ހައްޖަށް މީހުން ގެންދާ ކުންފުނިތަކާ އެކު އިސްލާމިކް މިނިސްޓްރީން ސޮއި ކޮށްފި
ހައްޖު ކޯޓާ ދިން ގޮތް ބާތިލްކުރަން ވަނީ ހުށަހަޅާފައި
ހައްޖުގެ އަޅުކަމުގެ ތެރެއިން ހައްޖާޖީއަކު ދުއާ ކުރަނީ
މިއަހަރު ހައްޖަށް މީހުން ގެންދިއުމަށް އިސްލާމިކް މިނިސްޓްރީން ހުއްދަ ދިން ކުންފުނިތަކާ އެކު އަންގާރަ ދުވަހު ސޮއި ކޮށްފިއެވެ.
މިއަހަރު ހައްޖަށް މީހުން ގެންދާނީ ހަ ކުންފުނިން ކަމަށް އިސްލާމިކް މިނިސްޓްރީން ވަނީ ކަނޑައަޅާފައެވެ. ސަރުކާރުގެ ސަތޭކަ ޕަސެންޓް ހިއްސާ އޮންނަ ހައްޖު ކޯޕަރޭޝަނާ އެކު އަމިއްލަ ފަސް ކުންފުންޏަކަށް ވަނީ ހައްޖަށް މީހުން ގެންދިއުމަށް ހުއްދަ ދީފައެވެ.
އެ ހަ ކުންފުންޏާއި ހުށައެެޅި އަގުތައް:
- ހައްޖު ކޯޕަރޭޝަން: 69،965ރ.
- ތަޒްކިއާ ޕްރައިވެޓް ލިމިޓެޑް: 72،550ރ.
- ޒައީމާ ގްރޫޕް ޕަރައިވެޓް ލިމިޓެޑް: 70،000ރ.
- މިނާ ހައްޖު އުމްރާ ޕްރައިވެޓް ލިމިޓެޑް: 69،965ރ.
- އެކްރޯ ޕްރައިވެޓް ލިމިޓެޑް: 59،965ރ.
- އަލް ހަރަމައިން ހައްޖު އެންޑް އުމްރާ މޯލްޑިވްސް ޕްރައިވެޓް ލިމިޓެޑް: 69،965ރ.
މި ފަހަރު ސައުދީން ރާއްޖެއަށް 2،000 ކޯޓާ ދެއެވެ. އޭގެ ތެރެއިން 1،000 ކޯޓާ މިހާރު ވަނީ ސައުދީން ދީފައެވެ.
އެކޯޓާތައް ބަހާފައި ވަނީ ހައްޖު ކޯޕަރޭޝަނަށް 550 ކޯޓާ، އަމިއްލަ ކުންފުނިތަކަށް 450 ކޯޓާއެވެ. 450 ކޯޓާ އަމިއްލަ ކުންފުނިތަކަށް ބަހާލުމުން ކޮންމެ ކުންފުންޏަކަށް ޖެހެނީ 90 ކޯޓާއެވެ.
އިސްލާމިކް މިނިސްޓްރީން ބުނީ ރާއްޖެއިން މީހުން ހައްޖަށް ގެންދަން 18 ކުންފުންޏަކުން ކުރިމަތިލި ކަމަށާއި އޭގެ ތެރެއިން ހަ ކުންފުންޏެއް "ޑިސްކޮލިފައި" ވެފައިވާ ކަމަށެވެ. އެހެންކަމުން ބާކީ އޮތް 12 ކުންފުނީގެ ތެރެއިން އެންމެ ގިނަ ޕޮއިންޓް ލިބުނު ފަސް ކުންފުންޏަށް ހައްޖަށް މީހުން ގެންދިއުމުގެ ފުރުސަތު ދިނީ ކަމަށް އިސްލާމިކް މިނިސްޓްރީން ބުނެއެވެ.
ނަމަވެސް ކުންފުނިތައް ކަނޑައެޅި ގޮތާ މެދު ބައެއް ފަރާތްތަކުން ދަނީ ހިތްހަމަނުޖެހުން ފާޅުކުރަމުންނެވެ. އަދި މިއަހަރު ހައްޖަށް މީހުން ގެންދާ ކުންފުނިތައް އިސްލާމިކް މިނިސްޓްރީން ކަނޑައެޅި ގޮތް ބާތިލު ކުރަން ސިސިލްފަރު ހައްޖު އެންޑް އުމްރާ ގްރޫޕުން ސިވިލް ކޯޓަށް ވަނީ މައްސަލަ ހުށަހަޅާފައެވެ.
ކަލަންޑަރުގައިވާ ގޮތުން މިފަހަރުގެ ހައްޖު ދުވަހަކީ އޮގަސްޓް 10 ވާ ހޮނިހިރު ދުވަހެވެ.
