މެންޗެސްޓާ ސީޓީގެ ކޯޗު ޕެޕް ގާޑިއޯލާ ޔުވެންޓަސްގެ ކޯޗުކަމާ ހަވާލުވާން ނޫޅޭ ކަމަށް ސިޓީގެ ބޯޑު މެމްބަރ އަލްބާޓޯ ގަލަސީ ބުނެފިއެވެ.

ސްކައި ސްޕޯޓް އިޓަލިއާއަށް ދިން އިންޓަވިއުއެއްގައި ގަލަސީ ބުނީ، ގާޑިއޯލާ ޔުވެންޓަސްއަށް ބަދަލުވުމުގެ ވިސްނުމެއް ނުގެންގުޅޭ ކަމަށް ސިޓީގެ އެޑަވައިސަރެއްގެ ގޮތުގައި އޭނާ ޔަގީންކޮށްދޭ ކަމަށެވެ.

ގަލަސީ މިހެން ބުނެފައިވަނީ ޔުވެންޓަސްގެ ކޯޗުކަމާ ގާޑިއޯލާ ހަވާލުވާން އުޅޭ ކަމަށް ރިޕޯޓްތައް ބުނަން ފަށާފައިވާ ދަނޑިވަޅެއްގައެވެ. ރިޕޯޓްތައް ބުނާގޮތުން ގާޑިއޯލާ ވަނީ ޔުވެންޓަސްއަށް ބަދަލުވާން އެއްބަސްވެފައެވެ.

ގަލަސީ ބުނީ، ސިޓީއާއެކު ގާޑިއޯލާ ހަދާފައިވާ އެއްބަސްވުމުގައި ބާކީ ދެ އަހަރު އެބައޮތް ކަމަށާއި، އެއްބަސްވުން ހަމަވަންދެން އޭނާ ކްލަބުގައި މަޑުކުރާނެ ކަމަށެވެ.

ގާޑިއޯލާވެސް ވަނީ ދާދި ފަހުން އޭނާ ކްލަބުގައި މަޑުކުރާނެކަން ޔަގީންކޮށްދީފައެވެ. އަދި އޭނާ އަންނަނީ ކުރިޔަށް އޮތް ސީޒަނަށް ސިޓީއާއެކު ތައްޔާރުވަމުންނެވެ. އެގޮތުން އޭނާގެ އެދުމުގެ މަތިން ކުޅުންތެރިން ހޯދުމަށް ސިޓީން އަންނަނީ މަސައްކަތްވެސް ކުރަމުންނެވެ.

ސްޕެއިން އަށް އުފަން އުމުރުން 48 އަހަރުގެ ގާޑިއޯލާގެ އިރުޝާދުގެ ދަށުން ސިޓީ ކުޅުނު 173 މެޗުގެ ތެރެއިން 126 މެޗު ކާމިޔާބު ކޮށްފައިވާއިރު، 23 މެޗުން ވަނީ ބަލިވެފައެވެ. އަދި 24 މެޗު ނިމުނީ އެއްވަރުވެގެންނެވެ.

މީގެކުރިން ބާސެލޯނާ އަދި ބަޔާން މިއުނިކާއެކު ވެސް ކާމިޔާބު ހޯދާފައިވާ ކޯޗު ގާޑިއޯލާގެ އިރުޝާދުގެ ދަށުން ސިޓީ ވަނީ ޕްރިމިއާ ލީގު ދެފަހަރު، ލީގު ކަޕް ދެފަހަރު އަދި އެފްއޭ ކޮމިއުނިޓީ ޝިލްޑް އެއްފަހަރު ކާމިޔާބު ކޮށްފައެވެ.