ބޯއިން 737 މެކްސްގެ ސޮފްޓްވެއާ އަޕްގްރޭޑް ކޮށްފި
17 މެއި 2019 | ހުކުރު 08:03އޮގަސްޓު މަހު އެ ސޮފްޓްވެއާ ބޭނުންކޮށްގެން ފްލައިޓް އޮޕަރޭޝަންތައް އަލުން ފަށާނެ
ބޯއިންގެ ފްލައިޓެއް
ވަގުތީގޮތުން ބޭނުންކުރުން ހުއްޓާލާފައިވާ އެމެރިކާގެ ބޯއިން 737 މެކްސް މަރުކާގެ ފްލައިޓްތަކުގެ ސޮފްޓްވެއާ އަޕްގްރޭޑްކޮށް ނިމިފައިވާ ކަމަށް އެ ކުންފުނިން ބުނެފިއެވެ.
ފަސް މަސް ތެރޭގައި ހިނގި ބޯއިން 737 މެކްސް 8ގެ ދެ ބޯޓު ވެއްޓުނު ހާދިސާ އަށް ފަހު ގިނަ އެއާލައިންތަކުން އެ މަރުކާގެ ފްލައިޓްތައް ބޭނުން ކުރުން ވަގުތީ ގޮތުން ވަނީ ހުއްޓާލާފައެވެ.
ބުރާސްފަތި ދުވަހު ބޯއިން އިން ނެރުނު ބަޔާނެއްގައި ބުނީ، މިހާތަނަށް ބޯއިން 207 ފްލައިޓްގައި އެ ސޮފްޓްވެއާ ޓެސްޓްކޮށްފައިވާ ކަަމަށެވެ.
ބޯއިން އިން ބުނީ، އަލަށް އަޕްގްރޭޑް ކުރި ސިސްޓަމް ބޭނުންކުރާނެ ގޮތުގެ މައުލޫމާތު ޕައިލެޓުންނަށް ދެވެނީ އެމެރިކާގެ ފެޑެރަލް އޭވިއޭޝަން ޑިޕާޓްމެންޓުން އެކަމަށް ހުއްދަ ދިނުމުން ކަމަށެވެ. އޮގަސްޓު މަހު ތެރޭގައި ބޯއިން 737 މެކްސްގެ ފްލައިޓްތައް ބޭނުން އަލުން ބޭނުން ކުރެވެން ފެށޭނެ ކަމަށް އެ ކުުންފުނިން ލަފާކުރެއެވެ.
މާޗް މަހުގެ 10 ވަނަ ދުވަހު އިތިޔޯޕިޔާއިން ފުރައިގެން ކެންޔާ އަށް ދަތުރުކުރި ބޯއިން 737 މެކްސް 8ގެ ފްލައިޓް ވެއްޓުމުގެ ހާދިސާ އަށް ފަހު ދުނިޔޭގެ ބޮޑުތި އެއާލައިންތަކުން ބޯއިން ބޭނުން ކުރުން ވަގުތީ ގޮތުން މަޑުޖައްސާލިއެވެ.
އެ މަރުކާގެ ފްލައިޓްގެ ރައްކާތެރި ކަމާއި މެދު ޝައްކު އުފައްދާ ބައެއް ޕަސެންޖަރުން ދަތުރުކުރަން ދެކޮޅުހަދާތީ އިންޑޮނޭޝިޔާ އިން ވަނީ އޯޑަރުކޮށްފައިވާ ބޯއިންގެ ބައެއް ފްލައިޓްތައް ކެންސަލްކޮށްފައެވެ.
