މޯދީ ދެ ވަނަ ދައުރު ކަށަވަރު ކުރައްވައިފި
24 މެއި 2019 | ހުކުރު 08:20މިއީ 35 އަހަރު ފަހުން ޖެހިޖެހިގެން ދެ ވަނަ ދައުރަކަށް އެއް ޕާޓީއެއް އިންތިޚާބުވި ފުރަތަމަ ފަހަރު
މި އިންތިޚާބުގައި 8،000 ކެނޑިޑޭޓުން ވާދަކުރި
އިންޑިއާގެ ޢާއްމު އިންތިޚާބު ބޮޑުތަފާތަކުން ކާމިޔާބު ކުރައްވައި ބޮޑުވަޒީރު ނަރެންދުރަ މޯދީ ދެ ވަނަ ދައުރެއް ކަށަވަރު ކުރައްވައިފިއެވެ.
ބީޖޭޕީ އިސްވެ އުފައްދާފައިވާ ނޭޝަނަލް ޑިމޮކްރެޓިކް އެލަޔަންސް (އެންޑީއޭ)ކޯލިޝަނަށް 349 ގޮނޑި ލިބިފައިވާ ކަމަށް މިހާރު އޮތް ނަތީޖާއިން ދައްކައެވެ. ވާދަވެރި ކޮންގްރެސް ޕާޓީއަށް ލިބިފައި އޮތީ 95 ގޮނޑިއެވެ.
އެ ކޯލލިޝަނަށްވުރެ އެހެނިހެން ޕާޓީތަކާއި އަމިއްލަ ކެނޑިޑޭޓުންނަށް ލިބުނު އަދަދު އިތުރުވެފައިވާއިރު އެ ފަރާތްތަކަށް 99 ގޮނޑި ލިބިފައިވާ ކަމަށް ދައްކައެވެ.
އިދިކޮޅު ލީޑަރު ރާހުލް ގާންދީ ވަނީ ބަލި ގަބޫލުކުރައްވައި ބީޖޭޕީ އާއި ބޮޑުވަޒީރު މޯދީއަށް މަރުހަބާ ވިދާޅުވެފައެވެ.
ބޮޑުވަޒީރު މޯދީގެ ބީޖޭޕީން މި އިންތިޚާބު ކާމިޔާބުކޮށްފައިވާއިރު މިއީ 1984 ވަނަ އަހަރުގެ ފަހުން އެ ގައުމުގައި ޖެހިޖެހިގެން ދެ ވަނަ ދައުރަކަށް އެއް ޕާޓީއެއް އިންތިޚާބުވި ފުރަތަމަ ފަހަރެވެ.
އިންޑިއާގެ ޤާނޫނު ހަދާ މަޖިލީހުގެ ތިރިގެ، ނުވަތަ ލޯކް ސަބާގައި 545 މެންބަރުން ހިމެނޭއިރު، މީގެ ތެރެއިން 543 މެންބަރުންނަކީ އިންތިޚާބު ކުރާ މެންބަރުންނެވެ. އެ ގޮނޑިތަކަށް 2،000 އަށް ވުރެ ގިނަ ޕާޓީ ހިމެނޭ ގޮތުން 8،000 ކެނޑިޑޭޓުން ވާދަކުރެއެވެ.
ނުވަސަތޭކަ މިލިއަން މީހުނަށް ވޯޓްލުމުގެ ހައްގު ލިބިފައިވާ މި އިންތިޚާބަކީ ދުނިޔޭގެ އެންމެ ބޮޑު އިންތިޚާބެވެ.
