގައުމީ ކޮމިޓީއާއި ތަރިކައިގެ ކޮމިޓީގެ ނަން އެއްކޮށްލުމަށް ފަހު "ގައުމީ ތަރައްގީގެ ކޮމިޓީއާއި ތަރިކައިގެ ކޮމިޓީ" ގެ ނަމަށް ހާޒިރުވެވަޑައިގެންތިއްބެވި މެމްބަރުންގެ އިއްތިފާގުން ވަނީ ފާސްކޮށްފައެވެ.
އިތުރުކުރި ކޮމެޓީތަކުގެ ތެރޭގައި ދެން ހިމެނެނީ ލާމަރުކަޒީ ކޮމިޓީއާއި ޖުޑީޝިއަރީ ކޮމިޓީއާއި އެންވަޔަރަމެންޓް އެންޑް ކްލައިމެޓް ޗޭންޖް ކޮމިޓީއާއި ހިއުމަން ރައިޓްސް އެންޑް ޖެންޑަރ ކޮމިޓީ އާއި ފޮރިން ރިލޭޝަންސް ކޮމިޓީއެވެ. އެ ކޮމިޓީތައް ހެދުމަށް ހުށައެޅުއްވީ ހެންވޭރު ހުޅަނގު ދާއިރާގެ އެމްޑީޕީ މެމްބަރު ހަސަން ލަތީފެވެ. އެ ފަސް ނަން ވެސް ފާސްކޮށްފައި ވަނީ ހާޒިރުވެވަޑައިގަތް މެމްބަރުންގެ އިއްތިފާގުންނެވެ.
ވަގުތީ ގަވައިދު ކޮމެޓީގައި ވަނީ ކޮމިޓީއެއްގައި ތިއްބަވާނެ މެމްބަރުންގެ އަދަދު ވެސް ކަނޑައަޅައިފަ އެވެ. އެގޮތުން ކޮންމެ ކޮމެޓީއެއްގައި 11 މެމްބަރުން ތިއްބެވުމަށް ވަނީ އަޣުލަބިއްޔަތުން ފާސްކޮށްފައެވެ.
