ޖިންސީ އަނިޔާ ހުއްޓުވުމާ ގުޅޭ ކޮންފަރެންސަކަށް ޝިދާތާ ނޯވޭއަށް
21 މެއި 2019 | އަންގާރަ 18:58ދަތުރުފުޅަކީ ދެ ދުވަހަށް ދިގުދެމިގެންދާނެ
މިނިސްޓަރ އޮފް ޖެންޑަރ ފެމެލީ އެންޑް ސޯޝަލް ސާރވިސަސް ޝިދާތާ ޝަރީފް
ކާރިސާތަކުގައި ހާލުގައި ޖެހޭ މީހުންނަށް ކުރިމަތިވާ ޖިންސީ ފުރައްސާރަ އާއި އަނިޔާތަކާ ގުޅޭ ކޮންފަރެންސެއްގައި ބައިވެރިވެވަޑައިގަތުމަށް ޖެންޑާ މިނިސްޓަރު ޝިދާތާ ޝަރީފު ނޯވޭއަށް ފުރައިވަޑައިގެންފިއެވެ.
ނޯވޭގެ ވެރިރަށް އޮސްލޯގައި ކުރިއަށްދާ ކޮންފަރެންސަކީ "އެންޑިން ސެކްޝުއަލް އެންޑް ޖެންޑަރ–ބޭސްޑް ވަޔަލެންސް އިން ހިއުމެނިޓޭރިއަން ކްރައިސިސް ކޮންފަރެންސް" އެވެ. އެ ކޮންފަރެންސްގައި ބައިވެރިވެވަޑައިގަތުމަށް މިނިސްޓަރު ފުރައިވަޑައިގެންނެވީ އަންގާރަ ދުވަހުގެ ރޭގެ ވަގުތެއްގައެވެ.
ޖެންޑާ މިނިސްޓްރީން ބުނީ އެ ކޮންފަރެންސްގެ ހައި-ލެވެލް ސެގްމެންޓްގަ އާއި ސައިޑް އިވެންޓްތަކުގައި ބުރާސްފަތި ދުވަހުން ފެށިގެން ހުކުރު ދުވަހަށް މިނިސްޓަރު ބައިވެރިވެ ވަޑައިގަންނަވާނެ ކަމަށެވެ.
އެ ކޮންފަރެންސްސަކީ ނޯވޭ ސަރުކާރާއި، ޔުނައިޓެޑް ނޭޝަންސް ޕޮޕިއުލޭޝަން ފަންޑް (ޔޫއެންއެފްޕީއޭ) އަދި އިންޓަނޭޝަލް ކޮމިއުނިޓީ އޮފް ދަ ރެޑް ކްރޮސް (އައިސީއާރުސީ) އިންތިޒާމް ކޮށްގެން ބާއްވާ ކޮންފަރެންސެކެވެ. އެ ކޮންފަރެންސްގެ އަމާޒަކީ އަނިޔާގެ ޝިކާރައަކަށް ވެގެންދާ ފަރާތް ވަކި ޖިންސަކަށް ނިސްބަތްވީތީ އިންސާނީ އެހީތެރިކަން ފޯރޮކޮށްދިނުމުގައި ގެންގުޅޭ ތަފާތުކުރުން ނައްތާލުމާ އެކު، ކާރިސާގެ ހާލަތުގައި ޖިންސީ ތަފާތު އެކިއެކި އަނިޔާތަކުގެ ޝިކާރައަކަށް ވެގެންދާ ފަރާތްތަކަށް އެހީތެރިކަން ފޯރުކޮށްދިނުމުގައި އޮންނަ ފަރަގު ނައްތާލުމާ ގުޅޭ ގޮތުން މަޝްވަރާ ކުރުން ކަމަށް މިނިސްޓްރީން މައުލޫމާތު ދެއެވެ.
އެ ކޮންފަރެންސްގައި، ނުރައްކަލަށް ހުށަހެޅާ މީހުންނަށް ރައްކައުތެރިކަން ފޯރުކޮށްދިނުމުގައި ސިޔާސީ ގޮތުން ކުރެވޭ މަސައްކަތްތައް ހަރުދަނާކުރުމާއި ޖިންސީ އަދި ވަކި ޖިންސަކަށް ވީޓީ ކުރާ އަނިޔާގެ ޝިކާރައަކަށްވާ ފަރާތްތަކަށް އެހީތެރިވުމާއި އިންސާނީ ކާރިސާތަކުގައި މިބާވަތުގެ އަނިޔާއަށް ހުށަހެޅޭ ފަތާތްތަކަށް އެހީތެރިކަން ފޯރުކޮށްދިނުމުގައި އަމަލުކުރަންވީ ގޮތާއި އިތުރު މާލީ ވަސީލަތްތައް ކަނޑައެޅުމާއި ގުޅޭގޮތުން މަޝްވަރާކުރުމަށް ވަނީ ހަމަޖެހިފައެވެ.
އެކި ގައުމުތަކުގެ ވަޒީރުންނާއި ސަފީރުންނާއި ގައުމުތަކުގެ މަތީފެންވަރުގެ މަންދޫބުންގެ އިތުރުން ބައިނަލް އަގްވާނީ އެޖެންސީތަކާއި، މަދަނީ ޖަމާޢަތްތަކުގެ ތެރެއިން މި ކޮންފަރެންސްގައި ބައިވެރިވެވަޑައިގެންނެވުމަށް ހަމަޖެހިފަވެއެވެ.
