މިސް ޔުނިވާސްއަކަށް މެކްސިކޯގެ ސޮފްޓްވެއާ އިންޖިނޭރު އަންދްރެއާ މެއްޒާ

ދުނިޔޭގެ އެންމެ ބޮޑު ރީތީގެ ދެ މުބާރާތުގެ ތެރެއިން އެއް މުބާރާތް ކަމުގައިވާ މިސް ޔުނިވާސް އަކަށް މެކްސިކޯގެ އަލްމާ އަންދްރެއާ މެއްޒާ ކަރްމޯނާ ހޮވިއްޖެއެވެ.

މިސް ޔުނިވާސްގެ ތާޖު އުމުރުން 26 އަހަރުވީ އަންދްރެއާ މެއްޒާ ހާސިލުކޮށްފައި ވަނީ, މިސް ބްރެޒިލް ހޫލިއާ ގާމާ ހިމެނޭހެން ދުނިޔޭގެ އެކިކަންކޮޅުތަކުން ރީތީގެ 73 ރާނީންނާ ވާދަކޮށްގެންނެވެ.

ސޮފްޓްވެއަރ އިންޖިނިއަރިންގެ ދާއިރާއިން ޑިގްރީ ހާސިލްކޮށްފައިވިޔަސް މެއްޒާއަކީ މޭކަޕް އާޓިސްޓެކެވެ. އޭގެ އިތުރުން ހުނަރުވެރި މޮޑެލްއެކެވެ.

މިސް ޔުނިވާސްގެ މަގާމަށް އަލަށް ހޮވުނު މެއްޒާ އަކީ ޖިންސީ ތަފާތުކުރުންތަކާއި އަނިޔާއާ ދެކޮޅަށް މަސައްކަތްކުރާ އެކްޓިވިސްޓެއްވެސްމެއެވެ. އޭނާ ނިސްބަތްވާ ޗިވާވާ އަވަށުގެ ޓޫރިޒަމް ބްރޭންޑް އެމްބެސެޑަރަކީ ވެސް މެއްޒާއެވެ.

މިފަހަރު ބޭއްވި 69 ވަނަ މިސް ޔުނިވާސް މުބާރާތަކީ  2020 ވަނަ އަހަރު ބޭއްވުމަށް ހަމަޖެހިފައި އޮތް މުބާރާތެކެވެ. އެކަމަކު ކޮވިޑް 19 ބަލިމަޑުކަމުގެ ސަބަބުން, މިދިޔަ އަހަރު މުބާރާތް ފަސްކުރެވުނީއެވެ. އެހެންކަމުން މުބާރާތުގެ ތާޖު އޮތީ, 2019 ވަނައަހަރު މިސް ޔުނިވާސްގެ ލަގަބު ހާސިލުކުރި ދެކުނު އެފްރިކާގެ ކަޅު ނަސްލުގެ ރީތީގެ ރާނީ ޒޮޒިބީނީ ތުންޒީގެ އަތުގައެވެ.

މެއްޒާއާއެކު މިސް ޔުނިވާސްގެ ތާޖަށް ވާދަކޮށް, މުބާރާތުގެ ދެވަނަ ހޯދީ ބްރެޒިލްގެ ރީތީގެ ރާނީ ހޫލިއާ ގާމާއެވެ. ތިންވަނަ ހޯދީ ޕޭރޫގެ ރީތީގެ ރާނީ ޔަނިކް މަސޭތާއެވެ.