ބީޑަބްލިއުއެފްގެ ކައުންސިލަށް މޫސަ އިންތިހާބުކޮށްފި

ބެޑްމިންޓަން ވޯލްޑް ފެޑެރޭޝަން (ބީޑަބްލިޔުއެފް)ގެ ކައުންސިލަށް ރާއްޖޭގެ ބެޑްމިންޓަން އެސޯސިއޭޝަންގެ ރައީސް މޫސާ ނާޝިދު އިންތިހާބުކޮށްފިއެވެ.

މޫސައާއެކު ޖުމްލަ 11 މެންބަރަކު ބީޑަބްލިޔުއެފްގެ ކައުންސިލަށް އިންތިހާބުކޮށްފައިވާ އިރު، މި ކައުންސިލްގެ ދައުރު ހަމަވާނީ 2021 ވަނަ އަހަރުއެވެ.

ބީޑަބްލިޠުއެފަށް މެންބަރުން އިންތިހާބުކޮށްފައި ވަނީ ހޮނިހިރު ދުވަހު އޮސްޓްރޭލިއާގައި ބޭއްވި އެ ފެޑެރޭޝަންގެ އަހަރީ އާންމު ޖަލްސާގަ އެވެ.

ބީޑަބްލިޔުއެފް ކައުންސިލްގެ 11 މެންބަރުންނާއެކު ކައުންސިލްގެ ޕްރެޒިޑެންޓާއި ޑެޕިއުޓީ ޕްރެޒިޑެންޓާއި ބީޑަބްލިޔުއެފް ވައިސް ޕްރެޒިޑެންޓް ޕެރަ-ބެޑްމިންޓަންގެ މަގާމު ވެސް ވަނީ ހޮވައިފައެވެ. ޕްރެޒިޑެންޓަކަށް ޕޯލް އެރިކް ހޯޔާ ހޮވުނުއިރު، ޑެޕިއުޓީ ޕްރެޒިޑެންޓަކަށް ހޮވުނީ ޕެރޫގެ ގުސްތާވޯ ސަލަޒާ ޑެލްގާޑޯއެވެ. އަދި ބީޑަބްލިޔުއެފް ވައިސް ޕްރެޒިޑެންޓް ޕެރަ-ބެޑްމިންޓަންގެ މަގާމަށް ހޮވުނީ ސްވިޒަލެންޑްގެ ޕައުލް ކުރްޒޯއެވެ.

މޫސަގެ އިތުރުން ދެން އިންތިހާބު ކުރި މެންބަރުންނަކީ ޗައިނާގެ ޓަން ޖިއު ހޮންގް އާއި، މޮންގޯލިއާގެ ބައްޓުޝިގް ބަޓްބޯލްޑްއާއި، ނައިޖީރިއާގެ ޑަންލާމީ ޒަމާ ސަންޗިއާއި، ސްކޮޓްލެންޑްގެ އެމާ މޭސަންއާއި، ސްވިޒަލެންޑްގެ ރޮބާޓް ޑި ކޮކް އަދި ތައިލެންޑްގެ ކުންޔިންގް ޕަޓަމާ ލީސްވަޑްޓްރަކުލްއެވެ.

ބީޑަބްލިޔުއެފްގެ ކައުންސިލަށް ހޮވިވަޑައިގެންނެވި ނާޝިދަކީ އޭޝިއާގެ ބެޑްމިންޓަންގެ މައި އިދާރާ، ބެންޑްމިންޓަން އޭޝިއާގެ ޑިވެލޮޕްމަންޓް ކޮމިޓީގެ ޗެއާމަންކަމުގެ މަގާމު ވެސް ފުރުއްވަމުން ގެންދަވާ ބޭފުޅެކެވެ.