ޕާޓީތަކަށް ފައިސާ ދޫކުރުމަށް ފިނޭންސް މިނިސްޓްރީއަށް ފޮނުވައިފި
މިފަހަރު ފައިސާ ދޫކުރާނީ ހަތަރު ޕާޓީއަކަށް
އީސީގެ ތަރުޖަމާނު އަހުމަދު އަކްރަމް
ރާއްޖޭގައި މިހާރު އޮތް ސިޔާސީ ޕާޓީތަކުގެ ތެރެއިން މިދިޔަ އަަހަރު ނިމުނު އިރު 10،000 މެމްބަރުން ތިބި ހަތަރު ޕާޓީއަށް ފައިސާ ދޫކޮށްދިނުމަށް އެދި ފިނޭންސް މިނިސްޓްރީއަށް އިލެކްޝަންސް ކަމިޝަން (އީސީ) އިން ފޮނުވައިފިއެވެ.
އީސީގެ ތަރުޖަމާނު އަހުމަދު އަކްރަމް ވިދާޅުވީ ޕާޓީތަކަށް ފައިސާ ދޫކުރުމަށް އެދި ފިނޭންސް މިނިސްޓްރީއަށް ހުށައަޅާފައި ވަނީ މިދިޔަ ހަފްތާގައި ކަމަށެވެ. ޕާޓީތަކަށް ފައިސާ ދޫކުރުމަށް މި ފަހަރު ކަނޑައަޅާފައި ވަނީ 26.2 މިލިއަން ރުފިޔާގެ ބަޖެޓެކެވެ.
ޕާޓީތަކަށް ފައިސާ ލިބޭ ގޮތް:
1. އެމްޑީޕީ: 12،809،191.09ރ.(ބާރަ މިލިއަން އަށްލައްކަ ނުވަހާސް އެއްސަތޭކަ ނުވަދިހަ އެއް ރުފިޔާ)
2.ޖުމްހޫރީ ޕާޓީ: 2،059،960.36ރ.( ދެމިލިއަން ފަންސާސް ނުވަހާސް ނުވަސަތޭކަ ފަސްދޮޅަސް ރުފިޔާ)
3. ޕީޕީއެމް: 9،377،167.06ރ.(ނުވަމިލިއަން ތިންލައްކަ ހަތްދިހަ ހަތްހާސް އެއްސަތޭކަ ފަސްދޮޅަސް ހަތް ރުފިޔާ)
4.އެމްޑީއޭ: 2،031،754.50ރ.(ދެމިލިއަން ތިރީސް އެއްހާސް ހަތްސަތޭކަ ފަންސާސް ހަތަރު ރުފިޔާ)
އީސީއިން މިފަހަރު ފައިސާ ދޫކުރާނީ މިދިޔަ އަހަރުގެ ނޮވެމްބަރު މަހުގެ 28 ގެ ނިޔަލަށް ޕާޓީތަކުގައި ތިބި މެމްބަރުންގެ ތެރެއިން 10،000 މެމްބަރުންނަށް ވުރެ އިތުރަށް ތިބި ޕާޓީތަކަށެވެ. މިދިޔަ އަހަރު ވެސް އީސީން ފައިސާ ދޫކުރީ އެމްޑީޕީ، ޕީޕީއެމް، ޖޭޕީ، އަދި އެމްޑީއޭއަށެވެ.
މިދިޔަ އަހަރުގެ ޑިސެމްބަރ 31 އިން ފެށިގެން މި އަހަރުގެ މެއި މަހާ ހަމައަށް 10،000 މެމްބަރުން ހަމަވަނީ އެންމެ ދެ ޕާޓީއަށެވެ. އެއީ އެމްޑީޕީއާއި ޕީޕީއެމް އެކަންޏެވެ. އެމްޑީޕީގެ މެމްބަރުންގެ އަދަދު ބައި ލައްކައަށް ވުރެ މަތިވެފައިވާއިރު، ކުރިން އެންމެ މެމްބަރުންގެ ގިނަ ޕާޓީ ޕީޕީއެމްގެ މެމްބަރުންގެ އަދަދު ވަނީ 38،000 ވެއްޓިފައެވެ.
