އޭޝިއާ ސަރަހައްދުން 12 އަހަރުން ދަށުގެ މޮޅެތި ކުޅުންތެރިންނަށް އަމާޒުކޮށްގެން ބޭއްވި އޭޗިއަން ޓީޓީ ހޯޕްސް އިވެންޓުން ރާއްޖޭގެ ފާތިމަތު ދީމާ ރިހި މެޑަލް ހޯދައިފިއެވެ.

ތައިލޭންޑުގައި ކުރިއަށްދިޔަ މި މުބާރާތުގައި ދީމާ ވަނީ ކުޅުނު ހަ މެޗުގެ ތެރެއިން ހަތަރު މެޗު ކާމިޔާބުކޮށްފައެވެ. ބާކީ ދެ މެޗުން އޭނާ ވަނީ ބަލިވެފައެވެ.

ގްރޫޕް ސްޓޭޖުގައި ދީމާ ވަނީ ލެބްނާން ކުޅުންތެރިޔާ އާއި ތައިލޭންޑް ކުޅުންތެރިޔާ އަދި ކަޒަކިސްތާން ކުޅުންތެރިޔާއާ ދެކޮޅަށް ކުޅުނު މެޗު ކާމިޔާބުކޮށްފައެވެ. ނަމަވެސް އޭނާ ވަނީ އިންޑިއާ ކުޅުންތެރިޔާއާ ދެކޮޅަށް ގްރޫޕް ސްޓޭޖުގައި ކުޅުނު މެޗުން ބަލިވެފައެވެ.

ސެމީގައި އިރާން ކުޅުންތެރިޔާއާ ދެކޮޅަށް ކުޅުނު މެޗު ސީދާ ތިން ސެޓުން ދީމާ ކާމިޔާބުކޮށްފައިވާއިރު، ފައިނަލުގައި އޭނާ ބަލިވީ ގްރޫޕް ސްޓޭޖުގައި ކުޅުނު އިންޑިއާ ކުޅުންތެރިޔާ އަތުންނެވެ.

ދީމާ ވަނީ މި އަހަރު އިންޓަނޭޝަނަލް ޓޭބަލް ޓެނިސް ފެޑެރޭޝަނުގެ މެމްބަރު ގައުމުތަކުގައި ބާއްވާ ރީޖަނަލް ހޯޕްސް ވީކްގެ ޗެމްޕިއަންކަން ވެސް ހޯދާފައެވެ. އޭނާ މި މުބާރާތުގެ ޗެމްޕިއަންކަން ހޯދީ ކުޅުނު ހުރިހާ މެޗެއް ކާމިޔާބު ކޮށްގެންނެވެ.

މި އަހަރުގެ ގައުމީ ޓީޓީ މުބާރާތް ކާމިޔާބުކޮށް، ރައީސުލްޖުމްހޫރިއްޔާގެ ވާދައިގެ ތަށި ކާމިޔާބުކުރި އެންމެ ހަގު ޓީޓީ ކުޅުންތެރިޔާގެ ޝަރަފް ހޯދި ދީމާ ރާއްޖޭގެ ޖޫނިއާ އަދި ސީނިއާ ގައުމީ ޓީމުން މިދިޔަ އަހަރު ފުރަތަމަ ފަހަރަށް ޖާގަ ހޯދީ ރޭންކިންގެ އެއް ވަނަ ކުޅުންތެރިޔާގެ ގޮތުގައެވެ.