ޖީއެމްއާރުގެ ޓެކްސް ދައްކަން ޖެހޭނީ ސަރުކާރާއި އެމްއޭސީއެލުން: އޭޖީ
24 މެއި 2019 | ހުކުރު 04:25މީރާއިން އެމައްސަލާގައި ލަފަޔަކަށް އެދުމުން ލަފާދީފައިވާނެ
ވެލާނާ އިންޓަނޭޝަނަލް އެއާޕޯޓް: ޖީއެމްއާރުން ދައްކަންޖެހޭ ކަމަށް މީރާއިން ބުނެފައިވާ ޓެކްސް ފައިސާ ދައްކަން ޖެހޭނީ ސަރުކާރާއި އެމްއޭސިއެލުން ކަމަށް އޭޖީ އޮފީހުން ބުނޭ
ގެއްލުމުގެ ބަދަލުގެ ގޮތުގައި ޖީއެމްއާރްއަށް ދައްކާފައިވާ ފައިސާއަކީ ޓެކްސް ދައްކަންޖެހޭ ފައިސާއެއްކަމަށް މީރާއިން ނިންމާ ހާލަތެއްގައި އެ ޓެކްސް ދެއްކުމަކީ ދިވެހި ސަރުކާރާއި އެމްއޭސީއެލް އިން ކުރަންޖެހޭނެ ކަމެއް ކަމަށް އެޓާނީ ޖެނެރަލް އޮފީހުން ބުނެފިއެވެ.
ވެލާނާ އިންޓަނޭޝަނަލް އެއާޕޯޓު ހިންގުމަށް ކުރީގެ ރައީސް މުހައްމަދު ނަޝީދުގެ ވެރިކަމުގައި ހެދި އެއްބަސްވުން ކުރީގެ ރައީސް މުހައްމަދު ވަހީދުގެ ސަރުކާރުން ބާތިލްކުރި މައްސަލާގައި ޖީއެމްއާރަށް 271 މިލިއަން ޑޮލަރު ދައުލަތުން ދޭން ޖެހޭނެ ކަމަށް ސިންގަޕޫރުގެ އާބިޓްރޭޝަނުން ވަނީ ނިންމާފަ އެވެ. އެ ފައިސާ އެމްއޭސީއެލްއިން ޖީއެމްއާރަށް ދައްކާފައި ވަނިކޮށް މިދިޔަ އަހަރު މީރާއިން ވަނީ ޖީއެމްއާރުން ޓެކްސްގެ ގޮތުގައި ދައުލަތަށް 20 މިލިއަނަށް ވުރެ ގިނަ ޑޮލަރު (300 މިލިއަނަށް ވުރެ ގިނަ ރުފިޔާ) ދައްކަން ޖެހޭނެ ކަމަށް އަންގައިފަ އެވެ.
މިމައްސަލައާ ގުޅިގެން އޭޖީ އޮފީހުން ނެރުނު ބަޔާނެއްގައި ބުނީ މާލޭ އިންޓަރނޭޝަނަލް އެއަރޕޯޓް ހިންގުމުގެ މަސައްކަތް ޖީއެމްއާރްއެމްއޭއެޗްބީ ކޮންސޯޓިއަމްއާ ހަވާލުކުރުމަށްޓަކައި އެކުންފުންޏާއި ދިވެހި ސަރުކާރާ ދެމެދު ސޮއިކުރެވުނު އެގްރީމަންޓް ދިވެހި ސަރުކާރުން އުވާލުމާ ގުޅިގެން ކުރިޔަށް ގެންދިޔަ އާބިޓްރޭޝަން މައްސަލަ 25 އޮކްޓޯބަރ 2016 ގައި ނިންމާފައި ކަމަށެވެ.
އޭޖީން ބުނީ އާބިޓްރޭޝަން އިން ނިންމާފައިވާ ގޮތުން ދިވެހި ސަރުކާރު އަދި އެމްއޭސީއެލްގެ ކިބައިން ޖީއެމްއާރްއަށް ލިބިދިނުމަށް ކަނޑައަޅާފައިވާ ފައިސާއިން އެއްވެސް އަދަދެއްގެ އުނިނުވެ އެކުންފުންޏަށް ފުރިހަމައަށް ލިބިދޭންޖެހޭކަމަށެވެ. އެ ފައިސާގެ ތެރެއިން ރާއްޖެގެ ފަރާތްތަކުން ޓެކްސްގެ ގޮތުގައި އެއްވެސް މިންވަރެއް އުނިކުރާ ހާލަތުގައި އެވޯޑްގެ ފައިސާ ޖީއެމްއާރްއަށް ދައްކަންވާނީ ޓެކްސްގެ ގޮތުގައި އެއްވެސް މިންވަރެއް އުނިނުކުރާ ހާލަތުގައި ޖީއެމްއާރްއަށް ލިބެންވާ ފައިސާގެ އަދަދަށް، ޓެކްސް އިތުރުކުރުމަށްފަހު ކަމަށް ވެސް އޭޖީ އޮފީހުގެ ބަޔާނުގައިވެ އެވެ.
އޭޖީން ބުނީ އާބިޓްރޭޝަން އިން ދޭން ޖެހޭނެ ކަމަށް ނިންމި ފައިސާއިން އެއްވެސް ޓެކްސް ދައްކަން ނުޖެހޭނެކަމަށް ސަރުކާރުން މައުލޫމާތު ދީފައިވާތީ އެ ފައިސާއިން އެއްވެސް ޓެކްސްއެއް މީރާއަށް ދައްކަން ނުޖެހޭނެ ކަމަށެވެ. އަދި ނަތީޖާއެއްގެ ގޮތުން، މީރާއިން ކަނޑައަޅާނެ ޓެކްސްއަށްވާ ފައިސާ ޖީއެމްއާރަށް ދައްކި ފައިސާގެ ތެރެއަށް އިތުރުކުރަންޖެހޭ ތަނެއް ނެތް ކަމަށް ވެސް އޭޖީގެ ބަޔާނުގައިވެއެވެ.
މީގެ އިތުރުން އޭޖީން ބުނީ ޖީއެމްއާރްއަށް ދައްކާފައިވާ ފައިސާއަކީ ޓެކްސް ދައްކަންޖެހޭ ފައިސާއެއްކަމަށް މީރާއިން ނިންމާ ހާލަތެއްގައި ވެސް އެޓެކްސް ދެއްކުމަކީ ދިވެހި ސަރުކާރާއި އެމްއޭސީއެލް އިން ކުރަންޖެހޭނެ ކަމެއް ކަމަށެވެ.
އޭޖީން ބުނީ މީރާއިން އެ މައްސަލާގައި ލަފަޔަކަށް އެދުމުން މި އަހަރުގެ ޖެނުއަރީ މަހުގެ 10 ވަނަ ދުވަހު އެ ލަފާދީފައިވާނެ ކަމަށެވެ.
