ބޮލީވުޑްގެ އަންހެން ސުޕަރ ސްޓާރ ސްރީދޭވީ އެންމެ ފަހުން ކުޅެފައިވާ ފިލްމް "މޮމް" ވަނީ މިދިޔަ ހުކުރު ދުވަހު ޗައިނާގައި ރިލީޒް ކޮށްފައެވެ.
ޓްރޭޑް އެންލިސްޓް ތަރަން އާދާޝް ކޮށްފައިވާ ޓްވީޓްގައި ވަނީ ޗައިނާގައި މި ފިލްމް ރިލީޒް ކުރި ދުވަހު ބޮކްސް އޮފީހުގައި އާމްދަނީގެ ގޮތުގައި 11.47 ކްރޯޑް ރުޕީސް ލިބިފައިވާ ކަމަށެވެ. އަދި މިއީ ރަނގަޅު ފެށުމެއް ކަމަށް އޭނާގެ ޓްވީޓްގައި ވެއެވެ.
މި ފިލްމް ރިލީޒްކުރި ދުވަހު ސްރީދޭވީގެ ހުވަފަތް ފިރިމީހާ ބޮނީ ކަޕޫރު ވަނީ އަސަރުގަދަ ނޯޓެއް ޓްވިޓާގައި ހިއްސާ ކޮށްފައެވެ.
ބޮނީގެ ޓްވީޓްގައި ވަނީ "މޮމް" ހުކުރު ދުވަހު ޗައިނާގައި ރިލީޒްކުރާ ކަމަށާއި އެއީ އޭނާއަށް އަސަރުން ފުރިގެންވާ ހިނދުކޮޅެއް ކަމަށެވެ. ސްރީގެ އެންމެ ފަހު ފިލްމް އެހާ ބޮޑު އޯޑިއެންސަކަށް ދައްކާތީ އެކަމަށްޓަކައި ޒީ ސްޓޫޑިއޯއަށް ވަނީ ޝުކުރު އަދާ ކޮށްފައެވެ. އަދި އެ ފިލްމް ޗައިނާގެ އޯޑިއެންސަށް ވެސް ކަމުދާނެ ކަމަށް އުއްމީދު ކުރާ ކަމަށް ބޮނީ ވަނީ ބުނެފައެވެ.
ރަވީ އުދްޔަވާރު ޑައިރެކްޓް ކޮށްފައިވާ މި ފިލްމްގައި ސްރީދޭވީ ފެނިގެން ގޮސްފައި ވަނީ ގޭންގް ގްރޫޕަކުން ރޭޕް ކުރި ދޮން ދަރިފުޅަށް އިންސާފު ހޯދައި ދިނުމަށް މަސައްކަތް ކުރާ ދޮން މަންމައެއްގެ ރޯލުންނެވެ.
ސްރީދޭވީ މަރުވެފައި ވަނީ މިދިޔަ އަހަރުގެ ފެބްރުއަރީ މަހު ކުއްލި ގޮތަކަށް ދުބާއީގައެވެ.
