އެފްއޭއެމް މުވައްޒަފުންނަށް އަދިވެސް ރޯދަ އެލަވެންސް ނުލިބޭ

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) މުވައްޒަފުންނަށް ރޯދަ އެލަވެންސް ނުލިބޭ ކަމުގެ މައުލޫމާތު ރާއްޖެއެމްވީއަށް ލިބިއްޖެއެވެ.

ރާއްޖެއެމްވީއަށް މައުލޫމާތު ދެމުން އެފްއޭއެމްގެ މުވައްޒަފުންތަކެއް ބުނީ، އެ މުވައްޒަފުންނަށް އަދިވެސް ރޯދަ އެލަވެންސް ނުލިބޭ ކަމަށާއި، ޖަމާވާނެ ދުވަހެއް ވެސް ނުބުނާ ކަމަށެވެ.

ނަމަވެސް ރާއްޖެއެމްވީއަށް މައުލޫމާތު ދެއްވަމުން އެފްއޭއެމްގެ ޖެނެރަލް ސެކެޓްރީ ހުސެއިން ޖަވާޒް ވިދާޅުވީ، ރޯދަ އެލަވެންސް ޖަމާކޮށްފައިވާ ކަމަށެވެ.

އެފްއޭއެމް މުވައްޒަފުންނަށް މިދިޔަ މަހުގެ މުސާރަ އަންގާރަ ދުވަހު ޖަމާވިއިރު، މުވައްޒަފުން ތިބީ އެކަމާވެސް ވަރަށް ބޮޑަށް ހިތްހަމަނުޖެހިފައެވެ.

"މުސާރަ ޖަމާވީ އިއްޔެ. އަދިވެސް ރޯދަ އެލަވެންސް ޖަމާނުވޭ. ސްޓާފުން މިތިބީ ވަރަށް ބޮޑަށް ހިތްހަމަނުޖެހިފައި" ރާއްޖެއެމްވީއަށް މައުލޫމާތު ދިން އެފްއޭއެމްގެ ސްޓާފް ބުންޏެވެ.

އެފްއޭއެމްގައި 84 މުވައްޒަފުން ތިބޭއިރު އޭގެ ތެރެއިން 40 މުވައްޒަފުންނަނަކީ އަތޮޅުތަކުގައި މަސައްކަތްކުރާ މުވައްޒަފުންނެވެ. ނަމަވެސް އޭގެ ތެރެއިން ބައެއް މުވައްޒަފުން އެ އިދާރާއިން ވަނީ ކުއްލި ގޮތަކަށް ވަކިކޮށްފައެވެ.

އެފްއޭއެމްއިން ވަނީ މިއަހަރު ހަރަދު ކުރުމަށް 95 މިލިއަން ރުފިޔާގެ ބަޖެޓެއް މިދިޔަ މާޗު މަހު ފާސްކޮށްފައެވެ. އެޑްމިނިސްޓްރޭޓިވް ޚަރަދުތަކަށް 13.3 މިލިއަން ރުފިޔާ ވަނީ ހިމަނާފައެވެ. މިއީ މިދިޔަ އަހަރަށް ވުރެ ތިން މިލިއަން ރުފިޔާގެ އިތުރުވުމެކެވެ.

ބަޖެޓްގައިވާ ގޮތުން އެންމެ ގިނަ އާމްދަނީ މި ފަހަރު ލިބެނީ ސްޕޮންސާޝިޕުންނެވެ. އަދި ދެ ވަނަ އަށް އެންމެ ބޮޑު އާމްދަނީއެއް ލިބެނީ ފީފާއިންނެވެ. އަދި ތިން ވަނައަށް އެންމެ ބޮޑު އާމްދަނީއެއް ލިބެނީ އޭއެފްސީންނެވެ.