ހައްޖަށް މީހުން ގެންދާ ކުންފުނިތަކަށް ހުއްދަ ދިން މައްސަލަ އޭސީސީއިން ބަލަނީ
20 މެއި 2019 | ހޯމަ 09:52މައްސަލައިގައި ބުނެފައިވަނީ ހައްޖަށް މީހުން ގެންދިއުމުގެ ހުއްދަ ދީފައިވަނީ އިވެލުއޭޓް ކުރުމެއް ނެތި ކަމަށް
އޭސީސީގެ ބައެއް މެމްބަރުން. އެކަމިޝަނުން ވަނީ ހައްޖަށް މީހުން ގެންދާ ކުންފުނިތަކަށް ހުއްދަ ދިން މައްސަލަ ބަލަން ފަށާފައި
މިއަހަރު ހައްޖަށް މީހުން ގެންދަން އިސްލާމިކް މިނިސްޓްރީން ކަނޑައެޅި ކުންފުނިތަކަށް ހުއްދަ ދިން މައްސަލަ އެންޓި ކަރަޕްޝަން ކަމިޝަން(އޭސީސީ)އިން ބަލަން ފަށައިފިއެވެ.
އެނގިފައިވާ ގޮތުގައި އިސްލާމިކް މިނިސްޓްރީން ހުއްދަ ދިން ކުންފުނިތަކުގެ މައްސަލަ ހުށައަޅާފައިވަނީ ސިސިލްފަރު ހައްޖު އެންޑް އުމްރާ ގްރޫޕުންނާއި އަލް އައިން އެންޑް ޓުއާސް ޕްރައިވެޓް ލިމިޓެޑުންނެވެ.
އެދެ ކުންފުނިން އޭސީސީއަށް ހުށައެޅި މައްސަލައިގައި ބުނެފައިވަނީ ހައްޖަށް މީހުން ގެންދިއުމުގެ ހުއްދަ އިސްލާމިކް މިނިސްޓްރީން ދީފައިވަނީ އިވެލުއޭޓް ކުރުމެއް ނެތި ކަމަށެވެ. އެހެންކަމުން ކުންފުނިތަކުން ހައްޖަށް މީހުން ގެންދިއުމުގެ ހުއްދައަށް އެދި ހުށައެޅި ޕްރޮޕޯސަލްތައް އިވެލުއޭޓް ކުރުމަށް ވަނީ އެދިފައެވެ.
އިސްލާމިކް މިނިސްޓްރީގެ ޑެޕިއުޓީ މިނިސްޓަރ ޝާފިއު އަލީ ވިދާޅުވީ އޭސީސީގެ ޓީމެއް އެމިނިސްޓްރީއަށް ވަޑައިގެންނެވި ކަމަށާއި ހައްޖަށް މީހުން ގެންދިއުމަށް ހުށައެޅި ކުންފުނިތަކުގެ އިވެލުއޭޝަން ކުރިއަށް ގެންދިޔަ ގޮތް އެފަރާތުން ބަލާފައިވާ ކަމަށެވެ.
ހައްޖަށް މީހުން ގެންދާ ކުންފުނިތައް އިސްލާމިކް މިނިސްޓްރީން ކަނޑައެޅި ގޮތް ބާތިލު ކުރަން ސިސިލްފަރުން ވަނީ ސިވިލް ކޯޓަށް ވެސް މައްސަލައެއް ހުށައަޅާފައެވެ. އެމައްސަލައިގެ ޝަރީއަތް އެކޯޓުގައި ވަނީ ފަށާފައެވެ.
އިސްލާމިކް މިނިސްޓްރީން ބުނީ ރާއްޖެއިން މީހުން ހައްޖަށް ގެންދަން 18 ކުންފުންޏަކުން ކުރިމަތިލި ކަމަށާއި އޭގެ ތެރެއިން ހަ ކުންފުންޏެއް "ޑިސްކޮލިފައި" ވެފައިވާ ކަމަށެވެ. އެހެންކަމުން ބާކީ އޮތް 12 ކުންފުނީގެ ތެރެއިން އެންމެ ގިނަ ޕޮއިންޓް ލިބުނު ފަސް ކުންފުންޏަށް ހައްޖަށް މީހުން ގެންދިއުމުގެ ފުރުސަތު ދިނީ ކަމަށް އިސްލާމިކް މިނިސްޓްރީން ބުނެއެވެ. ސަރުކާރުގެ ސަތޭކަ ޕަސެންޓް ހިއްސާ އޮންނަ ހައްޖު ކޯޕަރޭޝަނާ އެކު އަމިއްލަ ފަސް ކުންފުންޏަކަށް ވަނީ ހައްޖަށް މީހުން ގެންދިއުމަށް ހުއްދަ ދީފައެވެ.
ހައްޖަށް މީހުން ގެންދަން ކުންފުނިތައް ކަނޑައެޅި ގޮތާ މެދު ބައެއް ފަރާތްތަކުން ދަނީ ހިތްހަމަނުޖެހުން ފާޅުކުރަމުންނެވެ.
