ބެޑްމިންޓަން އޭޝިއާގެ ޖެނެރަލް ސެކެޓްރީއަކަށް މޫސަ

ބެޑްމިންޓަން އޭޝިއާގެ ޖެނެރަލް ސެކެޓްރީގެ މަގާމަށް ރާއްޖޭގެ ބެޑްމިންޓަން އެސޯސިއޭޝަންގެ ރައީސް މޫސާ ނާޝިދު އިންތިހާބުވެ ވަޑައިގެންފިއެވެ.

އޭޝިއާ ބެޑްމިންޓަންގެ މައި ޖަމިއްޔާގެ ޖެނެރަލް ސެކެޓްރީގެ މަގާމަށް މޫސަ އިންތިހާބުވެ ވަޑައިގެންނެވީ ޗައިނާގައި ކުރިޔަށްދިޔަ އަހަރީ ޖަލްސާގައި ހޮންކޮން، ޗައިނާގެ ސްޕޯޓްސް ފެޑެރޭޝަނާއި އޮލިމްޕިކް ކޮމިޓީގެ ނައިބު ރައީސް ޓޮން ވައި ލުންއާ ވާދަކުރައްވައިގެންނެވެ.

އިންތިހާބުގައި މޫސައަށް 27 ވޯޓު ލިބިވަޑައިގެންނެވިއިރު، ޓޮން ވައި ލުންއަށް ލިބިވަޑައިގެންނެވީ 13 ވޯޓެވެ. މިއީ ދުނިޔޭގެ ވާދަވެރި ކުޅިވަރެއްގައި ދިވެއްސަކު މިހާތަނަށް ފުރުއްވާނެ އެންމެ މަތީ މަގާމެވެ.

ދުނިޔޭގެ ބެޑްމިންޓަންގެ މައި އިދާރާ ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) ގެ ކައުންސިލް މެމްބަރުގެ އިތުރުން ދެކުނު އޭޝިއާގެ ބެޑްމިންޓަން ފެޑެރޭޝަންގެ ސެކެޓްރީ ޖެނެރަލްގެ މަގާމުވެސް ފުރުއްވަމުން ގެންދަވާ މޫސަ އައީ ބެޑްމިންޓަން އޭޝިއާގެ ޑިވެލޮޕްމެންޓް ކޮމިޓީގެ ޗެއާމަންކަން ވެސް ކުރައްވަމުންނެވެ.

ބެޑްމިންޓަން އެސޯސިއޭޝަންގެ ދެވަނަ ދައުރު ފުރުއްވަމުން ގެންދަވާ މޫސައަކީ ދެކުނު އޭޝިއާ ސަރަހައްދުގައި ބެޑްމިންޓަން ފެޑެރޭޝަނެއް އުފެއްދެވުމަށް ބުރަ މަސައްކަތްތަކެއް ކުރެއްވި ފަރާތެކެވެ.