މޮރީޝަސް ބެޑްމިންޓަން ސީރީޒްގައި ރާއްޖެއިން ބައިވެރިވާން ނިންމައިފި

މެޑަލްއަކަށް އަމާޒުކޮށްގެން 10 ކުޅުންތެރިންނާ އެކު މޮރީޝަސް ބެޑްމިންޓަން ސީރީޒްގައި ރާއްޖެއިން ބައިވެރިވާން ނިންމައިފިއެވެ.

މިމަހުގެ 15 ވަނަ ދުވަހު ފެށުމަށް ހަމަޖެހިފައިވާ މި މުބާރާތުގައި ރާއްޖެ ތަމްސީލް ކުރާ 10 ކުޅުންތެރިންގެ ތެރޭގައި ހިމެނެނީ ހަތަރު ފިރިހެން ކުޅުންތެރިންނާއި ހަ އަންހެން ކުޅުންތެރިންނެވެ.

ރާއްޖެ ޓީމުގައި ހިމެނޭ ފިރިހެން ކުޅުންތެރިންނަކީ ޒަޔާން ޒަކީ، މުހަންމަދު އަޖުފާން، ނިބާލް އަހުމަދު، އަދި މުހަންމަދު އަރުސަލާން އެވެ. މުބާރާތުގައި ރާއްޖެ ތަމްސީލުކުރާ އަންހެން ކުޅުންތެރުންނަކީ މައިސާ ފަތުހުﷲ، އާމިނަތު ޝަހުރުނާޒް، ފާތިމަތު ނަބާ، އާމިނަތު ނަބީހާ، ނީލާ ނަޖީބް، އަދި ނަފްހާ ނަސްރުﷲ އެވެ.

މުބާރާތާ ގުޅޭގޮތުން ބެޑްމިންޓަން އެސޯސިއޭޝަން އޮފް މޯލްޑިވްސްއިން ބުނެފައިވަނި، މުބާރާތައް ރާއްޖެއިން އަމާޒު ހިފާފައިވަނީ މެޑަލްއަކަށް ކަމަށާއި، އެއީ ރާއްޖެއަށް ހާސިލް ކުރެވޭ ވަރުގެ ކަމެއް ކަމަށެވެ. މީގެ އުތުރުން މި މުބާރާތުގެ ސަބަބުން 2019 ވަނަ އަހަރުގެ އިންޑިއަން އޯޝަން އައިލެންޑް ގޭމްސްގައި ރާއްޖެއިން ރަން މެޑަލްއެއް ހޯދުމަށް ކުރާ މަސައްކަތަށް ވެސް ފައިދާތަކެއް ކުރާނެ ކަމަށް ވެސް އެސޯސިއޭޝަނުން ވަނީ ބުނެފައެވެ.

މި ހިނގާ ޖޫން މަހުގެ 15 އިން 18 ވަނަ ދުވަހުގެ ނިޔަލަށް މޮރީޝަސްގައި ކުރިއަށް ގެންދިއުމަށް ހަމަޖެހިފައިވާ މި މުބާރާތަށް ރާއްޖެ ޓީމު ފުރުމަށް ހަމަޖެހިފައިވަނީ 12 ވަނަ ދުވަހުއެވެ.