ބޯއިންގް 737 ގެ ބޯޓެއް ރަންވޭއިން ކައްސާލައިގެން ކޯރަކަށް ވެއްޓިއްޖެ
ބޯޓް ވެއްޓިފައިވަނީ ހުކުރު ދުވަހުގެ ރޭ 9:40 ހާއިރު
ބޯޓުން 136 މީހުން ދަތުރުކޮށްފައިވާއިރު އެންމެންވެސްވަނީ ސަލާމަތްވެފައި
ކިއުބާއިން ފުރައިގެން ފްލޮރިޑާގެ ޖެކްސަންވިލް އަށް 136 މީހުންނާއެކު ދަތުރުކުރި ބޯއިންގް 737 ގެ ބޯޓެއް ރަންވޭއިން ކައްސާލައިގެން ސެއިންޓް ޖޯންސް ކޯރަށް ވެއްޓިއްޖެ ކަމަށް ޖެކްސަންވިލްގެ ނޭވަލް އެއަރ ސްޓޭޝަނުގެ ތަރުޖަމާނު ބުނެފިއެވެ.
ނޭވަލް ސްޓޭޝަން ގުއަންޓަނާމޯ ބޭ އިން ފުރައިގެން ޖެކްސަންވިލް އަށް ދަތުރުކުރި މި ބޯޓް ރަންވޭގެ ކޮޅުން ކޯރަށް ވެއްޓިފައިވަނީ އެ ސްޓޭޓްގެ ގަޑިން ހުކުރު ދުވަހުގެ ރޭ 9:40 ހާއިރު ކަމަށް އެއަރ ސްޓޭޝަނުން ބުނެއެވެ.
ޖެކްސަންވިލްގެ މޭޔަރ ޓްވިޓަރގައި ވިދާޅުވެފައިވަނީ ބޯޓުގައިބި އެންމެން ވެސް ދިރިހުއްޓައި ސަލާމަތްކުރެވިފައިވާ ކަމަށެވެ.
އަދި ކޯރަށް ޖެޓްފިއުލް ފޭބުން ކޮންޓްރޯލް ކުރުމަށް ކްރޫއިން މަސައްކަތް ކޮށްފައިވާކަމަށެވެ.
ބޯޓުން ދަތުރުކުރި އެންމެން ސަލާމަތްވެފައިވާ ކަމަށް ޖެކްސަންވިލްގެ ޝެރިފް އޮފީހުން ކޮށްފައިވާ ޓްވީޓެއްގައިވެސް ބުނެފައިވެއެވެ.
އަދި ބޯޓް އަޑިއަށް ގޮސްފައިނުވާކަމަށް ބުނެފައިވެއެވެ.
އިތުރު ތަފްސީލެއް ލިބިފައެއް ނުވެއެވެ.
