ބޮޑެތި ގައުމުތަކާ ވާދަކޮށް އޭޝިއާގެ 100 މީޓަރު ދުވުމުން ހަތަރުވަނަ ރާއްޖޭގެ ބާރު ދުވުންތެރިޔާ ހަސަން ސާއިދު ހޯދައިފި އެވެ.

22 ވަނަ އޭޝިއަން އެޓްލެޓިކްސް ޗެމްޕިއަންޝިޕްގެ ފައިނަލް ހީޓުގައި ވާދަކޮށް ސާއިދު ހަތަރުވަނަ ހޯދީ 10.37 ސިކުންތުން ރޭސް ނިންމައިގެންނެވެ.

100 މީޓަރު ދުވުމުން ރަން މެޑަލް ހޯދީ 10.25 ސިކުންތުން ރޭސް ނިންމި އިރާންގެ ހަސަން ޓަފިއާން އެވެ. ރިހި މެޑަލް 10.26 ސިކުންތުން ރޭސް ނިންމައިގެން ގަތަރުގެ ފެމީ ސެއުން ހޯދިއިރު، ލޯ މެޑަލް ހޯދީ 10.31 ސިކުންތުން ރޭސް ނިންމައިގެން ޗައިނީސް ޓައިޕޭގެ ޔަންގް ޗުން ޗަން އެވެ.

ފައިނަލުގައި ދުވެގެން 10.40 ސިކުންތުން ރޭސް ނިންމައިގެން ފަސްވަނަ ގަތަރުގެ ޓޮސިން ޖޯސެފް ހޯދިއިރު، ހަވަނަ ހޯދީ 10.45 ސިކުންތުން ރޭސް ނިންމައިގެން ޗައިނާގެ ޒޫ ހަޔަންގް އެވެ.

މުބާރާތުގެ ފައިނަލަށް ސާއިދު ދަތުރުކުރީ އޭނާ ވާދަކުރި އެއްވަނަ ހީޓްގެ ރޭސް 10.40 ސިކުންތުން ނިންމައިގެންނެވެ. އޭނާ އަށް ވާދަކުރި ހީޓުން ލިބުނީ ތިންވަނައެވެ.

ސާއިދު ވާދަކުރި ހީޓުގައި މެލޭޝިއާ، ތައިލޭންޑް، ޖަޕާން، އިރާގް، ހޮންކޮންގްގެ ދުވުންތެރިންވެސް ވާދަކުރި އެވެ. އެހެންނަމަވެސް ގިނަ ދުވުންތެރިން ފަހަތަށް ޖައްސާލުމަށްފަހު ސާއިދު ވަނީ ތިންވަނަ ހޯދާފައެވެ. އެއްވަނަ ގަތަރުގެ ދުވުންތެރިޔަކު ހޯދިއިރު، ދެވަނަ ހޯދީ ޗައިނާގެ ދުވުންތެރިޔެކެވެ.

ސާއިދު ސެމީ އަށް ދަތުރުކުރި ހީޓް ހައެއްގެ އެއްވަނަ ހޯދައިގެންނެވެ. ޖަޕާން، އަފްއާނިސްތާން އަދި ކަޒަކިސްތާންގެ ދުވުންތެރިން ފަހަތަށް ޖައްސާލުމަށްފަހު ސާއިދު ސެމީން ޖާގަ ހޯދީ 10.43 ސިކުންތުން ރޭސް ނިންމައިގެންނެވެ.

މި މުބާރާތުގެ 100 މީޓަރު ދުވުމުގެ އަންހެން ސެމީފައިނަލުގައި ރާއްޖޭގެ އަފާ އިސްމާއިލްވެސް ވަނީ ވާދަކޮށްފައެވެ. އެހެންނަމަވެސް އޭނާ ދިޔައީ ވާދަކުރި ހީޓުގެ 8 ވަނަ އަށެވެ. އަފާ ރޭސް ނިންމާފައިވަނީ 12.79 ސިކުންތުންނެވެ.