މެދު ކެނޑުމެއް ނެތި ބޯކޮށް ވާރޭވެހުމުގެ ސަބަބުން ތ. އަތޮޅުގެ ބައެއް ރަށްތަކުގައި ފެންބޮޑުވެއްޖެ

މިހާރު ރާއްޖެއަށް ކުރަމުންދާ މޫސުމީ ވިއްސާރައިގައި މެދުކެނޑުމެއް ނެތި ބޯކޮށް ވާރޭ ވެހުމުގެ ސަބަބުން ތ. އަތޮޅުގެ ބައެއް ރަށްރަށުގައި ފެންބޮޑުވެއްޖެއެވެ.

އެކަމާ ގުޅޭ ގޮތުން ފުލުހުންގެ މީޑިއާ އޮފިޝަލު ވިދާޅުވީ، ހޯމަ ދުވަހުގެ ހެނދުނު 8:00 އިން ފެށިގެން އެ އަތޮޅުގެ ރަށްތަކަށް ހުއްޓުމެއް ނެތި ވާރޭ ވެހިފައިވާ ކަމަށާއި، އެ ހުރިހާ ރަށެއްގައި ވެސް މިހާރު ފުލުހުން ހަރަކާތްތެރި ވަމުންދާ ކަމަށެވެ. އެގޮތުން ގޭގެއަށް ފެން ވަނަ ނުދިނުމަށްޓަކައި ވެލި ބަސްތާ ޖެހުމާއި ރައްކާތެރި ކަމުގެ ފިޔަވަޅުތައް އެޅުމުގައި ފުލުހުން ދަނީ ހަރަކާތްތެރި ވަމުންނެވެ.

އެ އަތޮޅަށް ކުރަމުންދާ ވިއްސާރައިގައި ތ. ވޭމަންޑޫގައި ވެސް ފެންބޮޑުވެފައިވާއިރު، ފުލުހުންނާއި، ރަށު ކައުންސިލާއި، ރައްޔިތުން އެއްވެ ވަނީ ފެން ބޭރު ކުރުމަށްޓަކައި ކޯރު ކެނޑުމުގެ މަސައްކަތް ކޮށްފައެވެ. އަދި އެ އަތޮޅު ތިމަރަފުށީގައި ވެސް ފެން ބޮޑުވެގެން ފުލުހުންނާއި ސިފައިން ނުކުމެ ޕަމްޕް ޖައްސައިގެން ފެން ހިންދުމުގެ މަސައްކަތް ކުރަމުންދާއިރު، ތ. ކިނބިދޫ އާއި ގުރައިދޫގައި ވެސް ފެން ބޭރުކުރުމަށް ކޯރު ކެނޑުމުގެ މަސައްކަތް ވަނީ ކޮށްފައެވެ.

އޭގެ އިތުރުން، ތ. އޮމަދޫގައި ވެސް ފެން ބޮޑު ވެފައިވާ ކަމުގެ މައުލޫމާތު ފުލުހުންނަށް ލިބިފައިވާ ކަމަށާއި، އެރަށަށް އެހީތެރިކަން ފޯރުކޮށްދޭން ދިއުމުގެ މަސައްކަތް ފަށާފައިވާ ކަމަށް ފުލުހުން ބުނެފައި ވެއެވެ.

ރާއްޖޭގެ އެކި ކަންކޮޅުތަކަށް ވިއްސާރަ ކުރަމުންދާއިރު، މޫސުމާ ބެހޭ ގައުމީ އިދާރާ އިން ވިދާޅުވީ ކުރިއަށް އޮތް 24 ގަޑިއިރު ވެސް ރާއްޖޭގެ އެކިހިސާބަަށް ގުގުރުމާއި އެކު ވިއްސާރަކުރާނެ ކަމަށާއި، ހާއްސަކޮށް ދެކުނާއި މެދުތެރޭގެ ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށެވެ. އަދި ތ.އަތޮޅުން ފެށިގެން ގދ. އަތޮޅަށް މޫސުން ގޯސްވާނެ ކަމަށް ލަފާކުރެވޭތީ، މޫސުމާ ބެހޭ ޤައުމީ އިދާރާއިން ހެނދުނު ވަނީ ޔެލޯ އެލަރޓް ވެސް ނެރިފައެވެ.