ދުންފަތުގެ ސަބަބުން ހިތްހަމަޖެހޭ ކަމަށް ޤަބޫލުކުރެވުނަސް އެއީ ކުށްހީއެއް !

ދުންފަތުގެ އިސްތިއުމާލުކުރުމަކީ މިއަދު ގިނަ ދިވެހިންގެ ކަށީގައި ހިފާފައިވާ އާދައެކެވެ. މުޖުތަމައަށް ކުރިމަތިވެފައިވާ "ވަބާ" އެކެވެ. ދުންފަތުގެ އިސްތިއުމާލުކުރާ މީހުންނާއި ނުކުރާ މީހުންނަށްވެސް އޭގެ ނުރައްކާ އިންތިހާއަށް ބޮޑު ކަމެކެވެ. ގިނަ މީހުން މިކަން ކުރަނީ އޭގެ ސަބަބުން ހިތްހަމަ ޖެހޭތީ ކަމަށް ބުނެއެވެ. ނަމަވެސް ސިނގިރޭޓަކީ އޭގެ ސަބަބުން މީހާގެ ހިތް ނުތަނަވަސްކޮށްލާ އަދި ހާސްކޮށްލާ އެއްޗެއްކަން އެނގޭ ހެއްޔެވެ؟

ކޮންމެ ސިނގިރޭޓަކުން 1 މިލިގްރާމް ނިކޮޓިން ހަށިގަނޑަށް ވާސިލުވާއިރު، މީހަކު ސިނގިރޭޓެއް ބުއިމުން އެ ސިނގިރޭޓުގައި ހުންނަ މި ވިހަ މާއްދާ އެންމެ 10 ވަރަކަށް ސިކުންތު ތެރޭގައި އެމީހެއްގެ ސިކުނޑިއާ ހިސާބަށް ވާސިލުވެއެވެ. އަދި އެވަގުތު އެމީހަކަށް ވަގުތީ ހިތްހަމަޖެހުމެއް ލިބޭހެން ހީވި ނަމަވެސް އޭގެ ނުރައްކާ މާ ބޮޑެވެ. އެގޮތުން ދުންފަތުގެ އިސްތިއުމާލު ކުުރުމުގެ ސަބަބުން މީހާގެ ނަފްސާނީ ދުޅަހެއުކަމަށް ވަރަށް ބޮޑަށް އަސަރުކުރާ ކަމަށާއި، އެއީ "އެންޒައިޓީ" ނުވަތަ ހާސްވުމުގެ ބައްޔަށް މަގުފަހިވާ ކަމެއް ކަމަށް ދިރާސާކުރާ ފަރާތްތަކުން ބުނެއެވެ. އޭގެ އިތުރުން، ސިނގިރޭޓު ބުއިމުން ބޮލުގައި ރިއްސުމާއި، ނޭވާ އަވަސްވުމަށް މަގުފަހިވެ މީހާގެ މޫޑަށް ބޮޑެތި ބަދަލުތަކެއް ގެނުވައެވެ. އެހެންކަމުން އެ 10 ސިކުންތުގައި ލިބޭ ހިތްހަމަޖެހުމަށްވުރެ ސިނގިރޭޓުގެ ސަބަބުން ކުރިމަތިވާ ދާއިމީ ގެއްލުން މާ ބޮޑުކަމުގައި ބުނެވިދާނެއެވެ.

ސިނގިރޭޓަކީ އޭގެ ސަބަބުން ނަފްސާނީ ބޮޑު ބައްޔެއް ކަމަށްވާ "ޑިޕްރެޝަން"އަށް ވެސް މަގުފަހިވާ ކަމެއް ކަމަށް ދިރާސާތަކުން ދައްކައެވެ. އެގޮތުން ޔޫކޭގައި ކުރި ދިރާސާއެއްގެ ނަތީޖާ ދައްކާގޮތުން ސިނގިރޭޓް ބޯ ކުދިންގެ ތެރޭގައި ޑިޕްރެޝަން އޮންނަ މިންވަރު އެހެން ކުދިންނާ އަޅާބާލާއިރު ދެ ގުނަ އިތުރު ކަމަށް އެ ދިރާސާގެ ނަތީޖާއިން ދައްކާފައިވެއެވެ. އެއީ ނިކޮޓިންގެ ސަބަބުން ސިކުނޑީގައި ހުންނަ "ޑޮޕަމައިން" ކިޔާ މާއްދާއެއް ބޭރުވެއެވެ. އެއީ ހަށިގަނޑުގެ އުފާވެރި އިހުސާސްތައް ކުރުވައިދޭ ހޯރމޯނަކަށްވާއިރު ސިނގިރޭޓު ބޮއިގެން މި އުފާވެރިކަން އިހުސާސްކުރަން އާދަވެއްޖެނަމަ އެމީހެއްގެ ސިކުނޑިން އަމިއްލައަށް ޑޮޕަމައިން އުފެއްދުމުގެ ޤާބިލިއްޔަތުކަން ކުޑަވެގެންދެއެވެ. ނަތީޖާއެއްގެ ގޮތުން މީހާ ސިނގިރޭޓަށް ބަރޯސާވެ، ސިނގިރޭޓުގެ ސަބަބުން ހިތްހަމަޖެހުން ލިބޭ ކަމަށް އަމިއްލައަށް ޤަބޫލުކުރެވިގެންދެއެވެ.

ދުންފަތުގެ ސަބަބުން މީހާއަށް ހިތްހަމަޖެހުން ލިއްބައިދީ ނަފްސު އުފާކޮށްލާކަމަށް ހީވި ނަމަވެސް އެއީ ކުށްހީއެކެވެ. އަދި އެއީ މީހާ ނަފްސާނީ ބަލިމަޑުކަމެއްގެ ތެރެއަށް ވައްޓާލާ، ނަފްސާނީ ދުޅަހެޔޮކަމަށް އޭގެ ސަބަބުން ބޮޑެތި އަސަރުތަކެއް ކުރުވާ ކަމެކެވެ. ދުންފަތުގެ ސަބަބުން ހިތްހަމަ ޖެހޭ ކަމަށް ޤަބޫލުކުރެވުނު ކަމުގައިވިޔަސް އެއީ ކުށްހީއެކެވެ. އެހެންކަމަށްވުމާއެކު، ދުންފަތުގެ ސަބަބުން ހިތްހަމަޖެހުން ލިއްބައިދޭކަމަށް ޤަބޫލުކުރާ ދިވެހިންވެސް އެ ވިސްނުން ދޫކޮށްލައި ދުންފަތާ ދުރުހެލިވާންޖެހެއެވެ. އެގޮތުން މިއަދުން ފެށިގެން ވަކިން ސިނގިރޭޓް ވިއްކުންވެސް މަނާކޮށްފައިވާއިރު، މިއީ ދުންފަތާ ދުރުހެލިވުމަށް މަސައްކަތް ކުރެވިދާނެ ދަނޑިވަޅެކެވެ.

ދުންފަތުގެ އިސްތިއުމާލުކުރުން ހުއްޓާލުމަކީ ފަސޭހަ ކަމަކަށް ނުވެދާނެ އެވެ. އެކަމަކު ތިމާ އަށާއި ތިމާގެ އާއިލާއަށްޓަކައި އެ އަމަލު ހުއްޓާލަންޖެހޭކަން ގަބޫލްކުރާށެވެ. މި ވާހަކަތައް ދުންފަތުގެ އިސްތިއުމާލުކުރާ ތިބާގެ އެކުވެރިން ގާތު ވެސް ބުނާށެވެ. ވިސްނައިދޭށެވެ.