ރައީސް ސޯލިހު ތާއީދް ކުރައްވާ މެމްބަރަކު މަޖިލީހުގެ ރައީސް ކަމަށް ގެންނަން މަސައްކަތް ކުރާނަން: ރިޔާޒް
ޖުމްހޫރީ ޕާޓީގެ މަޖިލީސް މެމްބަރުންގެ ތާއީދު ހޯއްދަވަން މަސައްކަތް ކުރައްވާނެ ކަމަށް ވިދާޅުވި
ތިމަރަފުށީ ދާޢިރާއަށް އިންތިޚާބުވެވަޑައިގެންފައިވާ އަބްދުﷲ ރިޔާޒް
ރައީސް އިބްރާހިމް މުހައްމަދު ސޯލިހު ތާއީދްކުރައްވާ މެމްބަރެއް 19 ވަނަ މަޖިލީހުގެ ރައީސް ކަމަށާއި، ނައިބް ރައީސް ކަމަށް ގެންނަން މަސައްކަތް ކުރައްވާނެ ކަމަށް ތިމަރަފުށީ ދާއިރާ އަށް އިންތިޚާބުވެވަޑައިގެންނެވި އަބްދުﷲ ރިޔާޒް މިއަދު ވިދާޅުވެއްޖެ އެވެ.
ރިޔާޒް ކުރެއްވި ޓުވީޓެއްގައި ވިދާޅުވީ ރައީސް ސޯލިހު ތާއީދްކުރައްވާ މެމްބަރެއް 19 ވަނަ މަޖިލީހުގެ ރައީސް ކަމަށާއި، ނައިބް ރައީސް ކަމަށް ގެންނަން ޖުމްހޫރީ ޕާޓީގެ މަޖިލީސް މެމްބަރުންގެ ތާއީދު ހޯއްދަވަން މަސައްކަތް ކުރައްވާނެ ކަމަށެވެ. 19 ވަނަ މަޖިލިސް އިންތިޚާބުގައި ޖުމްހޫރީ ޕާޓީ އަށް ލިބުނީ ފަސް ގޮނޑި އެވެ.
ރިޔާޒް ވިދާޅުވީ ތިމަރަފުށީ ދާއިރާއަށް އުއްމީދީ ބަދަލެއް ގެނެވެން އޮތީ ސަރުކާރުގެ އެހީތެރިކަމާއި އެކުގައި ކަމަށެވެ.
ރައީސް ސޯލިހު ތާއީދްކުރައްވާ މެމްބަރެއް މަޖިލީހުގެ ރައީސް ކަމަށާއި، ނައިބް ރައީސް ކަމަށް ގެންނަން މަސައްކަތް ކުރައްވާނެ ކަމަށް ރިޔާޒް ވިދާޅުވެފައިވާއިރު، ރާއްޖެއެމްވީއަށް އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި، ރައީސް ސޯލިހު ގެންދަވަނީ މަޖިލީހުގެ ރައީސް ކަމަށް ވިލުފުށީ ދާއިރާއަށް އިންތިޚާބުވެވަޑައިގެންފައިވާ ހަސަން އަފީފް ގެންނެވުމަށް "ލޮބީ" ކުރައްވަމުންނެވެ. އެގޮތުން އެ ކަމަށް ބޭނުންވާ ވޯޓް ހޯއްދެވުމުގެ މަސައްކަތް ރައީސް ސޯލިހު ކުރިއަށް ގެންދަވާ ކަމަށް ވަނީ މައުލޫމާތު ލިބިފައެވެ.
މަޖިލީހުގެ ރައީސް ކަމަށް މިހާތަނަށް އެމްޑީޕީގެ ފަސް މެމްބަރަކު ވަނީ އަމިއްލަފުޅަށް ޝައުގުވެރިކަން ފާޅުކޮށްފައެވެ.
އެއީ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް، އައްޑޫ މީދޫ ދާއިރާގެ މެމްބަރު ރޮޒައިނާ އާދަމް، މަރަދޫ ދާއިރާގެ މެމްބަރު އިބްރާހިމް ޝަރީފް، ވިލުފުށި ދާއިރާއަށް އިންތިޚާބުވެވަޑައިގެންނެވި ހަސަން އަފީފް، މެދު ހެންވޭރު ދާއިރާގެ މެމްބަރު އަލީ އާޒިމްއެވެ.
މި ފަސް ބޭފުޅުންގެ ތެރެއިން ވާދަވެރިކަން އެންމެ ބޮޑުވެފައިވަނީ އަސްލަމާއި، އަފީފާއި ދެމެދުގައެވެ.
އެމްޑީޕީގެ ރައީސް އަދި މައްޗަންގޮޅި މެދު ދާއިރާ އިން އިންތިޚާބުވެވަޑައިގެންނެވި މުހައްމަދު ނަޝީދު ގެންދަވަނީ ހިތަދޫ އުތުރު ދާއިރާގެ މެމްބަރު އަސްލަމް މަޖިލީހުގެ ރައީސް ކަމަށް ގެންނަވަން މަސައްކަތް ކުރައްވަމުންނެވެ.
މަޖިލީހުގެ ރައީސް އާއި ނައިބު ރައީސް ކަމަށް ހޮވާނެ ބޭފުޅަކު ކަނޑައެޅުމަށްޓަކައި އެމްޑީޕީގެ ޕާލަމެންޓްރީ ގްރޫޕްގައި ވޯޓެއް ނަގާނެ އެވެ. އެމްޑީޕީން ބުނީ މަޖިލިސް ރައީސް ކަމަށް ކުރިމަތިލުމުގެ ފުރުސަތު ވަގުތު އޮއްވައި ހުޅުވާލާނެ ކަމަށެވެ.
