ބެޑްމިންޓަން ވޯލްޑް ފެޑެރޭޝަންގެ މުބާރާތަކުން ރާއްޖެ ފުރަތަމަ ފަހަރަށް ސެމީއިން ޖާގަހޯދައިފި

ބެޑްމިންޓަން ވޯލްޑް ފެޑެރޭޝަންގެ މުބާރާތެއްގެ ސެމީ ފައިނަލުން ފުރަތަމަ ފަހަރަށް ރާއްޖޭގެ ކުޅުންތެރިން ޖާގަ ހޯދައިފިއެވެ.

މޮރީޝަސްގައި މިހާރު ކުރިއަށްދާ މޮރީޝަސް ބެޑްމިންޓަން ސީރީޒްގައި ރާއްޖޭގެ ޕެއާއެއް ވަނީ ސެމީ ފައިނަލަށް ދަތުރުކޮށްފައެވެ. އަންހެން ޑަބަލްސް އިން ރާއްޖެގެ ދެ ޕެއާ ކަމަށްވާ ނަފްހާ ނަސްރުﷲ އާއި މައިސާ ފަތުހުﷲ ގެ ޕެއާ އާއި ފާތިމަތު ނަބާހާ އަދި އާމިނަތު ނަބީހާގެ ޕެއާ ވަނީ ސެމީ އިން ޖާގަ ހޯދާފައެވެ. މީގެ އިތުރުން މިކްސް ޑަބަލްސް އިން ޒަޔާން ޒަކީ އާއި ފާތިމަތު ނަބާހާ ވަނީ ސެމީ އިން ޖާގަ ހޯދާފައެވެ.

ޒަޔާން ޒަކީ އާއި ފާތިމަތު ނަބާހާ ސެމީއިން ޖާގަ ހޯދީ މޮރީޝަސްގެ ސެންޑިލާ މޫރަތް އާއި ތެޖުރާޖު ޕުލްތޫ ބަލިކުރުމަށްފަހުގައެވެ. މި މެޗް ރާއްޖޭގެ ކުޅުންތެރިން ގެންދިޔައީ 21-17 ، އަދި 23-21 އިންނެވެ.

އަންހެން ޑަބަލްސް އިން ރާއްޖޭގެ ދެބެން ކަމަށްވާ ނަބާހާ އާއި ނަބީހާގެ ޕެއާ ސެމީއަސް ދަތުރުކުރީ ރީޔޫނިއަންގެ މާތޭ ގުޗާޑާ އާއި ލޮއިސް ލޯކުވައި ގެ ޕެއާ ބަލުކުރުމަށްފަހުގައެވެ. މި މެޗް ދެބެން ކާމިޔާބުކޮށްފައިވަނީ 21-17 އަދި 21-18 އިންނެވެ. ހަމަ މިބައިން ރާއްޖޭގެ މައިސާ އާއި ނަފްހާގެ ޕެއާ ޖާގަ ހޯދީ ރީޔޫނިއަންގެ ސްޓެފާނީ ބިލަން އާއި އިސަބެއްލާ ލަޗެންގް ގެ ޕެއާގެ މައްޗަށް ކުރިހޯދައިގެންނެވެ. މި މެޗް ރާއްޖޭގެ ކުޅުންތެރިން ކާމިޔާބުކުރީ 21-12 ، 21-16 އިންނެވެ.

ސެމީގެ އިތުރުން ރާއްޖޭގެ ކުޅުންތެރިން ވަނީ ކުއާޓާގައިވެސް ވާދަކޮށްފައެވެ. އެގޮތުން އަޖްފާން އާއި ނީލާގެ ޕެއާ އާއި ނިބާލް އާއި މައިސާގެ ޕެއާ ވަނީ މިކްސް ޑަބަލްސްގެ ކުއާޓާގައި ވާދަކޮށްފައެވެ. ނިބާލް އާއި މައިސާގެ ޕެއާ ބަލިވީ މޮރީޝަސްގެ މޭރީ އެލީސާ އާއި ސާހިރު އަބްދުލް އާއި ވާދަކޮށްގެންނެވެ. އަޖްފާން އާއި ނީލާ ބަލިވީ ޔޮގެންދްރަން އާއި ޕުރަޖަކްޓާ އާއި ވާދަކޮށްގެންނެވެ.

މި މުބާރާތުގައި ރާއްޖޭގެ 10 ކުޅުންތެރިއަކު ވާދަކުރާއިރު، ރާއްޖެއިން މުބާރާތުގައި ބައިވެރި ވެފައިވަނީ މެޑަލް އަކަށް އަމާޒު ހިފައިގެންނެވެ.