ބެޓިސްގެ ލޮ ސެލްސޯ ހޯދަން ޓޮޓެންހަމުން 60 މިލިއަން ޔޫރޯ ހުށައަޅައިފި
29 މެއި 2019 | ބުދަ 15:17ރެއާލް ބެޓިސްއިން އޭނާ ގަނެފައިވަނީ މިދިޔަ އެޕްރިލް މަހުގެ ތެރޭގައި
ރެއާލް ބެޓިސްއަށް ކުޅެމުން އަންނަ އާޖެންޓީނާގެ ޖިއޮވާނީ ލޮ ސެލްސޯ
ސްޕެއިންގެ ރެއާލް ބެޓިސްއަށް ކުޅެމުން އަންނަ އާޖެންޓީނާގެ ހުނަރުވެރި މިޑްފީލްޑަރު ޖިއޮވާނީ ލޮ ސެލްސޯ ހޯދަން ޓޮޓެންހަމް ހޮޓްސްޕާސް އިން 53 މިލިއަން ޕައުންޑް (60 މިލިއަން ޔޫރޯ) ހުށައަޅައިފިއެވެ.
ޓޮޓެންހަމް މި އަދަދު ހުށައެޅި ކަމުގައިވީ ނަމަވެސް ބެޓިސްއިން ބޭނުންވަނީ ލޮ ސެލްސޯގެ "ރިލީޒް ކްލޯސް" އާ ގާތް އަދަދަކަށް އޭނާ ވިއްކާލާށެވެ. 23 އަހަރުގެ ލޮ ސެލްސޯގެ ރިލީޒް ކްލޯސްގެ އަދަދަކީ 100 މިލިއަން ޔޫރޯއެވެ.
ޓޮޓެންހަމްގެ އިތުރުން، ޕްރިމިއަރ ލީގުގެ އެހެން ކްލަބްތަކުން ވެސް އޭނާއަށް އަންނަނީ ފާރަލަމުންނެވެ. ޓޮޓެންހަމުން 2018 ވަނަ އަހަރުގެ ޖެނުއަރީ މަހުގެ ތެރޭގައި ޕީއެސްޖީން ލޫކަސް މޫރާ ގަންނަން 23 މިލިއަން ޕައުންޑް ހަރަދުކުރި ފަހުން ކުޅުންތެރިޔަކު ގެނެސްފައި ނުވެއެވެ.
މިހާރު ހުށައަޅާފައިވާ ފީގައި ގެނެއި ކަމުގައިވީ ނަމަވެސް ލޮ ސެލްސޯ ވަނީ ޓޮޓެންހަމްގެ އެންމެ އަގުބޮޑު ކުޅުންތެރިޔާއަށެވެ. މީހާތަނަށް ޓޮޓެންހަމުން އެންމެ ބޮޑު އަގެއް ދީގެން ގެނެސްފައިވަނީ، 2017 ވަނަ އަހަރު އަޔަކްސްއިން 42 މިލިއަން ޕައުންޑުގެ ފީއަކަށް ގެނައި ކޮލަމްބިއާގެ ޑިފެންޑަރު ޑެވިންސަން ސަންޗޭޒްއެވެ.
ނިމިދިޔަ ސީޒަނުގައި ބެޓިސްއަށް ކުޅުނު 45 މެޗުގައި ލޮ ސެލްސޯ ވަނީ 16 ލަނޑު ކާމިޔާބުކޮށްފައެވެ. 2018 ވަނަ އަހަރުގެ އޮގަސްޓު މަހުގެ ތެރޭގައި ޕީއެސްޖީން ބެޓިސްއާ ގުޅުނު ލޮ ސެލްސޯ އެ ކްލަބަށް ގެނައީ އަހަރު ދުވަހުގެ ލޯނު އެއްބަސްވުމެއްގައެވެ. ނަމަވެސް ސީޒަން ނިމުމުން ބެޓިސްއިން ވަނީ 22 މިލިއަން ޔޫރޯއަށް އޭނާ އެޕްރިލް މަހުގެ ތެރޭގައި އޭނާ ގަނެފައެވެ.
ބްރެޒިލްގައި ޖޫން 14 ވަނަ ދުވަހު ފަށަން ހަމަޖެހިފައިވާ ކޮޕާ އެމެރިކާއަށް އާޖެންޓީނާއިން ނަގާފައިވާ ސްކޮޑުގައި ވެސް ލޮ ސެލްސޯ ވަނީ ހިމަނާފައެވެ. މިހާތަނަށް އޭނާ އާޖެންޓީނާގެ ގައުމީ ޓީމަށް ކުޅުނު ދިހަ މެޗުގައި ކާމިޔާބު ކުރެވުނީ އެންމެ ލަނޑެކެވެ.
