ކުޑަކުދިންގެ ކާނާގެ ބާވަތެއް ކަމަށްވާ ލެކްޓޯޖަން ޝިޕްމެންޓް ހިފަހައްޓާފައި ނުވާ ކަމަށް މޯލްޑިވްސް ކަސްޓަމްސް ސާރވިސްއިން ބުނެފިއެވެ.
ކުޑަކުދިންގެ ކާނާގެ ބާވަތެއް ކަމަށްވާ ''ލެކްޓޯޖަން'' ޝިޕްމެންޓެއް ދިވެހިރާއްޖެއަށް އެތެރެކުރުމުގެ މަރުހަލާގައި ނައްތާލަން ނިންމާފައިވާ ކަމަށާއި، އެހެންބަޔަކު އެތަކެތި އެތެރެކޮށް ވިއްކަމުންދާ އަޑުތައް ވަނީ ފެތުރިގެން ގޮސްފައެވެ.
މި މައްސަލައާ ގުޅިގެން ކަސްޓަމްސް އިން ބުނީ މިބާވަތުގެ ޝިޕްމެންޓެއް އެއްވެސް ސަބަބަކާ ހެދި މިހާތަނަށް ހިފަހައްޓަން ނުވަތަ ނައްތާލަން ނިންމާފައި ނުވާނެ ކަމަށެވެ.
ކަސްޓަމްސް އިން ބުނީ ރާއްޖެއަށް ''ލެކްޓޯޖަން''ގެ ބާވަތްތައް މައިގަނޑު ގޮތެއްގައި އިމްޕޯޓުކުރަނީ ފުޅާ ދާއިރާއެއްގައި ދިވެހިރާއްޖެއަށް މުދާ އިމްޕޯޓު ކުރާ އެއް ކުންފުންޏަކުން ކަމަށެވެ. އަދި 2016ގެ ފަހުން މިތަކެތި އެހެން ފަރާތަކުން އިމްޕޯޓުކޮށްފައިނުވާ ކަމަށް ކަސްޓަމްސްއިން ބުންޏެވެ.
މި މައްސަލާގައި ޝަކުވާ ލިބިފައިވާ މުދަލުގެ ސާމްޕަލް ކަސްޓަމްސްއިން ބެލިބެލުމުގައި މުދަލުގައި ލޭބަލް ހަރުކޮށްފައި ވަނީ މޯލްޑިވްސް ފުޑް އެންޑް ޑްރަގް އޮތޯރިޓީގެ މިންގަޑާ އެއްގޮތަށް ކަމަށް ކަސްޓަމްސް އިން މައުލޫމާތުދެއެވެ.
