ރައީސް ސޯލިހުގެ ތާއީދު އަޅުގަނޑަށް އެބައޮތް: އަސްލަމް
19 މެއި 2019 | އާދީއްތަ 08:53ޕާލަމެންޓްރީ ގްރޫޕްގެ މެމްބަރުންގެ ތާޢީދް އޮތް ކަމަށް ވިދާޅުވި
ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް
މަޖިލީހުގެ ރައީސް ކަމަށް ވުމަށް ރައީސް އިބްރާހިމް މުހައްމަދު ސޯލިހުގެ ފުރިހަމަ ތާއީދު އޭނާއަށް އެބައޮތް ކަމަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.
މަޖިލިސް ރައީސް ކަމަށް ގެންނެވުމަށް ރައީސް ސޯލިހް ތާއިދު ކުރައްވާ ވިލުފުށީ ދާއިރާގެ މެމްބަރު ހަސަން އަފީފަށް ކަމަށް އަޑުފެތުރިފައިވާއިރު، އަސްލަމް ވިދާޅުވީ މަޖިލީހުގެ ރައީސް ކަމުގެ ރޭހުގައި އޭނާގެ ނަން އޮވެއްޖެނަމަ، ރައީސް ސޯލިހު އިތުރު ފަރާތަކަށް ތާއީދުނުކުރައްވާނެ ކަމަށާއި، އެކަމުގެ ފުރިހަމަ ޔަގީންކަން އެބައޮތް ކަމަށެވެ.
އެމްޑީޕީގެ ޕާލަމެންޓްރީ ގްރޫޕްކަން ލީޑަރުކަށް މިހާރު ވެސް ހުންނެވި އަސްލަމް ވިދާޅުވީ ޕާޓީގެ ޕާލަމެންޓްރީ ގްރޫޕްގެ މެމްބަރުންގެ ތާއީދްވެސް އޭނާއަށް އެބައޮތް ކަމަށެވެ.
ނަވާރަ ވަނަ ރައްޔިތުންގެ މަޖިލީހުގެ ރައީސްކަމުގެ މަގާމަށް އެމްޑީޕީގެ ފަސް މެމްބަރުން ވާދަ ކުރައްވާނެ ކަން އެ ބޭފުޅުން އަމިއްލަފުޅަށް ހާމަކުރައްވާފައިވާއިރު، އެމްޑީޕީގެ ޗެއަރޕާސަން ހަސަން ލަތީފް ވިދާޅުވީ މަޖިލިސް ރައީސް ކަމަށް ކުރިމަތިލުމުގެ ފުރުސަތު ވަގުތު އޮއްވައި ޕާޓީން ހުޅުވާލާނެ ކަމަށެވެ.
މަޖިލީހުގެ ރައީސް އާއި ނައިބު ރައީސް ކަމަށް ހޮވާނެ ބޭފުޅަކު ކަނޑައެޅުމަށްޓަކައި އެމްޑީޕީގެ ޕާލަމެންޓްރީ ގްރޫޕްގައި ވޯޓެއް ނަގާނެ އެވެ.
މަޖިލިސްގެ ރައީސް ކަމަށް މިހާތަނަށް ޝައުގުވެރިކަން ފާޅުކޮށްފައިވަނީ ފަސް ފަރާތަކުންނެވެ. އެއީ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް، އައްޑޫ މީދޫ ދާއިރާގެ މެމްބަރު ރޮޒައިނާ އާދަމް، މަރަދޫ ދާއިރާގެ މެމްބަރު އިބްރާހިމް ޝަރީފް، ވިލުފުށި ދާއިރާއަށް އިންތިޚާބުވެވަޑައިގެންނެވި ހަސަން އަފީފް، މެދު ހެންވޭރު ދާއިރާގެ މެމްބަރު އަލީ އާޒިމްއެވެ.
