ނަޝީދަށާއި އިވާއަށް ރައީސް ސޯލިހް މަރުހަބާ ދަންނަވައިފި
ގައުމު އެއް މިސްރާބަކަށް ގެންދިއުމަށް ގުޅިގެން މަސައްކަތްކުރުމަށް އުންމީދުކުރައްވާ ކަމަށް ވިދާޅުވި
މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު
19 ވަނަ ރައްޔިތުންގެ މަޖިލީހުގެ ރައީސް ކަމަށް އިންތިޚާބުވެވަޑައިގެންނެވި މައްޗަންގޮޅި މެދު ދާއިރާގެ މެމްބަރު ރައީސް މުހައްމަދު ނަޝީދަށާއި ރައްޔިތުން މަޖިލީހުގެ ނައިބު ރައީސްގެ މަގާމަށް ހޮވިވަޑައިގެންނެވި ގަލޮޅު އުތުރު ދާއިރާގެ މެމްބަރު އީވާ އަބްދުﷲ އަށް ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހް މަރުހަބާ ދަންނަވައިފިއެވެ.
އެމަނިކުފާނު އަންގާރަ ދުވަހުގެ ރޭ ކުރެއްވި ޓުވީޓެއްގައި ވިދާޅުވީ ގޮންޖެހުންތައް ކުރިމަތިވި ނަމަވެސް ޑިމޮކްރަސީ އާއި ފާގަތި ރާއްޖެއެއް ހޯދުމަށް ކުރަމުން އަންނަ މަސައްކަތުގައި ލަނޑުދަނޑި ގެއްލިގެން ނުދާ ކަމަށެވެ. އަދި ނަޝީދުގެ ރިޔާސަތުގެ ދަށުން މި މަޖިލީހަކީ އެންމެ އުފެއްދުންތެރި މަޖިލީހަށް ވެގެންދާނެ ކަމަށް އުންމީދުކުރައްވާ ކަމަށް ވެސް ރައީސް ވިދާޅުވެފައި ވެއެވެ.
އިވާއަށް މަރުހަބާ ދަންނަވާ ރައީސް ސޯލިހް ކުރެއްވި ޓްވީޓްގައި ވިދާޅުވެފައި ވަނީ އަންހެނުން ސިޔާސީ އިސް މަޤާމުތަކަށް ގެނައުމަށް އަދިވެސް ގިނަ މަސައްކަތްތަކެއް ކުރަން ޖެހިފައިވާ ހިނދު މިހާރު ވެސް އަންހެނުން ސިޔާސީ މައިދާނުގެ އިސް ރޯލަކުން ފެނުމުން ވަރަށް ބޮޑު އުފާވެރިކަމެއް ލިބިވަޑައިގަންނަވާ ކަމަށެވެ.
އެމަނިކުފާނު ކުރެއްވި އިތުރު ޓްވީޓެއްގައި ނަވާރަ ވަނަ ރައްޔިތުންގެ މަޖިލީހަށް އިންތިޚާބުވެވަޑައިގެން، ހުވާ ކުރެއްވި މެމްބަރުންނަށް ވެސް ވަނީ މަރުހަބާ ދަންނަވާފައެވެ. އެ ޓްވީޓްގައި ރައީސް ސޯލިހް ވިދާޅުވީ އަމާން އޮމާން ދިވެހިރާއްޖެއެއް ޤާއިމު ކުރުމަށްޓަކައި ކުރަމުންދާ މަސައްކަތުގައި 19 ވަނަ މަޖިލީހަށް ހުވާ ކުރެއްވި މެމްބަރުންނާ އެކު އުފެއްދުންތެރި ގުޅުމެއް ޤާއިމު ކުރެވިގެންދާނެ ކަމަށް އުންމީދު ކުރައްވާ ކަމަށެވެ.
ރައީސުލްޖުމްހޫރިއްޔާގެ އިތުރު އެމަނިކުފާނުގެ ނާއިބު ފައިސަލް ނަސީމް ވެސް ވަނީ ރައީސް ނަޝީދަށައީ އިވާ އަދި ހުވާކުރެއްވި މެންބަރުންނަށް މަރުހަބާ ދަންނަވާފައެވެ.
ނަވާރަވަނަ މަޖިލީހުގެ 65 ގޮނޑި ކާމިޔާބުކޮށް ސަރުކާރު ހިންގާ މައި ޕާޓީ އަށް ސާފު މެޖޯރިޓީ ލިބިފައިވާއިރު ޕީޕީއެމް ޕީއެންސީ ކޯލިޝަނުން ވަނީ 8 ގޮނޑި ހޯދާފައެވެ. ޕީޕީއެމްއަށް ފަސް ގޮނޑި ލިބިފައިވާއިރު، ޕީއެންސީ ވަނީ ތިން ގޮނޑި ހޯދާފައެވެ. ޖޭޕީއަށް ފަސް ގޮނޑި ލިބިފައިވާއިރު، އެމްޑީއޭއަށް ވަނީ ދެ ގޮނޑި ލިބިފައެވެ. އަމިއްލަ މެމްބަރުންގެ ގޮތުގައި ނަވާރަވަނަ މަޖިލީހުގައި ތިއްބަވާނީ ހަތް މެމްބަރުންނެވެ.
މަޖިލީހުގެ ރައީސް ކަމަށް ނަޝީދު ވަޑައިގެންފައި ވަނީ 18 ވަނަ ރައްޔިތުން މަޖިލީހުގެ ރައީސް ގާސިމް އިބްރާހީމްއާ ވާދަކުރައްވައި 67 ވޯޓުގެ ބޮޑު އަގުލަބިއްތަތަކުންނެވެ. ގާސިމަށް ލިބިވަޑައިގެންނެވީ 17 ވޯޓެވެ. ނައިބު ރައީސް ކަމަށް އީވާގެ ނަން އެކަނި ހުށަހެޅުނު އިރު 76 ވޯޓު ލިބިވަޑައިގެންފައި ވެއެވެ.
